ខេត្តប៉ៃលិន ៖ បន្ទាប់ពីសារព័ត៌មាន បានចុះផ្សាយថា បន្ទាយយោធាមួយកន្លែងកំពុងក្លាយទៅជាកំផែងការពារយ៉ាងរឹងមាំ ដល់ពួកអ្នកលេងល្បែងស៊ីសង ដោយបង្កើតសង្វៀនបញ្ជល់មាន់ ហើយដំណើរការយ៉ាងរលូនជិតមួយឆ្នាំទៅហើយនេះ ។ រហូតមកដល់ព្រឹកថ្ងៃទី២៥ ខែសីហា ឆ្នាំ២០១៨ ជួបជាមួយមន្ត្រីយោធាវរ:សេនាតូចលេខ៥៣៤ ដែលកំពុងស្នាក់នៅក្នុងបន្ទាយបានទទួលស្គាល់ថា ពួកគេបើកកន្លែងបញ្ជល់មាន់មែន តែលេងតិចតួចប៉ុណ្ណោះ បើសិនជាប៉ះពាល់ដល់សណ្តា ប់ធ្នាប់សន្តិសុខសង្គមនឹងបញ្ឈប់ភ្លាមៗ ។
សូមបញ្ជាក់ថា សង្វៀនបញ្ជល់មាន់គ្មានច្បាប់ទម្លាប់មួយកន្លែង ស្ថិតនៅក្នុងបន្ទាយយោធាក្នុងវរ:សេនាតូចលេខ៥៣៤ ក្នុងភូមិអូរកន្ធៀងវ៉ា ឃុំស្ទឹងត្រង់ ស្រុកសាលាក្រៅ ។សង្វៀនបញ្ជល់មាន់ដ៏ធំនេះ បានជ្រកនៅក្នុងកំផែងបន្ទាយយោធាដ៏រឹងមាំ ដោយបើកដំណើរការជិត១ឆ្នាំមកហើយ។ ក្នុងមួយសប្ដាហ៍គេបើកទទួលអ្នកលេងចំនួន២ថ្ងៃ គឺនៅថ្ងៃពុធ និងថ្ងៃសៅរ៍ ។ អ្នកដែលញៀននឹងល្បែងបញ្ជល់មាន់នេះ មានរាប់រយនាក់ គ្រប់សមាសភាព ខណ:ពេលដល់ថ្ងៃណាត់ផ្គូរផ្គងមាន់ម្ដងៗ គឺនាំគ្នាបើករថយន្តមកពីតាមបណ្ដាស្រុកនានាទូទាំងខេត្ត និងមកពីខេត្តបាត់ដំបងផងដែរ ។
ប្រភពព័ត៌មានបានឱ្យដឹងថា ប្រហែលជាទីតាំងសង្វៀនបញ្ជល់មាន់នេះ មានសុវត្ថិភាពល្អ មានភាពកក់ក្ដៅក្នុងការភ្នាល់ល្បែងស៊ីសងហើយ ព្រោះទីតាំងនេះ ហ៊ុំព័ទ្ធដោយកំផែងយោធាយ៉ាងរឹងមាំ ដែលសមត្ថកិច្ចជាច្រើនមិនអាចទៅរំខានក្នុងការលេងល្បែងមួយនេះ ។
ពាក់ព័ន្ធនឹងបញ្ហានេះ លោក សេង ស៊ីល ជានាយសេនាធិការនៃបន្ទាយយោធាវរ:សេនាតូចលេ៥៣៤ បានឱ្យដឹងថា ពិតជាមានការបើកលេងល្បែងបញ្ជល់មាន់នៅក្នុងបន្ទាយរបស់ខ្លួនមែន តែលេងតិចតួចបុា ណ្ណោះ មិនធំដុំដូចជាការចុះផ្សាយនោះទេ ។ លោកបន្តទៀតថា ការលេងល្បែងនេះ គឺភាគច្រើនជា កូនទាហាននៅក្នុងបន្ទាយគេនាំគ្នាវ៉ាងមាន់លេងប៉ុណ្ណោះ មិនបានដាក់លុយកាក់អ្វីច្រើន ដូចការចោ ទប្រកាន់នោះទេ ហើខាងលោកនឹងឱ្យបិទបញ្ឈប់លេងល្បែងមួយនេះទៀត ។
ទោះបីជាយ៉ាងណាក៏ដោយ ប្រជាពលរដ្ឋដែលរស់នៅតំបន់យោធានោះ មានការព្រួយបារម្ភ ពីភូមិឃុំសុវត្ថិភាព ខណ:ល្បែងបញ្ជល់មាន់ដែលច្បាប់ហាមឃាត់ ត្រូវបានគេបើកលេងនៅក្នុងបន្ទា យយោធា ដោយតែងតែឃើញអ្នកញៀននឹងល្បែនេះ នាំគ្នាជិះម៉ូតូ រថយន្តស្ពាយ ឬបីមាន់ជល់ចូលទៅក្នុងបន្ទាយយ៉ាងគគ្រឹកគគ្រេង រៀងរាល់សប្ដាហ៍តែម្តង ។ តែគេមិនឃើញមានការហាមឃាត់ពីអាជ្ញាធរណានោះឡើយ ដោយចេះតែឱ្យបើកលេងយ៉ាងរលូនតែម្តង ជាពិសេសនៅព្រឹកថ្ងៃទី២៥ ខែសីហា ឆ្នាំ២០១៨នេះ គេឃើញអ្នកញៀននឹងល្បែងបញ្ជល់មាន់ នៅតែបើកបររថយន្តឡិចស៊ិសបីស្ពាយមាន់ បម្រុងនឹងយកទៅលេងនៅក្នុងបន្ទាយយោធាខាងលើដដែល លុះឃើញភ្នាក់ងារសារព័ត៌មានចុះទៅសួរ នាំក៏នាំគ្នាបើករថយន្តគេចខ្លួនភ្លាមៗ ៕
ដោយ ៖ នីយ៉ា
