ខេត្តបាត់ដំបង ៖ ស្រុកថ្មគោល មានករណីភ្ញាក់ផ្អើលមួយបានកើតឡើងក្រោយពីប្រទះឃើញ បុរសទីទាល់ក្រម្នាក់ឈ្មោះ ទូច វ៉ាត់ អាយុ៥១ឆ្នាំ មានទីលំនៅស្នាក់នៅបណ្តោះអាសន្ននៅក្រុមទី៤ភូមិជ្រៃថ្មី ឃុំជ្រៃ ស្រុកថ្មគោលខេត្តបាត់ដំបង នៅវេលាម៉ោង១៤:០០នាទីថ្ងៃទី១៦ ខែធ្នូ ឆ្នាំ២០២៣ បានហែលទឹកទៅដោះមងតែម្នាក់ឯង តែអកុសលក៏ត្រូវបានមងរុំជើងជាប់ បណ្ដាលឲ្យឈ្លក់ទឹកដាច់ខ្យល់ស្លាប់នៅក្នុងអាងម៉ាឈិ ដែលស្ថិតនៅភូមិឃុំដែលជនរងគ្រោះស្នាក់នៅខាងលើ ។
បើតាមសម្តីគ្រួសារសពបានប្រាប់ថា ជនរងគ្រោះគឺជាមនុស្សញៀនស្រាជាប្រចាំ រហូតដល់ពេលខ្លះបាត់បង់ការចងចាំ ដើរដោះសម្លៀកបំពាក់ក៏មាន មុនពេលកើតហេតុ៣ថ្ងៃជនរងគ្រោះឈ្មោះ ទូច វ៉ាត់ មិនបានផឹកស្រាទេដោយសារសុខភាពមិនប្រសើរ ក្រោយកើតហេតុការណ៍ ដឹងថាមានមនុស្សលង់ទឹកស្លាប់ លោក ហង្ស សីហា នាយប៉ុស្តិ៍រដ្ឋបាលឃុំជ្រៃនិងមន្ត្រីនគរបាលជំនាញផ្នែកកោសល្យវិច្ឆ័យក៏បានចុះមកដល់កន្លែងកើតហេតុ ធ្វេីការពិនិត្យលេីរាងកាយសាកសពដោយយកចិត្តទុកដាក់ ទៅលើខ្លួនសព ឈ្មោះ ទូច វ៉ាត់ ពិតជាស្លាប់ដោយសារលង់ទឹកពិតប្រាកដមែន ក្រោយពីពិនិត្យរួច ត្រូវបានមន្ត្រីជំនាញចេញលិខិតអនុញ្ញាតិអោយយកសពទៅធ្វើបុណ្យតាមប្រពៃណីនៅវត្តអារញ្ញវាសី ហៅ (វត្តរ៉ូង)ស្ថិតក្នុង ភូមិព្រៃទទឹង ឃុំជ្រៃ ស្រុកថ្មគោល ខេត្តបាត់ដំបង ៕
