(កំពត)៖ នៅព្រឹកថ្ងៃទី២៧ ខែកក្កដា ឆ្នាំ២០១៨ នេះ គណបក្សប្រជាជនកម្ពុជាខេត្តកំពត បានរៀបចំពិធីដង្ហែក្បួនបញ្ចប់ឃោសនាបោះឆ្នោតរបស់ខ្លួន ដែលជួបជុំសមាជិក សមាជិកា ប្រមាណ១៣.០០០នាក់មកជួបជុំគ្នានៅរង្វង់មូលទុរេនខេត្តកំពត។ក្នុងកម្មវិធីដ៏មហោឡារឹកនាថ្ងៃធ្វើពិធីដង្ហែក្បួនបិទការឃោសនាបោះឆ្នោតរបស់គណបក្សប្រជាជនកម្ពុជាខេត្តកំពតនាព្រឹកនេះ ក្រោមវត្តមានចូលរួមជាអធិបតី លោក បណ្ឌិតប៉ែន ស៊ីម៉ន អនុប្រធានក្រុមការងារថ្នាក់ជាតិចុះពង្រឹងខេត្តកំពត លោក ជាវ តាយ សមាជិកកណ្តាលគណៈកម្មាធិការបក្សប្រជាជនកម្ពុជានិងជាប្រធានគណៈកម្មាធិការបក្សប្រជាជនកម្ពុជាខេត្តកំពត និងមានការអញ្ជើញចូលរួម ពីលោក លោកស្រី ជាសមាជិកក្រុមការងារថ្នាក់ជាតិចុះជួយខេត្តកំពតជាច្រើនរូបទៀត។
ជាមួយគ្នានេះដែរនៅក្នុងពិធីដង្ហែក្បួនបញ្ចប់ឃោសនាបោះឆ្នោតរបស់គណបក្សប្រជាជនកម្ពុជាខេត្តកំពតនាថ្ងៃនេះផងដែរក៏មានវត្តមានចូលរួមពីថ្នាក់ដឹកនាំបក្សមូលដ្ឋាននិងសមាជិកសមាជិការបក្សតាមមូលដ្ឋានមកចូលរួមផងដែរ។
របៀបវីរៈក្នុងកម្មវិធីនាព្រឹកបញ្ចប់ការឃោសនាបោះឆ្នោត បន្ទាប់ពីសមាជិកសមាជិកាបក្សមកជួបជុំគ្នានៅក្នុងរង្វង់មូលទុរេនរួចមក អង្គពិធីទាំងមូលបានស្តាប់សេចក្តីថ្លែងការណ៍នៃការបិទឃោសនាបោះឆ្នោតរបស់ សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា ថ្លែងអំពីគោលនយោបាយរបស់គណបក្សប្រជាជន នៅពេលគណបក្សប្រជាជនជាប់ឆ្នោត ហើយសម្តេចនិងត្រូវបានតែងតាំងជានាយករដ្ឋមន្ត្រីអាណត្តិទី៦នេះ ជូនជនរួមជាតិយ៉ាងមានអត្ថន័យដ៏ជ្រាលជ្រៅ តាំងពីការតម្លើងប្រាក់បៀវត្សមន្ត្រីរាជការ កម្មកររោចក្រ គ្រូបង្រៀន ការគិតគូសេវាព្យាបាលដល់ស្ត្រីដែលបានសម្រាលកូននៅមូលដ្ឋាន និងមានគោលនយោបាយដែលត្រូវដោះស្រាយ
ជូនប្រជាពលរដ្ឋនិងមន្ត្រីរាជការកងកម្លាំងប្រដាប់អាវុធជាច្រើនករណីថែមទៀតនៅក្នុងការដឹកនាំរាជរដ្ឋាភិបាលអាណត្តិទី៦(២០១៨-២០២៣) នេះ។
បន្ទាប់ពីស្តាប់សេចក្តីថ្លែងការរបស់សម្តេចប្រធានគណបក្សប្រជាជនរួចមក លោកបណ្ឌិត ប៉ែន ស៊ីម៉ន ប្រធានអង្គពិធីបានថ្លែងសម្រែកជ័យឃោស រួចហើយអង្គពិធីទាំងមូលបានចាប់ផ្តើមរៀបចំក្បួនដង្ហែរ ចេញពីរង្វង់មូលទុរេនខេត្តតាមបណ្តោយផ្លូវជាតិលេខ៣ឆ្លងកាត់ស្រុកឈូក និងស្រុកជុំគិរី ទើបបន្តឆ្ពោះទៅផ្លូវបំបែកគុស រួចឆ្លងកាត់តាមផ្លូវជាតិលេខ៣១ឆ្លងកាត់ស្រុកអង្គរជ័យ បន្ទាយមាស់ ស្រុកកំពង់ត្រាច ស្រុកដងទង់ និងស្រុកទឹកឈូ ទើបក្បួនឆ្ពោះទៅរង្វង់មូលទុរេន ហើយក្បួនដង្ហែក៏វិលទៅកាន់ភូមិសាស្ត្ររៀងៗខ្លួនវិញដើម្បីបញ្ចប់ការឃោសនានៅថ្ងៃទី២៧ខែកក្កដា ឆ្នាំ២០១៨នេះ៕
សេង ណារិទ្ធ
