ខេត្តប៉ៃលិន ៖ នៅថ្ងៃទី១០ ខែកញ្ញាឆ្នាំ២០១៥ វេលាម៉ោង៨និង០០នាទីព្រឹក នៅចំណុចសាលាឃុំស្ទឹងត្រង់ ក្នុងស្រុកសាលាក្រៅ មានរៀបចំទិវាអក្ខរកម្ម ជាតិ អន្តរជាតិ ៨កញ្ញាលើកទី១៥ ឆ្នាំ២០១៥ ក្រោមអធិបតីភាពឯកឧត្តម កើត សុធា អភិបាល នៃគណអភិបាលខេត្តប៉ៃលិន និងដោយមានការ អញ្ជើញចូលរួមពីសំណាក់ លោក ស្នងការរង នគរបាលខេត្ត លោកអធិការស្រុក លោកប្រធាន អនុប្រធានមន្ទីរអង្គភាពជំនាញជុំវិញខេត្ត ព្រមទាំងមន្ត្រី រាជការស្ថាប័ននានាមួយចំនួនទៀត ។
លោកតង់ ធារ៉ាប្រធានមន្ទីរ អប់រំយុវជន និងកីឡាខេត្តប៉ៃលិនបានអោយដឹងថា ក្នុងឆ្នាំ១៩៩៧ ក្រោយសមាហរណកម្ម រាជរដ្ឋាភិបាលបានបង្កើត អោយមានគណកម្មាធិការសម្របសម្រួល ការងារអប់រំក្រៅប្រព័ន្ធ ដើម្បីជំរុញការងារអក្ខរកម្ម និងអប់រំក្រៅប្រព័ន្ធ និងបានរៀបចំប្រព័ន្ធ អប់រំមួយពេញលេញ ដោយមានការរអប់រំក្នុងប្រព័ន្ធ, ក្រៅប្រព័ន្ធ និងក្រៅផ្លូវការ ក្នុងគោលដៅរួមចំណែកសម្រេចការអប់រំទាំងអស់គ្នា និងផ្តល់អោយប្រជាពលរដ្ឋ នូវលទ្ធភាពទទួលបានការអប់រំពេញមួយជីវិត និងជួយ កសាងនូវសង្គមរៀនសូត្រ ប្រកបដោយសមធម៌ យុត្តិធម៌ និងការអភិវឌ្ឍន៍សង្គម ដែលពេលនោះយើងយើងបានអនុវត្តតាមគោលការណ៍ អ្នកចេះច្រើនបង្រៀនអ្នកចេះតិច និងអ្នកចេះតិចបង្រៀនអ្នកមិនចេះ។
លោកបានបន្តថា ក្នុងឆ្នាំ២០១៤ ខេត្តប៉ៃលិនមានអន្ខកជនចាប់ពីអាយុ ១៥ឆ្នាំ ដល់៤៥ឆ្នាំ ចំនួន៣.៤២៤ នាក់ ស្រី១៦៩៣នាក់ , មានថ្នាក់អក្ខរកម្មចំនួន២០ថ្នាក់ , មានគ្រូចំនួន២០នាក់ ស្រី១១នាក់, មានអ្នកចូលរៀនចំនួន៤៥២នាក់, ស្រី២៦៥នាក់ និងបានរំដោះអោយ ផុតពីគ្រោះមិនចេះអក្សរចំនួន ៣៩៨នាក់ ស្រី ២២៨នាក់ ។
ឯកឧត្តមកើត សុធា អភិបាលនៃគណអភិបាលខេត្តប៉ៃលិន បានមានប្រសាសន៍ថា ដោយសារមានកត្តាផ្សេងៗជាច្រើន ធ្វើអោយប្រជាពលរដ្ឋយើងមួយចំនួន បានបាត់បង់ឱកាសរៀនសូត្រកាលនៅវ័យកុមារភាព ហើយបានទទួលរងនូវគ្រោះមិនចេះអក្សរ រហូតដល់បច្ចុប្បន្ននេះ។
ហេតុនេះរាជរដ្ឋាភិបាលបានបង្កើតអោយមានថ្នាក់រៀនអក្ខរកម្មនៅតាមភូមិឃុំរបស់ប្រជាពលរដ្ឋ ដើម្បីបានចូលរៀនសូត្រ ចេះអាន ចេះសរសេរអក្សរអោយបានគ្រប់ៗគ្នា។ ឯកឧត្តមបានបន្តថា ទិវាអក្ខរកម្មឆ្នាំនេះមានប្រធានបទ អក្ខរកម្មរួមចំណែកកាត់បន្ថយចំណាកស្រុកដោយប្រថុយប្រថាន, ដែលប្រធានបទនេះបានបង្កប់ន័យយ៉ាងជ្រាលជ្រៅក្នុងការអប់រំ ។
អក្ខរកម្មបានផ្តល់អោយមនុស្សម្នាក់ៗមានចំណេះដឹង មានជំនាញ និងមានទំនុកចិត្តក្នុងការស្វែងរកព័ត៌មានសំខាន់ៗ និងការសំរេចចិត្តបានត្រឹមត្រូវសំរាប់ខ្លួនឯង និងក្រុមគ្រួសារ។ ជាទូទៅអ្នកចេះអក្សរតែងស្វែងយល់ព័ត៌មានបានច្រើនជាងអ្នកមិនចេះអក្សរ ស្តីពីការធ្វើចំណាក់ស្រុកដោយប្រថុយប្រថាន ។
ម្យ៉ាងទៀត ការធ្វើចំណាកស្រុកដោយប្រថុយប្រថាននេះ អាចធ្វើអោយប្រជាពលរដ្ឋយើង រង នូវទុក្ខទោស ពើបប្រទះការជួញដូរមនុស្ស ពិសេសធ្វើអោយស្ត្រី និងកុមារ ងាយរងគ្រោះជាងគេ ដោយប្រឈមនឹងការគេងប្រវ័ញ្ចកំលាំងពលកម្ម ការជួញដូរផ្លូវភេទ ការជួញដូរគ្រឿងញៀន ជាដើម។
ឯកឧត្តមបានណែនាំអោយប្រជាពលរដ្ឋទាំងអស់ដែលជាអន្ខករជន ត្រូវមកសិក្សារៀនសូត្រអោយ បានគ្រប់ៗគ្នា រៀនទាំងអក្សរសាស្ត្រ, ជំនាញវិជ្ជាជីវៈផ្សេងៗ និងរៀនស្វែងយល់ពី បញ្ហាសព្វបែប យ៉ាងនៅក្នុងសង្គម ដែលនាំអោយយើងមានការគិតគូពិចារណាខ្ពស់ និងសំរេចចិត្តបានត្រឹមត្រូវ មុននឹងធ្វើអ្វីមួយ ដែលជាប្រយោជន៍ដល់គ្រួសារ និងសង្គមជាតិ៕
