ប្រធានក្លិបអ្នកកាសែតឯករាជ្យបានត្រូវជនមិនស្គាល់មុខគំរាមសម្លាប់ជាច្រើនលើក ក្រោមរូបភាពល្បិច«រលកអត់ខ្យល់» ដូចជាបង្កទំនាស់កន្លែងហូបចុកគ្រោះថ្នាក់ចរាចរណ៏..ជាដើម ។ បន្ទាប់ពីលោកចុះប្រមូលព័ត៌មានឲ្យសមាជិកក្លិប ផ្សាយពីសកម្មភាពបុគ្គលអ្នកមានអំណាចប្រើគ្រឿងចក្រកាយទន្ទ្រានយកដីភ្នំក្នុងតំបន់ឧទ្យានជាតិរបស់រដ្ឋធើ្វជាកម្មសិទ្ធិផ្ទាល់ខ្លួន។
ការដំអូញដំអែលប៉ុនប៉ងធើ្វឃាតរបស់លោកហ៊ុនសុខាបែបនេះនៅក្នុងសារហ្វេសប៊ុកជាផ្លូវការរបស់លោកនៅថៃ្ងនេះ។គួររំលឹកផងដែរថាសមាជិកក្លិបអ្នកកាសែតឯករាជ្យជាច្រើនអង្គភាពបានចុះផ្សាយជាបន្តបន្ទាប់ពីសកម្មភាពយកគ្រឿងចក្រចូលជីកកកាយឈូសឆាយទន្ទ្រានយកដីភ្នំក្នុងតំបន់ឧទ្យានជាតិព្រះមុនីវង្ស-បូកគោនៅខាងត្បូងវត្តព្រះពុទ្ធជយមង្គលារាម ហៅ (វត្តវាលពួច) ស្ថិតក្នុងឃុំបឹងទូក ស្រុកទឹកឈូ ខេត្តកំពត។
បើតាមប្រភពដដែលឲ្យដឹងថាជាដីស្ថិតក្នុងតំបន់អភិរក្ស ឧទ្យានជាតិព្រះមុនីវង្ស-បូកគោ ហើយត្រូវបានហាមឃាត់មិនឱ្យបុគ្គលណាម្នាក់ចូលមកទន្ទ្រានយកធ្វើជាកម្មសិទ្ធិនោះទេ។
ប្រភពបានបង្ហើបប្រាប់ឱ្យដឹងទៀតថា គ្រឿងចក្រឈូសឆាយដីភ្នំក្នុងតំបន់អភិរក្សឧទ្យានជាតិព្រះមុនីវង្ស-បូកគោស្ថិតក្នុងភូមិសាស្ត្រទឹកដីឃុំបឹងទូក ស្រុកទឹកឈូ ខេត្តកំពតត្រូវបានគេស្គាល់ថាជារបស់លោក ឈុន សារឿន មន្ត្រីកងរាជអាវុធហត្ថខេត្តកំពត។ ដែលសកម្មភាពនេះបានធ្វើឱ្យប្រជាពលរដ្ឋក្នុងមូលដ្ឋានបានសម្តែងការមិនពេញចិត្តចំពោះទង្វើរបស់ លោក ឈុន សារឿន ព្រមទាំងបានរិះគន់យ៉ាងខ្លាំងចំពោះករណីទន្ទ្រានជីកកកាយដីភ្នំក្នុងតំបន់ឧទ្យានជាតិព្រះមុនីវង្ស-បូកគោនេះ។
ទាក់ទិននឹងបញ្ហានេះដែរ លោក ឈុន សារឿន មន្ត្រីកងរាជអាវុធហត្ថខេត្តកំពត បានឱ្យដឹងតាមទូរស័ព្ទថា នេះជាដីរបស់លោកអាស្រ័យផលយូរមកហើយគឺមុនការអភិរក្សតំបន់ឧទ្យានជាតិព្រះមុនីវង្ស-បូកគោទៅទៀត។ ហើយដីនេះបានដាំស្វាយជាច្រើន តែដោយសារគ្មានផ្លូវឆ្លងកាត់ទើបលោកស្នើសុំកាយធ្វើផ្លូវឆ្លងកាត់តែម្តង និងបានចាប់ផ្តើមធ្វើតាំងពីខែប្រាំងរហូតមកទល់ពេលនេះគឺគ្រឿងចក្របានខូចទើបទុកនៅទីនេះ។ លោក ឈុន សារឿន ក៏បានបញ្ជាក់ទៀតថា “គ្មានអ្នកណាអនុញ្ញាតទេ ដោយសារតែមនោសញ្ចេតនាទើបគេចេះតែបណ្តោយឱ្យលោកធ្វើទៅ។
