កំពង់ធំ ៖ ស្ងាត់ៗឈ្មួញឈើឈ្មោះ សំណាង និងឌី ឌុក សំរុកដឹកឈើ ចេញពីស្រុកឆែប ស្រុកជ័យសែន និងស្រុករវៀង ខេត្តព្រះវិហារ ឆ្លងកាត់ខេត្តកំពង់ធំ ឆ្ពោះទៅលក់នៅប្រទេសវៀតណាម យ៉ាងពេញបន្ទុក ហើយគ្មានមន្ត្រីជំនាញនិងសមត្ថកិច្ចពាក់ព័ន្ធណាហ៊ានប៉ះពាល់មេឈ្មួញរូបនេះឡើយ ខណៈសេចក្តីរាយការណ៍របស់ប្រជាពលរដ្ឋរស់នៅក្នុងស្រុកឆែប ខេត្តព្រះវិហារនោះ បានអះអាងថា លោក រី សំណាង ជាមេឈ្មួញប្រចាំខេត្តព្រះវិហារកំពុងតែដាក់កម្លាំងកាន់រណាយន្តចូលទៅក្នុងព្រៃកាប់និងអារច្រៀក បំផ្លាញព្រៃឈើយ៉ាងរង្គាល តែម្ដង។
គេអះអាងថាមេឈ្មួញ រូបនេះបង្កើនសកម្មភាពកាប់បំផ្លាញព្រៃឈើក្នុងស្រុកឆែបនិង ស្រុករវៀងខេត្តព្រះវិហារ យ៉ាងគឃ្លើននៅក្នុងតំបន់ដែនជម្រកសត្វ (ព្រៃឡង់)នៅទីនោះ ដោយមានភាគហ៊ុន របស់លោក ឧកញ៉ា ឌី ដុក នៅពីក្រោយ ។
ប្រជាពលេដ្ឋនិយាយរិះគន់ថាព្រៃឈើហ្នឹងកំពុងប្រឈមនឹង សេចក្ដីវិនាសដ៏ធ្ងន់ធ្ងរមិនខានឡើយ ខណ:មេឈ្មួញ ឈ្មោះសំណាងកំពុងបង្កើនសកម្មភាពកាប់ឈើ និងដឹកជញ្ជូនឈើចេញពីខេត្តព្រះវិហារយ៉ាងគគ្រឹកគគ្រេង ហើយប្រើប្រាស់អាជ្ញាប័ណ្ណរបស់ក្រុមហ៊ុន ហួសសុពលភាព។ បើទោះបីពួកគេអះអាងថាឈប់រកស៊ីឈើ យូរឆ្នាំមកហើយក៏ដោយនោះ ក៏មេឈ្មួញឈ្នោះសំណាងនេះ អាចប្រើប្រាស់អាជ្ញាប័ណ្ណនេះដើម្បីបន្តកាប់បំផ្លាញព្រៃឈើនិងដឹកជញ្ជូនឈើយ៉ាងរលូនដដែល។
ជាក់ស្ដែងកាលពីយប់ថ្ងៃទី៤ ខែឧសភា ឆ្នាំ២០១៨ បើយោងតាមប្រភពព័ត៌មាន រាយការណ៍ថា រថយន្តយីឌុប របស់ឈ្មួញខាងលើ ខណ:ដឹកឈើប្រភេទលេខ២ខាងលើ ឈើប្រណិតពីក្រោម ដែលគេអះអាងថាមានចំនួន៤៥ម៉ែត្រ ចេញពីខេត្តព្រះវិហារមកដល់ភ្នំដែកក្នុងស្រុករវៀងបានដោះស្លាកលេខចេញ ដើម្បីបំភ័នភ្នែកសមត្ថកិច្ច និងបន្តដំណើរដោយឆ្លងកាត់ខេត្តកំពង់ធំ។ សេចក្ដីរាយការណ៍បន្តថា ដោយមានការឃុបឃិតជាមួយនាយសង្កាត់រដ្ឋបាលព្រៃឈើសាលាវិស័យ នាយផ្នែករដ្ឋបាលព្រៃឈើស្ទោង និងមន្ត្រីនគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តកំពង់ធំផងនោះ ពួកគេបានបំភ័នថា ជាឈើស្របច្បាបរបស់ក្រុមហ៊ុន ខណ:ប្រមុខរដ្ឋាភិបាលកម្ពុជា សម្ដេចតេជោ ហ៊ុន សែន ប្រកាសបិត ប៉េសេ នៅក្នុងទូទាំងប្រទេស។
តាមរយ:ការទទួលបានផលប្រយោជន៍ក្រោមតុដ៏សម្បើមពីក្រុមឈ្មួញឈើនោះ ប្រភពអះអាងថា ក្នុងនោះ មានចំណែករបស់លោ ប៊ុន ធី នាយខណ្ឌរដ្ឋបាលព្រៃឈើនិងលោកប្រធានមន្ទីរកសិកម្ម រុក្ខាប្រមាញ់និងនេសាទផងដែរ។ទន្ទឹមគ្នានេះភ្នាក់ទូរទស្សន៍ ក្នុងចំនួនពីរនាក់ ក៏បានទទួលលុយពីឈ្មួញឈើដ៏ល្បី ពូកែខាងរត់ការបិតសមត្ថកិច្ចខាងលើ ចំនួន១ពាន់ដល្លារ ដើម្បីបិទអ្នកព័ត៌មានក្នុងខេត្តកំពង់ធំផងដែរ។
ពាក់ព័ន្ធព័ត៌មានខាងលើនេះអង្គភាព សារព័ត៌មាន កម្ពុជាអភិវឌ្ឍន៍ រងចាំទទួលស្វាគមន៍ រាល់ការបកស្រាយ នៅលេខក្រោយ ប្រសិនបើមានប្រតិកម្មណាមួយនោះ៕
សេង ណារិទ្ធ
