ខេត្តកំពង់ឆ្នាំង ៖ ឯកឧត្តមសន វីអនុប្រធានក្រុមការងារថ្នាក់កណ្តាលចុះជួយស្រុកកំពង់លែង ទទួលបន្ទុកឃុំត្រងិល តំណាងឯកឧត្តម ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ និងជាប្រធានក្រុមការងារថ្នាក់កណ្តាលចុះជួយស្រុកទឹកផុស និងស្រុកកំពង់លែងព្រមទាំងសមាជិកសមាជិកា និងក្រុមការងារជាច្រើនរូបទៀតនៅថៃ្ងព្រហស្បតិ៏១៤កើតខែទុតិយាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងព្រឹកថ្ងៃទី២៦ ខែកក្កដា ឆ្នាំ២០១៨នេះ បានប្រគេនទានវស្សា និងទយ្យទានដល់ព្រះសង្ឃគង់ចាំព្រះវស្សាចំនួន៥វត្ត ស្ថិតក្នុងឃុំត្រងិល ស្រុកកំពង់លែង ខេត្តកំពង់ឆ្នាំង។
ឯកឧត្តម សនវីបានលើកឡើងថា ដោយមានការយកចិត្តទុកដាក់ និងការប្រតិបត្តិ យ៉ាងខ្ជាប់ខ្ជួន ចំពោះព្រះពុទ្ធសាសនា ក្នុងការធ្វើបុណ្យធ្វើទានសម្រាប់ ឱកាសបុណ្យចូល ព្រះវស្សា ដែលនឹងឈានចូលជិតមកដល់នាពេលខាងមុខនេះ ឯកឧត្តមរួមទាំងក្រុមការងារបាននាំយកទានព្រះវស្សា ទេយ្យទាន និងបច្ច័យមកប្រគេនព្រះសង្ឃនៅវត្តទាំង៥ ក្នុងស្រុកកំពង់លែងនាពេលនេះ សំដៅលើកស្ទួយផ្នែកព្រះពុទ្ធសាសនា សម្រាប់ជាទីសក្ការៈបូជា។
ឯកឧត្តមបានបញ្ជាក់ថា រៀងរាល់រដូវកាលនៃពិធីបុណ្យព្រះពុទ្ធសាសនា ដូចជាការហែទៀនព្រះវស្សាបុណ្យភ្ជុំបិណ្ឌ ឬបុណ្យផ្សេងទៀត ក្រុមការងាររបស់រាជរដ្ឋាភិបាលកម្ពុជា តែងតែ មកចូលរួមជាមួយពុទ្ធបរិស័ទជានិច្ច។ឯកឧត្តមបានបន្ថែមថា រាជរដ្ឋាភិបាលបច្ចុប្បន្នក្រោមការដឹកនាំប្រកបទៅដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន បាន និងកំពុងដឹកនាំការពារ និងអភិវឌ្ឍន៍ប្រទេស និងប្រជាពលរដ្ឋឱ្យមានការរីកចម្រើនប្រកបដោយសុខសន្តិភាព។
ឯកឧត្តមបានសម្តែងការកោតសរសើរ និងវាយតម្លៃខ្ពស់ចំពោះព្រះគ្រូចៅ អធិការវត្តទាំង៥ និងគណៈកម្មការអាចារ្យវត្ត ពុទ្ធបរិស័ទទាំងអស់ ដែលបានខិតខំចូលរួមចំណែកថែរក្សា និងប្រតិបត្តិតាមគន្លងព្រះពុទ្ធសាសនា ព្រមទាំងបានចូលរួមអភិវឌ្ឍន៍ហេដ្ឋារចនាសម្ព័ន្ធជាច្រើននៅតាមវត្តអារាម ធ្វើឱ្យមានការរីកចម្រើន ស័ក្តិសមជាទីគោរពសក្ការៈចំពោះប្រជាពលរដ្ឋទូទៅ ។
ការខិតខំរបស់ប្រជាពុទ្ធបរិស័ទទាំងអស់នេះហើយ គឺជាការចូលរួមចំណែកយ៉ាងសំខាន់ជាមួយរាជរដ្ឋាភិបាលកម្ពុជាក្នុងការអភិវឌ្ឍ វិស័យព្រះពុទ្ធសាសនានៅកម្ពុជាឱ្យរីកចម្រើនជាលំដាប់។ឯកឧត្ដមសនវី បានណែនាំដល់ប្រជាពលរដ្ឋ ត្រូវថែរក្សា និងការពារឱ្យបានគង់វង្ស នូវសុខ សន្តិភាព ហើយចាំបាច់ត្រូវពឹងផ្អែក និងមានការចូលរួមពីប្រជាពលរដ្ឋទូទៅ ដែលការចូលរួម នេះពុំចាំបាច់ចំណាយអ្វីទាំងអស់ គឺគ្រាន់តែបន្តគាំទ្រ រាជរដ្ឋាភិបាលកម្ពុជាបច្ចុប្បន្ននេះ ដែល មានសមត្ថភាពគ្រប់គ្រាន់ក្នុងការដឹកនាំប្រទេស អភិវឌ្ឍន៍ប្រទេស ឱ្យមានការរីកចម្រើន ថ្កុំថ្កើនជាបន្តទៀត។ឯកឧត្តម ក៏បានអំពាវនាវឱ្យប្រជាពលរដ្ឋដែលគ្រប់អាយុបោះឆ្នោត និង មានឈ្មោះក្នុងបញ្ជីបោះឆ្នោត សូមទៅបោះឆ្នោតជ្រើសតាំងតំណាងរាស្ត្រ នីតិកាលទី៦ នាថ្ងៃទី២៩ ខែកក្កដា ឆ្នាំ២០១៨ ខាងមុខនេះ ឱ្យបានគ្រប់ៗគ្នា ។
ឯកឧត្ដម សនវីនិងក្រុមការងារទាំងអស់បានអញ្ជើញប្រគេន គ្រឿងបរិក្ខារ និងទៀនព្រះវស្សាដល់វត្តចំនួន៥ និងទេយ្យវត្ថុ ប្រគេនព្រះសង្ឃ ដែលគង់ចាំព្រះវស្សាក្នុងវត្ត ដោយក្នុងមួយវត្តៗមានវត្តទាំង៥រួមមាន ៖ វត្តគិរីអណ្តែត វត្តគិរីរ្មសី វត្តគិរីសុវណ្ណ វត្តមានគុណ និងវត្តគិរីរតនារាម ដោយក្នុងមួយវត្តទទួលបានបច្ច័យកសាងចំនួន ៦៥០,០០០រៀល, ទានព្រះវស្សា១គូ, អង្ករ១បាវ, ត្រីកំប៉ុង១យួរ, មី១កេស, តែកញ្ចប់ធំ១កញ្ចប់, ស្ករស២គីឡូក្រាម, ទឹកដោះគោ៦កំប៉ុង,ទឹកស៊ីអ៊ីវ១យួរ, ទឹកត្រី១យួរ, ទឹក្រូច២កេស និងទឹកបរិសុទ្ធ២កេស។ ចំណែកព្រះសង្ឃចំនួន១០អង្គ ដោយក្នុងមួយអង្គទទួលបានស្លាដក១ និងបច្ច័យចំនួន១ម៉ឺនរៀល៕
