ឃាត់ខ្លួនមន្ត្រីអាវុធហត្ថម្នាក់ និងបក្ខពួកម្នាក់ទៀតដែលបើកល្បែងឡូតូនៅមូលដ្ឋានខណ្ឌកំបូល

(ភ្នំពេញ)៖ កម្លាំងគណៈបញ្ជាការឯកភាពខណ្ឌកំបូល ដឹកនាំដោយលោក គង់ ចាន់សុភារី អភិបាលរងខណ្ឌកំបូល បានចុះបង្ក្រាបល្បែងស៊ីសងខុសច្បាប់ (ឡូតូ) ដោយបានឃាត់ខ្លួនមនុស្ស២នាក់ ក្នុងនោះមានម្នាក់ជាមន្ត្រីកងរាជអាវុធហត្ថរាជធានីភ្នំពេញ នៅភូមិកន្ទោកជើង សង្កាត់កន្ទោក ខណ្ឌកំបូល រាជធានីភ្នំពេញ នៅរសៀលថ្ងៃទី៩ ខែសីហា ឆ្នាំ២០២៤។

ដោយមានបទបញ្ជាពីលោក ឃឹម ស៊ុនសូដា អភិបាលខណ្ឌកំបូល បានចាត់លោក គង់ ចាន់សុភារី អភិបាលរងខណ្ឌ ដឹកនាំកម្លាំងគណៈបញ្ជាការឯកភាពខណ្ឌចុះបង្ក្រាបល្បែងស៊ីសងខុសច្បាប់ (ឡូតូ) ដោយឃាត់ខ្លួនមនុស្សប្រុសស្រី២នាក់ រួមនឹងវត្ថុតាងពាក់ព័ន្ធ។

ជនសង្ស័យទាំង២នាក់៖ ទី១-ឈ្មោះ ហួន ឌីម៉ូវ ភេទប្រុស អាយុ៣៤ឆ្នាំ មុខរបរជាមន្ត្រីអាវុធហត្ថរាជធានីភ្នំពេញ ស្នាក់នៅភូមិកន្ទោកជើង សង្កាត់កន្ទោក ខណ្ឌកំបូល, ទី២-ឈ្មោះ ម៉ម សោភា ភេទស្រី អាយុ២៩ឆ្នាំ មុខរបរលក់ដូរ ស្នាក់នៅភូមិកន្ទោកជើង សង្កាត់កន្ទោក ខណ្ឌកំបូល។

បច្ចុប្បន្នជន សង្ស័យទាំង២នាក់ រួមទាំងវត្ថុតាំងពាក់ព័ន្ធ ត្រូវបាននាំយកមកប៉ុស្តិ៍នគរបាលរដ្ឋបាលកន្ទោក រួចបញ្ជូនបន្តមកអធិការដ្ឋាននគរបាលខណ្ឌកំបូល ដើម្បីសាកសួរបន្ត៕