កំពង់ឆ្នាំង ៖ ក្នុងរយៈពេលប៉ុន្មានថ្ងៃកន្លងមកនេះ មានប្រព័ន្ធផ្សព្វផ្សាយ តាមផេក និងគេហទំព័រព័ត៌មាន អេឡិចត្រូនិកជាច្រើន តាមបណ្តាញសង្គមfacebook នូវព័ត៌មាន ស្តីអំពីករណីលោកឧត្តមសេនីយ៍ត្រី ស៊ុំ សុជាតិ ស្នងការរងនគរបាលខេត្តកំពង់ឆ្នាំង កំពុងតែល្បីរន្ទឺថានឹងបានឡើងធ្វើជាស្នងការនគបាលខេត្តកំពង់ឆ្នាំង បន្ទាប់ពីលោកឧត្តមសេនីយ៍ទោ ឡុច សុវណ្ណារ៉ា ចូលនិវត្តន៍ ។ បន្ទាប់ពីមានអ្នកកាសែត ចំនួន 5 នាក់បានជួបជាមួយលោក ស៊ុំ សុជាតិ កាលពីល្ងាចថ្ងៃអាទិត្យទី 19 ខែសីហាឆ្នាំ 2018 វេលាម៉ោង 5 និង 50 នាទីល្ងាចនៅកន្លែងមួយ ។
ពេលនោះ អ្នកសារព័ត៌មានបានសំណូមពរថាបើលោក ស៊ុំ សុជាតិ បានឡើងជាស្នងការពិតប្រាកដមែនយើងខ្ញុំអបអរសាទរ ប៉ុន្តែសុំសំណូមពរឲ្យធ្វើយ៉ាងណាជួយដាក់កំលាំងបង្ក្រាបល្បែងស៊ីសងឱ្យអស់នៅក្នុងខេត្តកំពង់ឆ្នាំងស្របតាមគោលនយោបាយភូមិឃុំមានសុវត្ថិភាពទាំង 9 ចំ ណុចរបស់ប្រមុខរាជរដ្ឋាភិបាលអោយមានប្រសិទ្ធិភាព ពេល នោះលោក សុំ សុជាតិ ថាប្រទេសណាក៏មានល្បែងស៊ីសងដែរបើគ្មានល្បែងស៊ីសងទេ តើសមត្ថកិច្ចមានលុយមកពីណាចាយ ? ។
ជុំវិញព័ត៌មាននេះ នៅព្រឹកថ្ងៃទី ២៤ សីហា ២០១៨ លោកឧត្តមសេនីយ៍ត្រី ស៊ុំ សុជាតិ ស្នងការរងនគរបាលខេត្តកំពង់ឆ្នាំង លោកបានបញ្ជាក់ប្រាប់អ្នកសារព័ត៌មាន ថា នៅល្ងាចថ្ងៃទី ១៩សីហា ២០១៨នោះ ការជួបជា មួយបងប្អូនអ្នកកាសែត៤-៥ នាក់នោះគឺជាការចៃដន្យទេ មិន មែនណាត់គ្នាជួបសំភាសន៍សួរនាំអំពីការងារអ្វីទេ គឺជួបនៅ ក្នុងហាងហូបចុក ស្ថិតនៅក្នុងឃុំស្រែសន្ទូច ក្នុងក្រុងកំពង់ឆ្នាំង ពេលលោកនិងមិត្តភក្តិនាំគ្នាហូបចុកជុំគ្នាតិចតួច ក៏មានការប្រាស្រ័យទាក់ទងជល់កែវគ្នា ជាមួយបងប្អូនអ្នក កាសែតខ្មែរយើងទាំង៤-៥នាក់នោះក្នុងចំណោមនោះក៏លោកមិនស្គាល់ឈ្មោះ និង ចំណាំមុខមិនអស់ដែរ គឺស្គាល់ច្បាស់តែម្នាក់ទេ ។ ឯការនិយាយធ្លោយមាត់លេងសើចជាមួយពួក គាត់ ក៏មិនមែនដូចការលើកឡើងរបស់ពួកគាត់ទេ ។
