ខេត្តបាត់ដំបង៖ សមត្ថកិច្ចនគរបាលស្រុកបវេល និងស្រុកភ្នំព្រឹក បានសហការគ្នាបង្ក្រាប ករណីលួចមានស្ថានទម្ងន់ទោស និងនាំខ្លួនជនសង្ស័យជាមុខសញ្ញា បានភ្លាមៗ បន្ទាប់ពីទទួលបណ្តឹងពីជនរងគ្រោះ ។
សេចក្តីរាយការ៍អោយដឹងថា ករណីលួចមានស្ថានទម្ងន់ទោស (ប្រើប្រាស់កាំភ្លើងច្នៃជ័រ និងកាំបិតគំរាមប្លន់យកម៉ូតូ) មួយបានកើតឡើងស្ថិតនៅចំណុចក្បែរស្ពានដំរីស្លាប់ ក្រុមទី១០ ភូមិពោធិ៍ ឃុំព្រៃខ្ពស់ ស្រុកបវេល ខេត្តបាត់ដំបង កាលពីថ្ងៃសៅរ៍១៣រោចខែអ ស្សុជ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១១ ខែវិច្ឆិកា ឆ្នាំ២០២៣ វេលាម៉ោងប្រមាណ១០និង៣០ នាទី ដែលករណីនេះបង្កឡើងដោយជនសង្ស័យ ០១ នាក់ មិនស្គាល់អត្តសញ្ញាណ បានធ្វើសកម្មភាពគំរាមបាញ់សម្លាប់ ជនរងគ្រោះឈ្មោះ ពិ វ៉ិត ភេទស្រី អាយុ៤៦ឆ្នាំ រស់នៅក្រុម០២ ភូមិពោធិ៍ ឃុំព្រៃខ្ពស់ ស្រុកបវេល ខេត្តបាត់ដំបង ដើម្បីប្លន់យកម៉ូតូម៉ាកស្គុបពីពណ៌ស គ្មានស្លាក លេខស៊េរីឆ្នាំ២០២៣បាន សម្រេច រួចជនសង្ស័យបានយកម៉ូតូជិះគេចខ្លួនបាត់ ។
បន្ទាប់ពីបានទទួលព័ត៌មាននេះភ្លាម លោកវរសេនីយ៍ឯក សុខ សារិន អធិការនគរបាលស្រុកបវេល បានដឹកនាំកម្លាំងជំនាញនគរបាលយុត្តិធម៌រួមជាមួយកម្លាំងអន្តរាគមន៍ កម្លាំងប៉ុស្តិ៍នគរបាលរដ្ឋបាលព្រៃខ្ពស់ និងកម្លាំងប៉ុស្តិ៍នគរបាលរដ្ឋបាលបួរ នៃអធិការដ្ឋានគរការដ្ឋាននគរបាលស្រុកភ្នំព្រឹកដែលមានលោកវរសេនីយ៍ទោ ហេង បារាំង ជាអធិការ ចុះស្រាវជ្រាវ និងធ្វើការស្ទាក់ចាប់បានជនសង្ស័យ០១នាក់។
ឈ្មោះ ប៊ុត សុវណ្ណរិទ្ធ ហៅ សៅលីញ ភេទប្រុស អាយុ៣០ឆ្នាំ រស់នៅភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ នៅចំណុចភូមិអន្លង់ក្រូច ឃុំបួរ ស្រុកភ្នំព្រឹក ខេត្តបាត់ដំបង និងដកហូតបាន៖
១-ម៉ូតូរបស់ជនរងគ្រោះចំនួន០១គ្រឿង
២-ម៉ូតូរបស់ជនសង្ស័យចំនួន០១គ្រឿង
៣-ខ្នោះដៃចំនួន០១
៤-កាំបិតស្នៀតចំនួន០១
៥-អាវុ-ធកែច្នៃចំនួន០១
ពេលនេះ នគរបាលស្រុករៀបចំកសាងសំណុំរឿងបញ្ជូនមកការិយាល័យជំនាញអនុវត្តតាមផ្លូវច្បាប់ រីឯម៉ូតូបានប្រគល់ជូនជនរងគ្រោះវិញ ៕
