(ព្រះវិហារ) ៖ ខេត្តព្រះវិហារមានភ្ញៀវទេសចរជាតិនិងអន្តរជាតិដើរលេងកម្សាន្តជាង១ម៉ឺននាក់នៅតាមតំបន់រមណីយដ្ឋាននានា ក្នុងរយៈពេល៣ថ្ងៃ នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ។
លោក គង់ វិបុល ប្រធានមន្ទីរទេសចរណ៍ខេត្តព្រះវិហារ បានឲ្យដឹងនាថ្ងៃទី២៩ ខែវិច្ឆិកា ឆ្នាំ២០២៣ ថា ភ្ញៀវទេសចរបានដើរកម្សាន្តនៅតាមរមណីយដ្ឋាននានាក្នុងខេត្តព្រះវិហារ នាឱកាសព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ក្នុងរយៈពេល៣ថ្ងៃ ដោយគិតពីថ្ងៃទី២៦-២៨ ខែវិច្ចិកា ឆ្នាំ២០២៣ ភ្ញៀវទេសចរជាតិនិងភ្ញៀវបរទេស ព្រមទាំងប្រជាពលរដ្ឋ ដែលបានធ្វើដំណើកម្សាន្តនៅតាមរមណីយដ្ឋាន និងគោលដៅទេសចរណ៍នានាក្នុងខេត្តមានចំនួនសរុប១២,៩៥៣នាក់ បើធៀបរយៈពេលដូចគ្នានៅឆ្នាំមុន ថយចុះចំនួន២៨.៤២% ក្នុងនេះមានភ្ញៀវជាតិចំនួន១២,៨៦៧នាក់ ថយចុះចំនួន២៧.២០% និងភ្ញៀវបរទេសចំនួន៨៦នាក់ ថយចុះចំនួន៧១,៦២%។
លោកប្រធានមន្ទីរទេសចរណ៍ខេត្តព្រះវិហារ បានថ្លែងបញ្ជាក់ថា មូលហេតុដែលភ្ញៀវទេសចរធ្លាក់ចុះបន្តិចនៅខេត្តព្រះវិហារ រយៈពេល៣ថ្ងៃ នៃព្រះរាជពិធីបុណ្យអុំទូកឆ្នាំនេះ ដោយឆ្នាំមុនខេត្តព្រះវិហារបានរៀបចំពិធីអុំទូកនៅទំនប់៩៥ ចំថ្ងៃឈប់សម្រាក។ តែឆ្នាំនេះ ធ្វើពិធីប្រណាំងទូកនៅទំនប់៩៥ មុនថ្ងៃឈប់សម្រាក ទើបធ្វើឱ្យភ្ញៀវទេសចរធ្លាក់ចុះ ៕
ដោយ លឹម សាវុធ
