កំពត ៖ នៅព្រឹកថ្ងៃទី០១ខែឧសភា ឆ្នាំ ២០១៨ សាខាកាកបាទក្រហមកម្ពុជា ខេត្តកំពត បានប្រារព្ធពិធីមីទ្ទិញអបអរសាទរខួបលើកទី១៥៥ទិវាពិភពលោកកាកបាទក្រហម អឌ្ឍច័ន្ទក្រហម៨ឧសភាឆ្នាំ២០១៨ ក្រោមប្រធានបទ”កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា មិនទុកនណាម្នាក់ចោល”។
ពិធីនេះប្រព្រឹត្តទៅនៅមណ្ឌលកីឡាដ្ឋានខេត្តកំពត ក្រោមអធិបតីភាព លោក បណ្ឌិត ប៉ែន ស៉ីម៉ន ទេសរដ្ឋមន្ត្រី និងជាទីប្រឹក្សាផ្ទាល់សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងមានវត្តមានចូលរួមជាសមាជិក សមាជិការពីសំណាក់ លោក លោកស្រី ជាសមាជិក-សមាជិកា សាខាកាកបាទក្រហមកម្ពុជា ខេត្ត និងអនុសាខាក្រុង ស្រុក សិស្ស និស្សិតយុវជនស្ម័គ្រចិត្តព្រមទាំងសប្បុរសជន សរុបចំនួនប្រមាណ៣៥០០នាក់។
លោក ជាវ តាយ អភិបាលនៃគណៈអភិបាលខេត្ត និងជាប្រធានកិត្តិយសសាខាកាកបាទក្រហមកម្ពុជាខេត្តកំពត បានអានរបាយការណ៍ស្វាគមន៍បង្ហាញអំពីលទ្ធផលសម្រេចបានដែលសាខាកាកបាទក្រហមកម្ពុជាខេត្តកំពតបានអនុវត្តន៍សកម្មភាពនារយៈពេលកន្លងមកនិងប្ដេជ្ញាបន្តខិតខំបំពេញឱ្យបានសម្រេចនូវយុទ្ធសាស្ត្រថ្មីរបស់កាកបាទក្រហមកម្ពុជារយៈពេល១០ឆ្នាំ(២០១១-២០២០) ។ពិសេសការងារពង្រឹងអភិបាលកិច្ចល្អដើម្បីបង្កើនសមត្ថភាពគ្រប់គ្រងទាំងនៅថ្នាក់សាខា និងអនុសាខា ក្នុងគោលបំណងលើកកម្ពស់តម្លៃមនុស្សធម៌ និងកៀរគររកមូលនិធិដើម្បីបន្តធ្វើប្រតិបត្តិការជួយប្រជាពលរដ្ឋងាយរងគ្រោះបំផុតដោយគ្រោះមហន្តរាយ វិបត្តិភ័យផ្សេងៗដោយពុំមានការរើសអើង បែងចែកពូជសាសន៍ ជំនឿសាសនា និន្នាការនយោបាយ ដោយមិនទុកអ្នកណាម្នាក់ចោលឡើយ ក្នុងជំហរស្មារតីលើគោលការណ៍គ្រឹះទាំងប្រាំពីរ របស់កាកបាទក្រហមកម្ពុជា។
ក្នុងឱកាសនោះ លោកទេសរដ្ឋមន្ត្រី ប៉ែន ស៉ីម៉ន បានអាននូវ សេចក្ដីថ្លែងការរបស់សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងបានមានប្រសាសន៍ សម្តែងនូវអំណរសាទរ និងថ្លែងអំគុណយ៉ាងជ្រាលជ្រៅចំពោះសមាជិក សមាជិការសាខាកាកបាទក្រហមកម្ពុជាខេត្តកំពតគ្រប់ថ្នាក់ និងអ្នកស្មគ្រ័ចិត្តព្រមទាំងសប្បុរសជនអង្គការដៃគូនានាទាំងអស់ដែលតែងតែបានយកចិត្តទុកដាក់និងកំពុងបន្តផ្តល់ការគាំទ្រយ៉ាងសកម្មទាំងថវិកា សម្ភារៈនិងស្មារតីដល់ចលនាសាខាកាកបាទក្រហមកម្ពុជាខេត្តកំពត ក៏ដូចជាកាកបាទក្រហមកម្ពុជាថ្នាក់ជាតិ ក្នុងការជួយសង្គ្រោះប្រជាពលរដ្ឋដែលជួបគ្រោះធម្មជាតិនិងជួបហានិភយ័ផ្សេងៗនេះបង្ហាញពីទឹកចិត្តមនុស្សធម៌ក្នុងសង្គមជាតិ ពិសេសការទទួលមូលនិធិពីសប្បុរសធម៌នាថ្ងៃនេះសង្ឃឹមនឹងមានការកើនឡើងថែមទៀតជាងបណ្ដាឆ្នាំមុន ។
ក្នុងន័យសកម្មភាពមនុស្សធម៌របស់កាកបាទក្រហមកម្ពជា លោកបណ្ឌិត ប៉ែន ស៊ីម៉ន ក៏បានអំពាវនាវផ្ដាំផ្ញើ ដល់សមាជិកសមាជិកាទាំងអស់គ្នាចាំបាច់ត្រូវរួមកម្លាំងសាមគ្គីគ្នា ពង្រឹងសមត្ថភាពនៃយន្តការ អន្តរស្ថាប័ន និងកិច្ចសហប្រតិបត្តិការភាពជាដៃគូល្អជាមួយអាជ្ញាធរមានសមត្ថកិច្ចគ្រប់លំដាប់ថ្នាក់ដើម្បីធានាបាននូវប្រសិទ្ធភាព និងជោគជ័យនៃបេសកកម្មមនុស្សធម៌របស់យើងទាំងអស់គ្នា។
ក្នុងកម្មវិធីនេះ សាខាកាកបាទក្រហមកម្ពុជាខេត្តកំពតទទួលបានថវិកាឧបត្ថម្ភពីសប្បុរសជនសម្រាប់ទុកបម្រុងយកទៅជួយជនរងគ្រោះមានចំនួនសរុប ៤៣ ម៉ឺន ៥ ពាន់ ៦០ ដុល្លារអាមរិក ៕
សេង ណារិទ្ធ
