បាត់ដំបង ៖ តាមសេចក្តីរាយការណ៌ពីរប្រជាពលរដ្ឋខ្មែរដែលឆ្លងដែនចូលទៅប្រទេសសៀមតាមច្រកភ្នំដី ឬច្រកគីឡូ១៣ ស្រុកសំពៅលូន ខេត្តបាត់ដំបង បានអំពាវនាវឲ្យសូមឯកឧត្តម គៀត ច័ន្ទថារិទ្ធ អគ្គនាយកនៃអគ្គនាយកដ្ឋាននគរបាលអន្តោប្រវេសន៍ ក្រសួងមហាផ្ទៃ ចាត់វិធានការទប់ស្កាត់ទង្វើមិនប្រក្រតីរបស់ក្រុមមន្ត្រីនគរបាលអន្តោប្រវេសន៍នៅច្រកភ្នំដី ជាបន្ទាន់។
ប្រភពពីពលរដ្ឋខ្មែរដែលឆ្លងដែនចូលទឹកដីសៀមតាមច្រកភ្នំដី បានឲ្យដឹងថា បច្ចុប្បន្នមន្ត្រីនគរបាលអន្តោប្រវេសន៍ប្រចាំច្រកនេះបានគាបយកលុយពីពួកគាត់តាមរយៈការធ្វើប័ណ្ឌឆ្លងដែនលើសសៀវភៅបន្ទុកយ៉ាងច្រើន។
តាមធម្មតាការធ្វើប័ណ្ឌឆ្លងដែនមានតម្លៃ៣ម៉ឺនរៀលប៉ុណ្ណោះ ប៉ុន្តែមន្ត្រីនគរបាលអន្តោប្រវេសន៍ប្រចាំច្រកភ្នំដី បានគាបយកលុយពីពលរដ្ឋខ្មែរដល់ទៅ១២០០បាតឬជាង១២ម៉ឺនរៀលឯណោះ។
សេចក្ដីរាយការណ៍ពីពលរដ្ឋខ្មែរដែលឆ្លងដែនចូលទឹកដីសៀមតាមច្រកភ្នំដី ឬច្រកគីឡូ១៣ បានឲ្យដឹងថា ក្នុងការធ្វើប័ណ្ណឆ្លងដែនមួយច្បាប់ពួកគាត់ត្រូវបង់លុយរហូតដល់១២០០បាតដែលលើសសៀវភៅបន្ទុកយ៉ាងច្រើន។
ប្រជាពលរដ្ឋបានឲ្យដឹងថា តម្លៃដូចខាងលើនេះគឺមន្ត្រីនគរបាលអន្តោប្រវេសន៍យកលេសថាជារឿងមនោសច្ចេតនាពី១០០បាតទៅ២០០បាត ដែលជាអំពើពុករលួយយ៉ាងច្បាស់ក្រឡែតតែម្តង។ ដូច្នេះថ្នាក់ដឹកនាំក្រសួងមហាផ្ទៃ ក៏ដូចជានាយឧត្តមសេនីយ៍ នេត សាវឿន អគ្គស្នងការនគរបាលជាតិ មិនគួរបណ្ដែតបណ្ដោយឲ្យមន្ត្រីនគរបាលអន្តោប្រវេសន៍នៅច្រកភ្នំដី ខេត្តបាត់ដំបង ធ្វើអ្វីៗស្រេចតែអំពើចិត្តរបស់ពួកគេទៀតឡើយ។
ជាពិសេសលោក គៀត ច័ន្ទថារិទ្ធ អគ្គនាយកនៃអគ្គនាយកដ្ឋាននគរបាលអន្តោប្រវេសន៍ក្រសួងមហាផ្ទៃ មិនគួរទុកឲ្យលោកវរសេនីយ៍ឯក ព្រី ណាហ្សាណូ ប្រធានការិយាល័យច្រកនគរបាលអន្តោប្រវេសន៍ច្រកភ្នំដី និងបក្ខពួកបង្កការលំបាកដល់ប្រជាពលរដ្ឋស្រេចតែអំពើចិត្តទៀតទេ។
មន្ត្រីបម្រើការងារនៅច្រកភ្នំដី ឬច្រកគីឡូ១៣ បានឲ្យដឹងថា លោក ព្រី ណាហ្សាណូ មេនគរបាលអន្តោប្រវេសន៍ច្រកភ្នំដី មិនត្រឹមតែបណ្ដោយឲ្យកូនចៅក្រោមឱវាទគាបយកលុយពីប្រជាពលរដ្ឋឆ្លងដែនចូលទឹកដីសៀមស្រេចតែអំពើចិត្តប៉ុណ្ណោះទេ គឺថែមទាំងឃុបឃិតជាមួយសមត្ថកិច្ចពាក់ព័ន្ធដទៃទៀតបើកដៃឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់ស្រេចតែអំពើចិត្តទៀតផង។
ក្នុងនោះល្បិចរបស់មន្ត្រីនគរបាលអន្តោប្រវេសន៍ច្រកភ្នំដី ក្នុងការគាបយកលុយពីប្រជាពលរដ្ឋនិងពីពលករខ្មែរដែលឆ្លងដែនចូលទឹកដីសៀម លើសសៀវភៅបន្ទុកកំពុងតែប្រឈមនឹងការរិះគន់យ៉ាងខ្លាំង ព្រោះជាអំពើពុករលួយយ៉ាងគឃ្លើន។ ហេតុនេះហើយទើបប្រជាពលរដ្ឋអំពាវនាវយ៉ាងទទូចដល់ថ្នាក់ដឹកនាំក្រសួងមហាផ្ទៃ និងនាយឧត្តមសេនីយ៍ នេត សាវឿន អគ្គស្នងការនគរបាលជាតិ ទប់ស្កាត់អំពើពុករលួយនិងទង្វើមិនប្រក្រតីរបស់លោក ព្រី ណាហ្សាណូ និងបក្ខពួកប្រកបដោយប្រសិទ្ធភាពសុខស្រួល៕
