ខេត្តរតនគីរី ៖ ថ្មីៗនេះប្រភពបានលើកឡើងថា លោក លី តុលា មន្ត្រីគយចល័តដែលឈរជើងក្នុងខេត្តរតនគិរីដែលចាយលុយដូចក្រដាសបានបាញ់បោះសេរីផ្អើលអ្នកស្រុក ។ បើតាមប្រភពពីមន្ត្រីអាវុធហត្ថស្រុកអូរយ៉ាដាវបានឲ្យដឹងថាថ្មីៗនេះក្រោយពេលលោកលី តុលាប្រើកាំភ្លើងបាញ់បោះ យ៉ាងអនាធិបតេយ្យ ក៏ត្រូវបានឃាត់ខ្លួនយកមកធ្វើកំណត់ហេតុ ។ ប៉ុន្តែត្រូវបានមេគយចល័តក្នុងអគ្គនាយកដ្ឋានគយនិងរដ្ឋាករអន្តរាគមន៍ ឲ្យរួចផុតពីការឃាត់ខ្លួន។
លោក លី តុលា មន្ត្រីគយចល័តខេត្តរតនគិរី គេដឹងថាមានអំណាចយ៉ាងធំធេង ក្នុងការប្រមូលលុយ ពីឈ្មួញដឹកជញ្ជូនឈើ ទៅស្រុកយួន ក៏ដូចជាប្រមូលលុយពីឈ្មួញ ដែលដឹកទំនិញគេចពន្ធទំនិញខុសច្បាប់ ពីទឹកដីយួនចូលទឹក ដីខ្មែរ តាមច្រកទ្វារអន្តរជាតិអូរយ៉ាដាវ ។ តាមរយៈអំពើពុករលួយបែបនេះ ហើយទើបលោក លី តុលា អាចប្រមូលលុយបានយ៉ាងច្រើន ក្នុងមួយខែៗហើយជិះរថយន្តទំនើបពាក់ស្លាកលេខល្អ តែបែរជាមានចរិតមិនសូវថ្លៃថ្នូរ។
ដោយសារតែប្រមូលលុយ បានយ៉ាងច្រើន នៅលើផ្លូវជាតិលេខ៧៨ ទើបលោក លី តុលា ផឹកស៊ីអាវ៉ាសែចាយលុយ ដូចក្រដាសដើម្បីបង្ហាញពីភាពហ៊ឺហារបស់ខ្លួនដោយគ្មានគិតគូរពីសេចក្ដីអៀនខ្មាស់ឡើយ។
ប្រការនេះបញ្ជាក់ថា ដោយសារអាងមានខ្នងបង្អែករឹងមាំទើបលោក លី តុលា ហ៊ានប្រព្រឹត្តអំពើពុករលួយ ប្រមូលលុយតាមច្រើនរូបភាព ដោយគ្មានខ្លាច ក្រែងអ្វីទាំងអស់ហើយក៏មិនខ្វល់ពីការរិះគន់នោះទេ។
លោកគុណ ញឹមដែលជាអគ្គនាយកនៃអគ្គនាយកដ្ឋានគយ និងរដ្ឋាករដែលខ្នងបង្អែកដ៏រឹងមាំរបស់លោក លី តុលា មន្ត្រីគយចល័តខេត្តរតនគិរី ឡើងដៃណាស់ក្នុងការប្រព្រឹត្តអំពើពុករលួយប្រមូលលុយពីបទល្មើសដែលកើត ឡើងនៅលើផ្លូវជាតិលេខ៧៨ យ៉ាងគឃ្លើន ហើយហ៊ានប្រើកាំភ្លើងបាញ់បោះសេរី អនាធិបតេយ្យបំផ្លាញសន្តិសុខសង្គមនិងសន្តិភាពតែបែរជាអាចគេចផុតពីការផ្ដន្ទាទោសតាមច្បាប់។
ទោះជាយ៉ាងក៏ដោយពាក់ព័ន្ធពត៌មានខាងលើអង្គភាពយើងមិនអាចទាក់ទងទៅលោកគុណញឹមមេគយម៉ាស្រុកខ្មែរ!និងលោកលី តុលាពន្យល់បកស្រាយបានទេព្រោះគ្មានលេខទូរស័ព្ទ។បើមានប្រតិកម្មពីសាម៉ីពាក់ព័ន្ធសារពត៌មានយើងរង់ចាំស្រាយបំភ្លឺរាល់ម៉ោងធើ្វការ៕
លោក រុន សារ៉េត
