កំពត ៖ ប្រជាពលរដ្ឋដែលរស់ក្នុងភូមិសាស្ត្រឃុំបឹងសាលាខាងជើងនិងឃុំបឹងសាលាខាងត្បូង ស្រុកកំពង់ត្រាច ខេត្តកំពត បាននិងកំពុងប្រឈមនឹងបញ្ហាលិចលង់ស្រែ ចម្ការ ដោយសារជំនន់ភ្លៀង ខណៈបឹងអន្លង់គល់ ស្ថិតជាប់ស្ពានកោះគុយ ត្រូវមានគេចាក់ដីលុបជាបន្តបន្ទាប់នោះ។
យោងតាមសេចក្តីរាយការណ៍ពីប្រជាពលរដ្ឋដែលរស់ក្នុងភូមិសាស្ត្រខាងលើបាននិយាយថា កាលពីមុនក្នុងតំបន់នេះពុំដែលមានលេចឮករណីលិចលង់ភូមិឋាន ស្រែចម្ការដោយសារទឹកភ្លៀងនោះទេ ប៉ុន្តែបន្ទាប់ពីមានគេចាក់ដីលុបបឹងអន្លង់គល់ដើម្បីសង់ផ្ទះសំបែងនៅទីនោះមក ស្រាប់តែមូលដ្ឋានដែលគាត់រស់នៅក៏ត្រូវបានយាយីដោយសារជំនន់ភ្លៀងមិនចេះឈប់ឈរទៅវិញ។ប្រភពដដែលបានបង្ហើបថា បឹងអន្លង់គល់នេះបានតភ្ជាប់មកពីចំណុចស្ពានជាប់នឹងសាលាឃុំបឹងសាលាខាងត្បូង ដែលជានិច្ចកាលទឹកតែងតែបានហូរឆ្លងកាត់ស្ពានកោះគុយនេះជាប្រចាំ លុះពេលមានគេចាក់ដីលុបបឹងសង់លំនៅឋានបែបអាណាធិបតេយ្យដូចខាងលើ ទឹកនឹងចាល់ហូរទៅមិនទាន់ ទើបក្លាយជាជំនន់លិចលង់ម្តងម្កាលតែម្តង។
ពាក់ព័ន្ធនឹងករណីមានការចាក់ដីលុបបឹងដូចខាងលើ លោក វ៉ាន់ បូរ៉ា មេឃុំបឹងសាលាខាងត្បូងបានបញ្ជាក់ប្រាប់កម្ពុជាថ្មី តាមទូរស័ព្ទនៅរសៀលថ្ងៃទី២៩ខែឧសភា ឆ្នាំ២០១៨នេះថា តាមពិតការលុបបឹងអន្លង់គល់នេះ គឺមិនមានបញ្ហាប្រឈមរហូតដល់ធ្វើឱ្យលិចលង់លំនៅឋានឬស្រែ ចម្លាររបស់ប្រជាពលរដ្ឋនោះទេ ព្រោះការចាក់លុបនេះអ្នកលុបក៏មិនទាន់បានចាក់លុបបឹងទាំងស្រុងនោះទេ ដោយបានទុកចន្លោះឆ្ងាយពីស្ពានកោះគុយប្រហែល១៥ម៉ែត្រឯណោះ។លោកមេឃុំ វ៉ាន់ បូរ៉ា បានឱ្យដឹងទៀតថា ការចាក់ដីបឹងនេះគឺផ្តើមឡើងពីសំណាក់ប្រជាពលរដ្ឋពី៥ទៅ៦គ្រួសារ ដើម្បីសង់លំនៅឋាននៅទីនោះ ចឹងហើយទើបអាជ្ញាធរពិបាកនឹងការទប់ស្កាត់ណាស់ ម្យ៉ាងទៀតពួកគាត់សុទ្ធសឹងជាពលរដ្ឋក្នុងមូលដ្ឋាន។លោកបានទម្លាយទៀតថា លំនៅឋានដែលសង់នៅលើដីបឹងបេះមិនទាន់មានប័ណ្ណកម្មសិទ្ធិនៅឡើយទេ។
ទោះជាយ៉ាងណា ប្រភពពីលក្ខខណ្ឌសុំមិនបញ្ចេញឈ្មោះ បានលួចខ្សឹបថា ចំណុចបឹងអន្លង់គល់ជាប់នឹងស្ពានកោះគុយដែលមានព្រំប្រទល់ជាប់គ្នារវាងឃុំពីរ គឺឃុំបឹងសាលាខាងត្បូង និងឃុំបឹងសាលាខាងជើង ស្រុកកំពង់ត្រាចនេះ ត្រូវបានប្រជាពលរដ្ឋប្រមាណ៥ទៅ៦គ្រួសារបានឃុបឃិតគ្នាជាមួយអាជ្ញាធរក្នុងតំបន់ ហើយក៏មានជាប់ពាក់ព័ន្ធនឹងមន្ត្រីម្នាក់ធ្វើការក្នុងសាលាស្រុកកំពង់ត្រាចផងដែរ ដោយគេបានជម្រុញឱ្យពលរដ្ឋចាក់ដីបឹងសង់ផ្ទះសំបែង។ប្រភពជាក់លាក់បានបង្ហើបទៀតថា ការចាក់វាតយកបឹងអន្លង់គល់ពីសំណាក់ពលរដ្ឋប៉ុន្មានគ្រួសារខាងលើ ច្បាស់ណាស់គឺមន្ត្រីខិលខូចពិតជានៅពីក្រោយនៃការចាក់រំលោភយកដីបឹងនេះ ព្រោះគេលេចឮថា មានមន្ត្រីទាំងនោះកំពុងនាំគ្នារត់ការដើម្បីចេញប័ណ្ណកម្មសិទ្ធិឱ្យប្រជាពលរដ្ឋខាងលើ ប៉ុន្តែរហូតមកដល់ពេលនេះនៅមិនទាន់ចេញជារូបរាងនៅឡើយ។
ចំពោះករណីមានការឃុបឃិតចាក់លុបដីបឹងយកធ្វើជាកម្មសិទ្ធិដូចបានរៀបរាប់ខាងលើនេះ កម្ពុជាថ្មី នឹងខិតខំស្វែងរកព័ត៌មានពិស្តាបន្ថែម សម្រាប់ចុះផ្សាយនៅទំព័រលេខក្រោយទៀត៕ សេង ណារិទ្ធ
