(កំពត)៖ នៅព្រឹកថ្ងៃទី២៤ ខែកក្កដា ឆ្នាំ ២០១៨នេះ លោកជាវ តាយ ប្រធានគណៈកម្មាធិការគណបក្សប្រជាជនកម្ពុជាខេត្តកំពត បានធ្វើយុទ្ធនាការរកសម្លេងគាំទ្រ និងជួបសំណេះសំណាលជាមួយសមាជិក សមាជិកា គណបក្សប្រជាជនកម្ពុជា ស្រុកអង្គរជ័យ ដែលមានសមាជិក សមាជិកាបក្ស ចូលរួមប្រមាណ២.៨០០នាក់ដែលបានប្រព្រឹត្តឡើង នៅក្នុងបរិវេណវត្តភ្នំបុណ្យ ភូមិដានគោម ឃុំដានគោម ស្រុកអង្គរជ័យ ខេត្តកំពត ។ ពិធីនេះក៏មានវត្តមានចូលរួមពីសំណាក់ លោក-លោកស្រីជាសមាជិកគណបក្សប្រជាជនថ្នាក់ខេត្ត ថ្នាក់ស្រុកនិងថ្នាក់មូលដ្ឋានផងដែរ។
មានប្រសាសន៍សំណេះសំណាលនាឱកាសនោះ លោកជាវ តាយ បាននាំមកនូវការផ្ដាំផ្ញើសួរសុខទុក្ខពីសំណាក់សម្ដេចតេជោ ហ៊ុន សែន ប្រធានគណបក្សប្រជាជនកម្ពុជាជូនចំពោះសមាជិក សមាជិកា ក៏ដូចជាថ្នាក់ដឹកនាំគ្រប់លំដាប់ថ្នាក់ ពិសេសសមាជិក សមាជិកា គណបក្សប្រជាជនកម្ពុជាទាំងអស់ដែលបានមកចូលរួមនាពេលនេះ។លោក ក៏បានថ្លែងនូវការកោតសរសើរចំពោះការខិតខំយកចិត្តទុកដាក់កសាងនូវអំពើល្អរបស់ក្រុមការងារគណបក្សក៏ដូចជាសមាជិកសមាជិកា ពិសេសបានចូលរួមកសាងនូវសមិទ្ធិផលនានានៅក្នុងមូលដ្ឋានមានការរីកចម្រើនឆ្លើយតបបម្រើបាននូវតម្រូវការចាំបាច់របស់ប្រជាពលរដ្ឋបានយ៉ាងល្អប្រសើរ។
លោក ជាវ តាយ ក៏បានបន្តលើកឡើងថា៖មានតែគណបក្ស ប្រជាជនតែមួយគត់ ដែលធ្វើឲ្យប្រទេសជាតិ មានសុខសន្តិភាព ការអភិវឌ្ឍន៍និងបម្រើប្រជាពលរដ្ឋនៅជាប់ជាមួយប្រជាពលរដ្ឋ និងជាគណបក្សដែលជួយសង្គ្រោះប្រជាជន សង្គមជាតិពីសង្គ្រាមពីរបបប្រល័យពូជសាសន៍ និងរហូតមកដល់សព្វថ្ងៃនេះសន្តិភាពសុវត្ថិភាព សណ្ដាប់ធ្នាប់សង្គម សេរីភាព ប្រជាធិបតេយ្យមានពេញបរិបូរណ៌លើផ្ទៃប្រទេស ជាមួយនឹងការអភិវឌ្ឍន៍លើគ្រប់វិស័យ ទាំងពុទ្ធចក្រ ទាំងអាណាចក្រ។
ប្រជាពលរដ្ឋរស់នៅក្នុងភាពសុខសាន្ត ជីវភាពក៏មានការរីកចម្រើនសម្បូរសប្បាយចាប់ពីទីក្រុងរហូតដល់ទីជនបទ។ទាំងនេះគឺបានកើតចេញពីការដឹកនាំប្រកបដោយគតិបណ្ឌិតឈ្លាសវៃដើរលើផ្លូវត្រូវរបស់ថ្នាក់ដឹកនាំនៃរាជរដ្ឋាភិបាល ដែលមានសម្ដេចតេជោហ៊ុនសែនជាប្រមុខ ព្រមទាំងមានការចូលរួមពីប្រជាពលរដ្ឋយើងទាំងអស់គ្នា ហើយសមិទ្ធិផលទាំងនេះគឺយើងបានមកពីញើសឈាមទៅប្ដូរ។
ដូច្នេះយើងទាំងអស់គ្នាត្រូវតែបន្តចូលរួមកសាងនូវអំពើល្អបម្រើជូនប្រជាពលរដ្ឋនិងថែរក្សាសន្តិភាពឲ្យនៅគង់វង្សដើម្បីធ្វើដំណើររួមគ្នាកសាងនិងអភិវឌ្ឍន៍ប្រទេសជាតិសម្រាប់អនាគតយើងកូនចៅយើងទាំងអស់គ្នាកាន់តែមានជីវភាពធូរធាររីកចម្រើនទៅមុខបន្តទៀត។ជាពិសេសសំដៅបង្កើនការគាំទ្រនិងមានជំនឿជឿជាក់ពីសំណាក់ប្រជាពលរដ្ឋមកលើការដឹកនាំរបស់គណបក្សប្រជាជនឲ្យបានកាន់តែច្រើនឡើងៗនិងឈានទៅទទួលបានជ័យជម្នះចំពោះលទ្ធផលនៃការបោះឆ្នោតជ្រើសតាំងតំណាងរាស្ត្រនីតិកាលទី៦ឆ្នាំ២០១៨ខាងមុខនេះ។
ក្នុងឱកាសនោះដែរ លោក ជាវ តាយ ក៏បានសំណូមពរដល់សមាជិក សមាជិកា និងប្រជាពលរដ្ឋត្រូវចូលរួមអញ្ជើញទៅបោះឆ្នោត នៅថ្ងៃទី២៩ខែកក្កដា ឆ្នាំ២០១៨ទាំងអស់គ្នា គឺបោះឆ្នោតជូនគណបក្សប្រជាជនកម្ពុជា ដែលមានលេខរៀងទី២០មានរូបទេវតាបាចផ្កាជាសម្គាល់ ដើម្បីគាំទ្រដល់ សម្តេចតេជោ ហ៊ុន សែន ដឹកនាំប្រទេសមានការអភិវឌ្ឍន៍ និងរីកចម្រើនបន្ថែមទៀត។បោះឆ្នោតជូនគណបក្សប្រជាជនកម្ពុជា ដូចបោះឆ្នោតឲ្យខ្លួនឯង។បោះឆ្នោតជូនគណបក្សប្រជាជនកម្ពុជា គឺជួយរក្សាបាននូវសុខ សន្តិភាព និងស្ថេរភាព ជូនជាតិជាតិមាតុភូមិរបស់យើងបន្តទៀត៕
សេង ណារិទ្ធ