ចំណែកលោក នាក់ សុវណ្ណារី អភិបាលនៃគណៈអភិបាលស្រុកទឹកឈូ បានឱ្យដឹងតាមទូរស័ព្ទថា ករណីនេះលោកមិនទាន់បានដឹងនោះទេ។ ដោយសារតែលោករវល់ដោះស្រាយបញ្ហាគ្រោះទឹកជំនន់ ហើយកន្លងមកក៏ធ្លាប់មានបញ្ហានេះផងដែរជាមួយក្រុមហ៊ុន សុខា តែធ្លាប់ធ្វើការដោះស្រាយរួចរាល់ហើយដែរ។ ចំពោះបុគ្គលឈ្មោះ ឈុន សារឿន មន្ត្រីកងរាជអាវុធហត្ថខេត្តកំពតនេះលោកមិនដែលស្គាល់នោះទេ។លោក ស៊ុយ ធា ប្រធានមន្ទីរបរិស្ថានខេត្តកំពត បានឱ្យដឹងតាមទូរស័ព្ទថា “គេបំភ្លឺអស់ហើយម៉េចចាំសួរមកខ្ញុំទៀត” រួចលោកក៏បិទទូរស័ព្ទតែម្តងទៅ។
លោក សោម វិចិត្រ ប្រធានមន្ទីររ៉ែ និងថាមពលខេត្តកំពត បានឱ្យដឹងតាមទូរស័ព្ទថា លោកមិនទាន់បានដឹងរឿងនេះទេ ។ ដូច្នេះលោកនឹងឱ្យមន្ត្រីក្រោមឱវាទចុះត្រួតពិនិត្យរឿងនេះ។
លោកជាវ តាយ អភិបាលនៃគណៈអភិបាលខេត្តកំពត បានឱ្យសារពត៌មានដឹងតាមទូរស័ព្ទនាល្ងាចថ្ងៃព្រហស្បតិ៍ ទី១៩ ខែកក្កដា នេះថា “ពាក់ព័ន្ធរឿងហ្នឹង! ខ្ញុំប្រាប់ហើយថាអាជ្ញាធរទាំងអស់ឱ្យទប់ស្កាត់ហើយបិទសិនអត់មានធ្វើសកម្មភាពអីទេ អ្នកមានអាជ្ញាបណ្ណពីក្រសួងអាហ្នឹង!យើងនឹងត្រួតពិនិត្យឡើងវិញ អ្នកមានអាជ្ញាប័ណ្ណនៅក្នុងខេត្តគឺយើងលុបចោលមិនឱ្យដំណើរការទេ ទីបីយើងនឹងមានវិធានការអញ្ជើញអ្នកដែលរំលោភភ្នំរំលោភអីហ្នឹង!យកមកធ្វើកិច្ចសន្យាដើម្បីចាត់ការតាមវិធានការច្បាប់”។
បើទោះបីជាមានវិធានការទប់ស្កាត់ និងបង្ក្រាបរបស់អាជ្ញាធរខេត្តយ៉ាងណាក៏ដោយក៏សកម្មភាពលួចកាយទន្ទ្រានយកដីព្រៃភ្នំក្នុងតំបន់ឧទ្យានជាតិព្រះមុនីវង្ស-បូកគោរបស់រដ្ឋនៅតែកើតមានជាបន្តបន្ទាប់ដោយបុគ្គលអ្នកមានអំណាចនៅប្រព្រឹត្តយ៉ាងគឃ្លើនធ្វើតាមអំពើចិត្តឥតក្រែងច្បាប់ទន្ទ្រានយកដីព្រៃភ្នំរបស់រដ្ឋធ្វើជាកម្មសិទ្ធិយ៉ាងកម្រោល៕
