មណ្ឌលគិរី៖ លោកឧត្តមសេនីយ៍ត្រី តូច យ៉ុន ត្រូវបានក្រសួងមហាផ្ទៃ ផ្ដល់សេចក្តីទុកចិត្ត និងប្រកាសតែងតាំងមុខតំណែងថ្មី ជាស្នងការនគរបាលខេត្តមណ្ឌលគិរី នាព្រឹកថ្ងៃទី៧ ខែកញ្ញា ឆ្នាំ២០១៥នេះ នៅស្នងការដ្ឋាននគរបាលខេត្ត។
ពិធីប្រកាសផ្ទេរភារកិច្ច និងតែងតាំងមុខតំណែងស្នងការ នៃស្នងការដ្ឋាននគរបាលខេត្តមណ្ឌលគិរី នាព្រឹកនេះ ប្រព្រឹត្តឡើងក្រោមអធិបតី ឯកឧត្តម នាយឧត្តមសេនីយ៍ សំរិទ្ធ ឌី អនុរដ្ឋលេខាធិការក្រសួងមហាផ្ទៃ ឯកឧត្តម នាយឧត្តមសេនីយ៍ នេត សាវឿន អគ្គស្នងការនគរបាលជាតិ និងឯកឧត្តម អេង ប៊ុនហៀង អភិបាល នៃគណៈអភិបាលខេត្តមណ្ឌលគិរី។
លោក តូច យ៉ុន ត្រូវបានតែងតាំងជាស្នងការនគរបាលខេត្តមណ្ឌលគិរី បន្ទាប់ពីលោកបានកាន់តំណែងជាស្នងការរង ទទួលបន្ទុកកិច្ចការព្រំដែន នៃស្នងការដ្ឋានគរបាលខេត្តមួយនេះ អស់រយៈពេលជាច្រើនឆ្នាំ និងដើម្បីជំនួសឲ្យអតីតស្នងការ លោកឧត្តមសេនីយ៍ត្រី ញ៉ែម វ៉ាន់នី ដែលត្រូវបានតែងតាំងជាអនុប្រធាននាយកដ្ឋានអាវុធជាតិផ្ទុះ នៃក្រសួងមហាផ្ទៃ៕
