នៅព្រឹកថ្ងៃទី២៩ ខែវិច្ឆិកា ឆ្នាំ២០២៣នេះ បន្ទាប់ពីបានបំពេញភារកិច្ចក្នុងការចូលរួមថែរក្សាអនាម័យទូទាំងក្រុងសៀមរាប ជាពិសេស នាថ្ងៃព្រះរាជពិធីបុណ្យអុំទូកក្នុងក្រុងសៀមរាប កាលពីកន្លងទៅនេះ ឯកឧត្តម ប្រាក់ សោភ័ណ អភិបាលខេត្តសៀមរាប បាននាំយកអំណោយមួយចំនួនប្រគល់ជូនដល់បងប្អូនអ្នកអនាម័យជាង ១០០នាក់ មកពីអង្គភាពចំនួន៥ ដើម្បីជាការលើកទឹកចិត្តដល់ពួកគាត់ដែលបានចូលរួមថែរក្សាអនាម័យក្នុងក្រុងសៀមរាបកន្លងមកបានយ៉ាងល្អ។
ក្នុងឱកាសនោះ ឯកឧត្តម ប្រាក់ សោភ័ណ មានប្រសាសន៍ថា សម្រាប់ការចោលសំរាមរបស់ពលរដ្ឋបច្ចុប្បន្ន មានសណ្ដាប់ធ្នាក់ក៏ពិតមែន ប៉ុន្តែនៅក្នុងខេត្តសៀមរាប ក៏នៅមានបងប្អូនមួយចំនួននៅមិនទាន់ចូលរួមទុកដាក់សំរាមបានល្អនៅឡើយទេ។ ការងារនេះទាមទាឲ្យបងប្អូនយើងជាអ្នកអនាម័យ ត្រូវមានភារកិច្ចក្នុងការចូលរួមសម្អាតជាប្រចាំ ទើបជួយឲ្យទីក្រុងយើងក្លាយជាទីក្រុងស្អាត មិនមានការចោល និងទុកសំរាមផ្ដេសផ្ដាស។
ឯកឧត្តម ប្រាក់ សោភ័ណ បង្ហាញថា ជាក់ស្ដែងក្នុងឱកាសព្រះរាជពីធីបុណ្យអុំទូក បណ្ដែតប្រទីប និងសំពះព្រះខែ អកអំបុក ខេត្តសៀមរាប ឆ្នាំ២០២៣កន្លងទៅនេះ ការទុកដាក់សំរាមរបស់បងប្អូនយើង គឺមានភាពល្អប្រសើរ ស្របជាមួយនឹងសកម្មភាពក្រុមការងារយើងដែលជាអ្នកអនាម័យ ក៏បានចូលរួមយ៉ាងសកម្មក្នុងការចូលរួមថែរក្សា រៀបចំសណ្ដាប់ធ្នាប់ ការចោល ការទុកដាក់សំរាម និងប្រមូលសំរាម ដោយទោះបីធុងសំរាមមិនបានគ្រប់គ្រាន់ក៏ពិតមែន តែពួកគាត់ក៏បានទុកដាក់សំរាមឲ្យមានរបៀបរៀបរយ ងាយស្រួលដល់បងប្អូនអ្នកអនាម័យយើងងាយស្រួលសម្អាត និងប្រមូលផងដែរ។
ឯកឧត្តមអភិបាលខេត្ត ក៏បានបញ្ជាក់ដែរថា សម្រាប់ព្រះរាជពីធីបុណ្យអុំទូក បណ្ដែតប្រទីប និងសំពះព្រះខែ អកអំបុក ខេត្តសៀមរាប នាឆ្នាំនេះ គឺយើងបានទទួលវត្តមានភ្ញៀវទេសចរជាតិ-អន្តរជាតិ រហូតដល់ជាង ៣០ម៉ឹននាក់ ដែលចំនួននេះ គឺមានការកើនឡើងបើធៀបនឹងឆ្នាំ២០១៩ ។ ហើយវត្តមានភ្ញៀវទេសចរមានចំនួនច្រើនបែបនេះ ក៏ដោយសារតែទីក្រុងយើងស្អាត ក្នុងនោះបងប្អូនយើងទាំងអស់មានភាពសកម្ម សម្អាតបានល្អ ស្អាត។ ជាក់ស្ដែងកាលពីពេលកន្លងទៅរដ្ឋបាលខេត្ត បានសហការជាសហភាពសហព័ន្ធយុវជនកម្ពុជាខេត្តជាច្រើនរយនាក់ ដើម្បីធ្វើការសម្អាតនៅក្នុងក្រុង ក៏ប៉ុន្តែមិនបានស្អាតដូចបងប្អូនអ្នកអនាម័យយើងទេ។
ជាមួយគ្នានេះ ឯកឧត្តមក៏បានថ្លែងអំណរគុណ និងបានជម្រុញលើកទឹកចិត្តដល់បងប្អូនជាក្រុមអ្នអនាម័យទាំង ៥អង្គភាព រួមមាន៖ មន្ទីរបរិស្ថានខេត្ត, ក្រុមហ៊ុន Gaea.plc, ក្រុមហ៊ុន Cintri, ក្រុមហ៊ុន Active Green និងគ្រឹះស្ថានអង្គរ សូមចូលរួមបន្តទៀតក្នុងការងារសម្អាតបរិស្ថាន ការប្រមូលសំរាមនៅក្នុងទីក្រុងឲ្យបានស្អាតបន្ថែមទៀត ហើយក៏សង្ឃឹមថា សោភ័ណភាពទីក្រុងយើងនឹងកាន់តែស្រស់ស្អាត ដើម្បីជាការទាក់ទាញ់ដល់អ្នកទេសចរណ៍គ្រប់ជាតិសាសន៍ចូលមកកំសាន្តកាន់តែច្រើនឡើង៕
