ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមប្រឹក្សាសកម្មភាពជនមានពិការភាព បានគូសបញ្ជាក់ថា សមិទ្ធផលទាំងឡាយក្នុងវិស័យពិការភាពពិតជាបានកើតឡើងដោយកិច្ចខិតខំប្រឹងប្រែងពីគ្រប់ភាគីពាក់ព័ន្ធទាំងអស់ ព្រោះវិស័យពិការភាពគឺជាការងារពហុវិស័យដែលទាមទារឱ្យមានការចូលរួមដោយយកចិត្តទុកដាក់ទាំងអស់គ្នា រួមគ្នាដោះស្រាយរាល់បញ្ហាប្រឈមនានាប្រកបដោយប្រសិទ្ធភាព និងការទទួលខុសត្រូវខ្ពស់។ ការគូសបញ្ជាក់របស់ឯកឧត្តម ជា សុមេធី ធ្វើឡើងក្នុងពីធីអបអរសាទរទិវាជនមានពិការភាពគ-ថ្លង់កម្ពុជាលើកទី១២ និងអន្តរជាតិលើកទី៦៧ ឆ្នាំ២០២៤ ក្រោមប្រធានបទ “ប្រើប្រាស់ភាសាសញ្ញានៅក្នុងសង្គមដើម្បីជនមានពិការភាពគ-ថ្លង់ទទួលបានសិទ្ធិ” នៅទីស្តីការក្រសួង នាព្រឹកថ្ងៃទី២៥ ខែកញ្ញា ឆ្នាំ២០២៤នេះ។
ឯកឧត្តមរដ្ឋមន្ត្រីបានលើកឡើងថា បើយោងតាមការធ្វើជំរឿនប្រជាសាស្ត្រឆ្នាំ២០១៩នៅកម្ពុជា យើងមានជនមានពិការភាពចំនួន៤,៩ភាគរយនៃប្រជាជនសរុបប្រមាណជាង ១៦លាននាក់ ក្នុងនោះជនមានពិការភាពគ-ថ្លង់ ប្រមាណ២,៨ភាគរយ គឺឈរបន្ទាប់ពីពិការភាពគំហើញ ហើយថា ការធ្លាក់ក្នុងស្ថានភាពពិការភាព មិនត្រឹមធ្វើឱ្យមានផលប៉ះពាល់ដល់ជនមានពិការភាពគ-ថ្លង់ខ្លួនឯងផ្ទាល់ប៉ុណ្ណោះទេ តែវាបានប៉ះពាល់ដល់ក្រុមគ្រួសារ មិត្តភក្តិ និងសហគមន៍ ព្រមទាំងបន្សល់ផលវិបាកផ្នែកសេដ្ឋកិច្ច ការស្តារកាយសម្បទា និងសតិអារម្មណ៍ផ្សេងៗទៀតផងដែរ ដោយមូលហេតុចម្បងៗដែលបណ្តាលឱ្យមានពិការភាពគ-ថ្លង់ គឺបណ្តាលមកពីកត្តាជីវសាស្ត្រ បរិស្ថាន ការប្រើប្រាស់ឱសថ ចាស់ជរា និងគ្រោះថ្នាក់ផ្សេងៗទៀត។
ឯកឧត្តមរដ្ឋមន្ត្រីបានគូសបញ្ជាក់ថា រាជរដ្ឋាភិបាល តាមរយៈក្រសួងសង្គមកិច្ច អតីតយុទ្ធជន និងយុវនីតិសម្បទា និងក្រុមប្រឹក្សាសកម្មភាពជនពិការ តែងបានយល់ច្បាស់ពីតម្រូវការ និងបញ្ហាប្រឈមនានារបស់ជនមានពិការភាពគ្រប់ប្រភេទរួមទាំងជនមានពិការភាពគ-ថ្លង់ និងក្រុមគ្រួសារដែលជាសិទ្ធិវន្តបុគ្គលផងដែរ។ ឈរលើបរិការណ៍ និងស្មារតីទទួលខុសត្រូវនេះ រាជរដ្ឋាភិបាល នីតិកាលទី៧នៃរដ្ឋសភា ក្រោមការដឹកនាំប្រកបដោយថាមពលគតិបណ្ឌិតឈ្លាសវៃបំផុតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានដាក់ចេញនូវយុទ្ធសាស្ត្របញ្ចកោណ ដំណាក់កាលទី១ ដែលគ្របដណ្តប់ទៅលើការងារអាទិភាពជាច្រើន ក្នុងនោះវិស័យពិការភាពក៏ត្រូវបានចាត់ទុកជាវិស័យអាទិភាពមួយ ដែលស្ថិតក្នុងផ្នែកមួយនៃប្រព័ន្ធគាំពារសង្គមរបស់កម្ពុជា ហើយជាមួយគ្នានេះ ដើម្បីគាំទ្រសមិទ្ធកម្មខាងលើនេះ រាជរដ្ឋាភិបាលបានបង្កើតវិទ្យាស្ថានជាតិអប់រំពិសេសសម្រាប់ បណ្តុះបណ្តាលគ្រូជំនាញគ្រប់កម្រិត វិក្រឹត្យការបុគ្គលិកអប់រំ អភិវឌ្ឍន៍សមត្ថភាពអប់រំ អភិវឌ្ឍន៍កម្មវិធី បណ្តុះបណ្តាលជំនាញវិជ្ជាជីវៈឱ្យស្របតាមស្តង់ដាសមត្ថភាពកម្រិតគុណវុឌ្ឍជាតិ និងតម្រូវការទីផ្សារការងារសម្រាប់ជនមានពិការភាពគ្រប់ៗរូបផងដែរ៕ ដោយ៖ ចាន់ សុភឿន