លោកឧត្តមសេនីយ៍ត្រី ស៊ុំ សុជាតិ បានបន្តថា ខ្ញុំទទួលស្គាល់ថាពេលនោះខ្ញុំក៏រៀងស្រវឹងបន្តិចដែរ ហើយការឆ្លើយឆ្លងគ្នាជាលក្ខណៈមិត្តភាពនិយាយលេងសើចតែប៉ុណ្ណោះ ឯពាក្យថា ល្បែងសុីសងនោះ គឺលោកបាននិយាយថា មិនមែនកើត មានតែនៅក្នុងទឹដីខេត្តកំពង់ឆ្នាំងតែ១នោះទេខេត្តស្រុកផ្សេងៗ ទៀតក៏មានដែរ ប្រទេសណាក៏មានដែរ ឯការបង្ក្រាបវិញ សមត្ថកិច្ចយើងខិតខំធ្វើការបង្ក្រាបខ្លាំងណាស់ គឺមិនដែល បណ្តែតបណ្តោយអោយកើតមានតាមអំពើចិត្ត អនាធិបតេយ្យ នោះទេ អោយតែដឹងទីតាំងល្បែងខុសច្បាប់ពីតប្រាកដ ខាង សមត្ថកិច្ចយើងចាត់វិធានការភ្លាមៗ ។ តែបើពេលខ្លះយើង អត់ដឹងតើទៅធ្វើការបង្ក្រាបម៉េចទៅ ចឹងទេសូមអស់លោក អ្នក កាសែតទាំងអស់សហការជាមួយកម្លាំងនគរបាលជំនាញយើងរាយការណ៍ប្រាប់ទីតាំងច្បាស់លាស់ ដើម្បីយើងចាត់ វិធានការណ៍ បង្ក្រាប ។
លោកឧត្តមសេនីយ៍ត្រីបន្តថា ជិត មួយជីវិតរបស់លោក រយៈពេល៣២ឆ្នាំជាងហើយ ដែលរូប លោកបានបំរើជាតិមាតុភូមិ ធ្វើជានគរបាលជាតិ តស៊ូគ្រប់ ឧបសគ្គរហូតមកដល់សព្វថ្ងៃនេះ ក៏លោកពុំមានបានសល់ ទ្រព្យសម្បត្តិអ្វីធំដុំហ្នឹងគេទេ ។ ឯការដែលអ្នកកាសែតមួយ ចំនួនផ្សាយនោះ គឺ លោកសូមបដិសេដច្រានចោលទាំងស្រុង គឺពុំមែនជាការពិតទេ ។
លោកឧត្តមសេនីយ៍ត្រីបានស្នើអោយអ្នកកាសែតយើងត្រូវពិចារណា និងរកប្រភពព័ត៌មាន ភស្តុតាង ជាក់លាក់មុនហ្នឹងសម្រេចចុះផ្សាយព័ត៌មានអ្វីមួយ ពិសេសព័ត៌មានប៉ះពាល់កិត្តិយស បុគ្គលសាធាណៈ ដើម្បីចៀងវាងការប្តឹងផ្តល់តាមផ្លូវច្បាប់ ។
ដោយឡែក ពាក់ព័ន្ធនឹងការចុះផ្សាយចេតនាមួលបង្កាច់បង្ខូចកិត្តិយស លោកឧត្តមសេនីយ៍ ត្រីបញ្ជាក់ថា លោកមិនធ្វើការប្តឹងផ្តល់ចង់ឈ្នះ ចង់ចាញ់អីនោះទេ ព្រោះការងារអ្នកកាសែតគ្នាគ្មានធនធានអីច្រើន សំរាប់បង់សំណងរដ្ឋប្បវេណី ពីបទបរិហារកេរ្ត៍ តាមផ្លូវតុលា ការដែរ ៕
ដោយ ៖ រុន សារ៉េត 077 79 79 52 | 088 7797952
Whatsapp 012 580 455
