(ខេត្តកែប)៖ បុរសម្នាក់បានស្លាប់បន្ទាប់ពីក្រុមគ្រួសារបញ្ជូនទៅសង្គ្រោះនៅមន្ទីរពេទ្យ ដោយសារជនរងគ្រោះជិះម៉ូតូមិនប្រុងប្រយ័ត្នធ្វើឱ្យជ្រុលទៅបុកគូទរថយន្តដែលបើកបរស្របគ្នា។
ហេតុការណ៍នេះបានកើតឡើងកាលពីវេលាម៉ោង៧និង២០នាទីយប់ ថ្ងៃទី១១ខែតុលា ឆ្នាំ២០១៨ ស្ថិតខាងលិចមុខសាលាខេត្តកែប ក្នុងភូមិកែប សង្កាត់កែប ក្រុង-ខេត្តកែប លើដងផ្លូវជាតិ33A។
តាមប្រភពព័ត៌មានពីសមត្ថកិច្ចក្រុងកែបបានឱ្យដឹងថា បុរសរងគ្រោះមានឈ្មោះ កែម ប៊ុនឌី ភេទប្រុស អាយុ៥៨ឆ្នាំ មានទីលំនៅស្ថិតក្នុងភូមិ សង្កាត់ខាងលើ ដោយមុនពេលជួបគ្រោះថ្នាក់ជនរងគ្រោះបានជិះម៉ូតូម៉ាកC100កូរ៉េ ពាក់ស្លាកលេខ តាកែវ 1M-6835 នៅពីក្រោយរថយន្តមិនស្គាល់ភិនភាគមួយគ្រឿង លុះមកដល់ចំណុចកើតហេតុស្រាប់តែម៉ូតូជនរងគ្រោះជ្រុលទៅបុកគូទរថយន្តពីក្រោយពេញទំហឹងបណ្តាលឱ្យរងរបួសធ្ងន់ ចំណែករថយន្តបានបង្កើនល្បឿនទៅមុខបាត់ស្រមោលឈឹង។
សមត្ថកិច្ចបានបញ្ជាក់ទៀតថា ក្រោយពីកើតហេតុជនរងគ្រោះត្រូវ បានរថយន្តសង្គ្រោះរបស់ស្នងការដ្ឋាននគរបាលខេត្តកែប ដឹកបញ្ជូនទៅសង្គ្រោះនៅឯមន្ទីរពេទ្យបង្អែកខេត្តកំពតភ្លាមៗ ប៉ុន្តែដោយសារស្ថានភាពរបួសធ្ងន់ធ្ងរពេកបុរសរងគ្រោះក៏ដាច់ខ្យល់ស្លាប់តែម្តង។
បច្ចុប្បន្នសពបុរសរងគ្រោះត្រូវបានសមត្ថកិច្ចដឹកបញ្ជូនទៅប្រគល់ឱ្យក្រុមគ្រួសារនៅឯលំនៅដ្ឋាន ដើម្បីចាត់ចែងធ្វើបុណ្យតាមប្រពៃណី៕
សេង ណារិទ្ធ
