កំពត ៖ លោកសាស្ត្រាចារ្យ ធា គ្រុយ រដ្ឋលេខាធិការក្រសួងសុខាភិបាល និងជាប្រធានក្រុមប្រឹក្សា គណៈគ្រូពេទ្យជាតិបានលើកឡើងថា មិនមានគ្រូពេទ្យណាម្នាក់ ឬកន្លែងសម្រាកព្យាបាលណាមួយអាចដំណើរការ នៅក្រៅការគ្រប់គ្រងរបស់មន្ទីរ និង ក្រុមប្រឹក្សាគណៈគ្រូពេទ្យបានឡើយ ហើយថាការចុះបញ្ជិការ និងការសុំអាជ្ញាប័ណ្ណជាការងារចាំបាច់សម្រាប់គ្រូពេទ្យគ្រប់រូប ដើម្បីធានាឲ្យបានថាការផ្តល់សេវាសុខាភិបាល មានប្រសិទ្ធភាព គុណភាពប្រកបដោយ ក្រមវិជ្ជាជីវៈ និងក្រមសីលធម៌ខ្ពស់។
ថ្លែងនៅក្នុង ពីធីបើកសន្និបាតបូកសរុបលទ្ធផលសកម្មភាពក្រុមប្រឹក្សាគណៈគ្រូពេទ្យ ហៅកាត់ថា(ក.គ.ខ)ខេត្តកំពត និងកែបសម្រាប់រយៈពេល២ឆ្នាំ លើកទី១ នៃអាណត្តិ៦ឆ្នាំ លើកទី៣ ដែលបានធ្វើឡើងនៅថ្ងៃទី២៩ ខែឧសភា ឆ្នាំ២០១៨ ក្នុងសាលប្រជុំមន្ទីរសុខាភិបាលខេត្តកំពត លោក ធា គ្រុយ បានលើកឡើងទៀតថា ក្រុមគ្រូពេទ្យទាំងអស់នៅក្នុងខេត្ត បានបំពេញការងារ និងសម្រេចបានលទ្ធផលល្អប្រសើរយ៉ាងច្រើន ទាំងការងារមន្ទីរ និងក្រុមប្រឹក្សាគណៈគ្រូពេទ្យខេត្ត ធ្វើឲ្យប្រជាពលរដ្ឋមានជំនឿចិត្ត លើការផ្តល់សេវាសុខាភិបាលរបស់រដ្ឋ។
ដោយឡែក សេវាសុខាភិបាលវិស័យឯកជនក៏មានសភាពល្អប្រសើរ មានការចូលរួមសហការគ្នាបានល្អរាល់គ្រូពេទ្យ និង កន្លែងផ្តល់សេវាសុខាភិបាលនានា បានមកសុំ អាជ្ញាប័ណ្ណ និងបានចុះបញ្ជិការត្រឹមត្រូវ តាមច្បាប់។ លោកបានបន្ថែមទៀតថា ការផ្តល់សេវាសុខាភិបាលនៅក្នុងខេត្តកំពត អាចនិយាយបានថា ជាគំរូមួយសម្រាប់បណ្តាខេត្តដ៏ទៃទៀត។ពិសេសប្រធានមន្ទីរ និងប្រធានក្រុមប្រឹក្សាគណៈគ្រូពេទ្យខេត្ត រឹងមាំ និងមានចរឹកទន់ភ្លន់ អនុវត្តការងារដឹកនាំបានល្អ ហើយពេលកន្លងមក មិនដែលមានបញ្ហាអ្វីអាក្រក់ណាមួយលេចឭទេនៅក្នុងខេត្តកំំពតនេះ។
លោករដ្ឋលេខាធិការ ក៏បានផ្តាំផ្ញើដល់ក្រុមគ្រូពេទ្យ ទាំងអស់បន្តខិតខំពង្រឹង សមត្ថភាពបន្ថែមទៀត ពិសេសត្រូវ យកចិត្តទុកដាក់រក្សាឲ្យបាននូវ ក្រមសីធម៌ វិជ្ជាជីវៈខ្ពស់ ដើម្បីចៀសវាងការរិះគន់ផ្សេងពីមជ្ឍដ្ឋានខាងក្រៅ។
សូមបញ្ជាក់ថា ក្នុងពិធីនោះ ក៏មានការបោះឆ្នោតជំរុះ និងបោះឆ្នោតតែងតាំងសមាជិកថ្មី ព្រមទាំង ការបោះឆ្នោតជ្រើសរើសប្រធានក្រុមប្រឹក្សាគណៈគ្រូពេទ្យខេត្តផងដែរ។ ជាលទ្ធផល លោកវេជ្ជបណ្ឌិត កែវ សុផាន់ នៅតែរក្សាបានសំលេងគាំទ្រពីក្រុមវេជ្ជបណ្ឌិត ឲ្យធ្វើជាប្រធានក្រុមប្រឹក្សាដដែល៕
សេង ណារិទ្ធ
