(កែប) ៖ ការដង្ហែក្បួននៃការបិទយុទ្ធនាការឃោសនាបោះឆ្នោត នៅព្រឹកថ្ងៃទី២៧ខែកក្កដា ឆ្នាំ២០១៨នេះ គណបក្សប្រជាជនកម្ពុជាខេត្តកែប បានធ្វើពិធីដង្ហៃក្បួនក្នុងទ្រង់ទ្រាយធំ ដែលមានសមាជិក សមាជិកានិងប្រជាពលរដ្ឋចូលរួមប្រមាណ១៥.០០០នាក់ មានរថយន្តនិងម៉ូតូដង្ហែរាប់ពាន់គ្រឿង ដោយក្បួនដង្ហែនេះដឹកនាំដោយ ឯកឧត្តម កិតិ្តសេដ្ឋាបណ្ឌិត ចម ប្រសិទ្ធ ប្រធានក្រុមការងារថ្នាក់កណ្តាលគណបក្សប្រជាជនកម្ពុជាចុះជួយខេត្តកែប លោកកែន សត្ថា ប្រធានគណៈកម្មាធិការគណបក្សប្រជាជនកម្ពុជាខេត្តកែប លោក ងួន ប៊ៀន អ្នកតំណាងរាស្ត្រមណ្ឌលខេត្តកែប ព្រមទាំងថ្នាក់ដឹកនាំក្នុងជួរគណបក្សប្រជាជនកម្ពុជា ជាច្រើនរូប ព្រមទាំងសមាជិក សមាជិកា និងអ្នកគាំទ្រយ៉ាងច្រើនកុះករមកពីគ្រប់ទិសទីក្នុងភូមិសាស្ត្រខេត្តកែប។
ជាមួយនឹងការរៀបចំក្បួនដង្ហែនេះ សមាជិក សមាជិកា និងអ្នកគាំទ្រគណបក្សបានមកជួបជុំគ្នានៅឯពហុកីឡដ្ឋានខេត្តកែប ដើម្បីស្តាប់នូវប្រសាសន៍បិទយុទ្ធនាការបោះឆ្នោត របស់សម្តេច ហ៊ុន សែន ប្រធានគណបក្សប្រជាជនកម្ពុជា ដែលបានផ្សាយផ្ទាល់តាមរយៈទូរទស្សន៍ ទើបសមាជិក សមាជិកា និងអ្នកគាំទ្រធ្វើពិធីដង្ហែក្បួនរួមគ្នាមួយជុំឆ្ពោះទៅកាន់ផ្សារដំណាក់ចង្អើរ រួចបន្តទៅកាន់មូលដ្ឋានរៀងៗខ្លួនតែម្តង។
ក្នុងថ្ងៃបញ្ចប់នៃការឃោសនាបោះឆ្នោតនៅព្រឹកថ្ងៃទី២៧ខែកក្កដា ឆ្នាំ២០១៨នេះ គេបានកត់សម្គាល់ឃើញ ក្នុងពិធីដង្ហែក្បួន ហាក់មានភាពអធិកអធមជាងថ្ងៃឃោសនាដំបូង ដោយមានមនុស្សចូលរួមប្រមាណជាង១៥.០០០នាក់ រថយន្តនិងម៉ូតូរាប់ពាន់គ្រឿង ដោយបានដង្ហែជាក្បួនក្នុងរូបភាពទ្រង់ទ្រាយធំ ធ្វើដំណើរឆ្លងកាត់តាមដងផ្លូវលេខ៣៣Aនិងផ្លូវជាតិលេខ៣៣ ឆ្ពោះទៅកាន់ ក្រុង ស្រុក ឃុំ សង្កាត់ និងតាមមូលដ្ឋាននានា ដោយមានរបៀបរៀបរយ អមដោយសម្រែកជ័យឃោសនិងក្តីសប្បាយរីករាយយ៉ាងក្រៃលែង។
ចំណែកនៅតាមលំនៅឋាននានាប្រជាពលរដ្ឋក៏បានឈរទទួលអបអរដៃកាន់ទង់បក្សក្រវីចុះឡើង សំដែងការស្វាគមន៍យ៉ាងកក់ក្តៅ និងគាំទ្រយ៉ាងពេញទំហឹងផងដែរ។
ប្រជាពលរដ្ឋដែលចូលរួមអបអរក្បួនដង្ហែគណបក្សប្រជាជនព្រឹកនេះ ពិតជាសង្ឃឹមជឿជាក់ថា គណបក្សប្រជាជនកម្ពុជា នឹងទទួលបានជ័យជម្នះនៃការបោះឆ្នោតជ្រើសតាំងតំណាងរាស្ត្រនីតិកាលទី៦ ដែលនឹងប្រព្រឹត្តទៅនៅថ្ងៃទី២៩ខែកក្កដា ឆ្នាំ២០១៨នេះ ហើយប្រជាពលរដ្ឋនឹងចូលរួមទៅបោះឆ្នោតជូនគណបក្សប្រជាជនកម្ពុជាទាំងអស់គ្នា ដើម្បីគាំទ្រសម្តេចតេជោ ហ៊ុន សែន ដឹកនាំនាវាកម្ពុជាបន្តទៀត។ប្រជាពលរដ្ឋយល់ថា មានតែគណបក្សប្រជាជនកម្ពុជាតែមួយគត់ ដែលដឹកនាំប្រទេសមានការរីចម្រើន មានសុខសន្តិភាព និងការអភិវឌ្ឍន៍ជាបន្តបន្ទាប់។
ដូច្នេះក្នុងនាមជាពលរដ្ឋគ្រប់រូបសូមគាំទ្រដ៏ពេញទំហឹង និងបោះឆ្នោតជូនគណបក្សប្រជាជនកម្ពុជា ដើម្បីជ្រើសរើសបេក្ខភាពឲ្យសម្តេច ហ៊ុន សែន ដឹកនាំប្រទេសឲ្យកាន់តែមានការរីកចម្រើនបន្ថែមទៀត។បោះឆ្នោតជូនគណបក្សប្រជាជនកម្ពុជា គឺបាននាំមកនូវសុខសន្តិភាព និងការអភិវឌ្ឃន៍៕
សេង ណារិទ្ធ
