បាត់ដំបង ៖ កាលពីថ្ងៃទី២៤ ខែវិច្ឆិកា ឆ្នាំ២០១៤ សង្កាត់អូរចា ក្រុងបាត់ដំបង កម្លាំងនគរបាលចរាចរណ៍ផ្លូវគោក ចុះពិនិត្យគោលដៅដើមទី តាមបេនរថយន្តក្រុង ដឹកអ្នកដំណើរ មើលកង់រថយន្ត ឈៀក ប័ណ្ណបើកបរ និងពិនិត្យជាតិ អាល់កុល ដើម្បីកាត់ បន្ថយគ្រោះថ្នាក់ចរាចរណ៍ ។
លោក សាត គឹមសាន ប្រធានការិយាល័យចរាចរណ៍ផ្លូវគោក ខេត្តបាត់ដំបង បានអោយដឹងថា ករណីគ្រោះថ្នាក់ចរាចរណ៍ កាលពីឆ្នាំ២០១៣ មានចំនួន ៣៣២ លើក បង្កអោយមនុស្សស្លាប់ចំនួន ៨៣ នាក់ ។ គ្រោះថ្នាក់ចរាចរណ៍ នៅឆ្នាំ២០១៤ មានចំនួន ២៧០ លើក ថយចុះចំនួន ៦២ លើក ប៉ុន្តែបង្កអោយមនុស្សស្លាប់ចំនួន ១២៩ នាក់ កើនជាងឆ្នាំមុន ។
លោក សាត គឹមសាន បានបញ្ជាក់ថា ករណីគ្រោះថា្នក់ចរាចរណ៍នេះ បង្កមកពីកត្តាមនុស្ស ដោយអ្នកបើកបរយានយន្តមានជាតិអាល់កុល មិនមានប័ណ្ណបើក (មិនបានចូលសាលាបើកបរ) និងកត្តាយានយន្ត ដោយយានយន្តគ្មានហ្វ្រាំង ភ្លើងបំភ្លឺផ្លូវ កង់រថយន្តសឹករិចរិល គ្មានឈៀកជាដើម ។ ដើម្បីជួយទប់ស្កាត់ និងការពារគ្រោះថ្នាក់ចរាចរណ៍ ដោយយថាហេតុ សមត្ថកិច្ចបានចុះពិនិត្យ នៅបេនរថយន្តកាពីតូល នៅផ្សារទំនើបភូពុយ ឃើញរថយន្តពាក់ស្លាកលេខភ្នំពេញ3A6116 កង់ក្រោយខាងឆ្វេង បានសឹករិចរិល តម្រូវអោយម្ចាស់ក្រុមហ៊ុនប្តូរកង់រថយន្តសិន ទើបអោយបន្តចរាចរណ៍ទៅមុខទៀត ។ ការចុះពិនិត្យនៅបេនរថយន្តពន្លឺអង្គរខ្មែរ នៅផ្សារទំនើបភូពុយ ឃើញអ្នកបើកបររថយន្តពាក់ស្លាកលេខភ្នំពេញ3A១៤១៥ មានឈៀកផុតកំណត់ ធ្វើការផាកពិន័យណែនាំអោយម្ចាស់ក្រុមហ៊ុនទៅបន្តឈៀក ។ សមត្ថកិច្ចនិច្ចនិងធ្វើការពិនិត្យជាតិអាល់កុល នៅពេលយប់បន្ថែមទៀត ដើម្បីជួយទប់ស្កាត់ការគ្រោះថ្នាក់ចរាចរណ៍ដោយយថាហេតុដូចចូលរួម ការពារអាយុជីវិត លោកអ្នក ៕
