កំពត ៖ ដើម្បីរួមការរំលែកទុក្ខលំបាកជាមួយបងប្អូនប្រជាពលរដ្ឋរងគ្រោះ នៅរសៀលថ្ងៃទី១២ខែឧសភា ឆ្នាំ២០១៨ លោក ជាវ តាយ អភិបាលនៃគណៈអភិបាលខេត្ត និងជាប្រធានកិត្តិយសសាខាកាកបាទក្រហមកម្ពុជាខេត្តកំពត រួមនិងសហការីដែលជាសមាជិកសាខាកាកបាទក្រហមខេត្ត និងមន្ត្រី ក្នុងជួររដ្ឋបាលខេត្ត ព្រមទាំងតាមបណ្ដាមន្ទីរអង្គភាព ជុំវិញខេត្ត និងក្រុមយុវជនស្ម័គ្រចិត្តកាកបាទក្រហម បានអញ្ជើញនាំយកនូវអំណោយមនុស្សធម៌របស់សាខាកាកបាទក្រហមកម្ពុជាខេត្តកំពត រួមមានថវិកានិង គ្រឿងឧបភោគបរិភោគមួយចំនួនដើម្បីឧបត្ថម្ភជូន ដល់គ្រួសារ ប្រជាពលរដ្ឋរងគ្រោះដោយខ្យល់កន្ត្រាក់រលំផ្ទះនិងប៉ើកដំបូលផ្ទះចំនួន៤៧គ្រួសារ ដែលឧបទ្ទវហេតុនេះបានកើើតឡើងកាលពីថ្ងៃទី៨ខែឧសភា ឆ្នាំ២០១៨កន្លងទៅថ្មីៗនេះនៅឃុំស្រែចែង ស្រុកជុំគីរី ខេត្តកំពត។
មានប្រសាសន៍សំណេះសំណាល លោក ជាវ តាយ ក្នុងនាមប្រធានកិត្តិយសសាខាកាកបាទក្រហមកម្ពុជាខេត្តកំពត បាននាំមកនូវការផ្ដាំផ្ញើរំលែកសោកស្ដាយនិងសួរសុខទុក្ខ ពីសំណាក់ សម្ដេច កិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនចំពោះបងប្អូនប្រជាពលរដ្ឋ រងគ្រោះ ទាំងអស់ ដែលជានិច្ចកាលសម្ដេច ប្រធានកាកបាទក្រហមកម្ពុជាតែងតែបានយកចិត្តទុកដាក់ខ្ពស់ក្នុងបុព្វហេតុជួយសម្រាលទុក្ខលំបាករបស់បងប្អូនប្រជាពលរដ្ឋដែលរងគ្រោះថ្នាក់ដោយសារគ្រោះមហន្តរាយនានាដែលកំពុងត្រូវការជំនួយមនុស្សធម៌ដោយប្រកាន់នូវជំហរអព្យាក្រិត មិនប្រកាន់និន្នាការ សាសនា ពូជសាសន៍ ពណ៌សម្បុរពោលទីណាមានជនរងគ្រោះទីនោះតែងមានកាកបាទក្រហមកម្ពុជាជួយជានិច្ច។
លោក ជាវ តាយក៏បានលើកបញ្ជាក់ថា បើទោះបី អំណោយនាពេលនេះមិនបានឆ្លើយតបនឹងតម្រូវការគ្រប់គ្រាន់របស់បងប្អូនប្រជាពលរដ្ឋរងគ្រោះ ទាំងអស់ក៏ពិតមែន តែវាក៏អាចបានជួយសម្រាលការលំបាករបស់បងប្អូនដែលកំពង់ជួបការលំបាកខ្វះខាត បានមួយចំនួនផងដែរ។ ដូចនេះសូមបងប្អូនត្រូវបន្តយកចិត្តទុកដាក់លើការកសាង ជីវភាពគ្រួសារឱ្យបានល្អឡើងវិញបន្តទៀត ពិសេសចំពោះបញ្ហាអនាម័យ ពោលគឺការរស់នៅស្អាត ហូបស្អាត ផឹកស្អាតដើម្បីបង្ការជៀសវាងជំងឺរាតត្បាតផ្សេងៗកើតឡើងដែលជាបញ្ហាលំបាកទុក្ខលើលំបាក។
ចំពោះអំណោយដែលបានជួយឧបត្ថម្ភប្រជាពលរដ្ឋរងគ្រោះនាពេលនេះ រួមមាន៖ សម្រាប់ ប្រពលរដ្ឋចំនួន៤៧គ្រួសារក្នុង១គ្រួសារអង្ករ៥០គីឡូ មី១កេះ ប្រាក់២០ម៉ឺនរៀល ដោយឡែកក្នុងនោះសម្រាប់៣គ្រួសារដែលរលំផ្ទះទាំងស្រុងក្នុងមួយគ្រួសារបន្ថែមប្រាក់៨០ម៉ឺនរៀល និង ៣គ្រួសារផ្សេងទៀតខូចខាតមធ្យមក្នុង១គ្រួសារបន្ថែមប្រាក់៥០ម៉ឺនរៀល និងបានជូនប្រាក់យុវជននិងយុវជនស្ម័គ្រចិត្តកាកបាទក្រហមក្នុងមូលដ្ឋានចំនួន២២នាក់ម្នាក់ៗ១ម៉ឺនរៀលផងដែរ៕
សេង ណារិទ្ធ
