(កំពង់ឆ្នាំង)៖ ការប្រកួតកីឡាបាល់ទាត់មិត្តភាពពាន រង្វាន់ លោក ត្រាំ អ៉ីវតឹក បានប្រារព្ធធ្វើនៅថ្ងៃទី ១៤ ខែកក្កដា ឆ្នាំ២០១៨ ក្រោមអធិបតីភាព លោក ត្រាំ អ៉ីវតឹក សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារថ្នាក់កណ្តាលចុះជួយស្រុកទឹកផុស និងស្រុកកំពង់លែង ដោយមានការចូលរួមពី លោក លោកស្រីជាក្រុមការងារថ្នាក់កណ្តាល ថ្នាក់ខេត្ត ថ្នាក់ស្រុក ថ្នាក់ឃុំ និងសមាជិក សមាជិកា គណបក្សប្រជាជន នៅក្នុងស្រុកកំពង់លែង ខេត្តកំពង់ឆ្នាំងយ៉ាងច្រើនកុះករ។
លោកបានមានប្រសាសន៍ថា ការប្រកួតកីឡា បាល់ទាត់មិត្តភាពនេះ បង្កើតឡើងក្នុងន័យរឹតចំណងជាមួយនឹងក្រសួងប្រៃសណីយ៍ និងទូរគមនាគមន៍ ដែលការប្រកួតកីឡាបាល់ទាត់នាថ្ងៃនេះមានរហូតទៅដល់៤ក្រុម ក្នុងនោះ ស្រុកកំពង់លែង ឃុំដារ១ក្រុម និង ឃុំកំពង់ហៅ១ក្រុម និងខាងក្រសួងប.ទរួមមានសហគ្រាសទូរគមនាគមន៍កម្ពុជា ១ក្រុម និងសហគ្រាសប្រៃសណីយ៍កម្ពុជា ១ក្រុម ហើយការប្រកួតនេះ ធ្វើឡើងជាលក្ខណៈមិត្តភាព ដើម្បីបង្ហាញនូវស្នាដៃ ហើយក្នុងគោលបំណងលើកតម្កើងនូវវិស័យកីឡា និងដើម្បីជម្រុញឲ្យប្អូនៗយុវជននៅក្នុងស្រុកកំពង់លែង កាន់តែខិតខំខាងវិស័យកីឡាបាល់ទាត់នេះបន្តទៅមុខទៀត។
លោល ត្រាំ អ៉ីវវតឹក បានមានប្រសាសន៍បន្តថាការលេងកីឡាអាចជួយឲ្យយើង មានសុខភាពល្អ មានសាមគ្គីភាព មិត្តភាព ជៀសឆ្ងាយពីគ្រឿង ញៀនដើម្បីចូលរួមចំណែកគាំទ្រគោលនយោបាយលើកកម្ពស់វិស័យកីឡារបស់គណបក្សប្រជាជន ដែលមានសម្ដេចតេជោនាយករដ្ឋមន្ត្រី ហ៊ុន សែន ជាប្រមុខដឹកនាំ។
នៅក្នុងឱកាសនេះដែរ លោក ត្រាំ អ៉ីវតឹក ក៏បានអញ្ជើញប្រគល់ពានរង្វាន់បាល់ទាត់មិត្តភាពដល់ក្រុមកីឡាករ ដែលទទួលបានជ័យលាភីផងដែរ៕
