(ខេត្តកណ្តាល)៖ លោកឧត្តមសេនីយ៍ត្រី សំ តុលា មេបញ្ជាការកងរាជអាវុធហត្ថខេត្តកណ្តាល បានជួបសំណេះសំណាលសួរសុខទុក្ខនិងចែកអាវរងារជាអំណោយដ៏ថ្លៃថ្លារបស់សម្តេចឣគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនដល់នាយទាហាន នាយទាហានរង នៃកងរាជអាវុធហត្ថខេត្តកណ្តាល នៅទីបញ្ជាការ កងរាជអាវុធហត្ថខេត្តកណ្តាល សម្រាប់យកទៅប្រើប្រាស់ក្នុងរដូវរងារនាពេលខាងមុខ ពិធីចែកអាវរងារនេះបានប្រព្រេត្តទៅនៅថ្ងៃទី៩ ខែវិច្ឆិកា ឆ្នាំ២០២៣។
ក្នុងពិធីនោះលោកឧត្តមសេនីយ៍ត្រី សំ តុលា មេបញ្ជាការ ក៏បានសំដែងនូវអំណរគុណ និងដឹងគុណយ៉ាងជ្រាលជ្រៅបំផុត ចំពោះសម្តេចទាំងទ្វេ ដែលជានិច្ចជាកាលសម្តេចតែងតែយកចិត្តទុកដាក់ខ្ពស់លើសុខទុក្ខនិងសុខមាលភាពរបស់កងកម្លាំងគ្រប់លំដាប់ថ្នាក់ ហើយក៏បានផ្តាំផ្ញើដល់នាយទាហាន និងនាយទាហានរង នៃកងរាជអាវុធហត្ថខេត្តកណ្តាលទាំងអស់ ត្រូវខិតខំប្រឹងប្រែងបន្តអនុវត្តតួនាទី ភារកិច្ច ធានាបាននូវប្រសិទ្ធភាព តម្លាភាព និងគណនេយ្យភាព យកអស់ស្មារតីទទួលខុសត្រូវខ្ពស់បន្ថែមទៀត ក្នុងកិច្ចការពារសន្តិសុខ រក្សាសុវត្ថិភាព សណ្តាប់ធ្នាប់សាធារណៈ ព្រមទាំងត្រៀមកម្លាំងដើម្បីជួយអន្តរាគមន៍ដល់ប្រជាពលរដ្ឋដែលទទួលរងគ្រោះនូវឧបទ្ទេវហេតុផ្សេងៗ ឲ្យបានល្អប្រសើរ។
