ខេត្តបន្ទាយមានជ័យ ៖ នៅទីបញ្ជាការកងរាជអាវុធហត្ថ ខេត្តបន្ទាយមានជ័យ បើកវគ្គហ្វឹកហ្វឺន ដល់នាយ នាយរង អាវុធហត្ថ ចំនួន៦០នាក់ មកពីស្រុកក្រុងនានាក្នុងខេត្ត អោយមានសមត្ថភាពគ្រប់គ្រាន់បំរើប្រយោជន៍ប្រជាពលរដ្ឋនិងការពារជាតិ មាតុភូមិ ក្រោមធិបតីភាព លោកឧត្ដមសេនីយ៍ត្រី ឱ បូរិន្ទ មេបញ្ជាការកងរាជអាវុធហត្ថ ខេត្តបន្ទាយមានជ័យ ដែលមានរយៈពេល១៥ ថ្ងៃដោយគិតពីថ្ងៃទី១២ ខែ វិច្ឆិកា ឆ្នាំ២០១៤ ដល់ថ្ងៃទី២៦ ខែវិច្ឆិកា ឆ្នាំ២០១៤ ។
លោក ឱ បូរិន្ទ មេបញ្ជាការកងរាជអាវុធហត្ថ ខេត្តបន្ទាយមានជ័យ បានអោយដឹងថាលំហាត់ហ្វឹកហ្វឺននេះ អនុវត្តតាមផែនការហ្វឹកហ្វឺន ប្រចាំឆ្នាំរបស់ឯកឧត្តមនាយឧត្តមសេនីយ៍ សៅ សុខា អគ្គបញ្ជាការរងកងយុទ្ធពលខេមរៈភូមិន្ទ និងជាមេបញ្ជាការកងរាជ អាវុធហត្ថ លើផ្ទៃប្រទេស តម្រូវអោយអាវុធហត្ថទូទាំងប្រទេសធ្វើការហ្វឹកហាត់ ក្នុង១ឆ្នាំអោយបាន៣លើកក្នុងគោលបំណងដើម្បីកសាងនិងពង្រីកកំលាំង អាវុធហត្ថទាំងអស់អោយមានគុណភាពនិងយល់ដឹងក្នុងការអនុវត្តជំនាញ ពិតប្រាកដក្នុងនាមជាមន្ត្រីនគរបាលយុត្តិធម៌ នគរបាលរដ្ឋបាលនិងតំរួតយោធាជាមូលដ្ឋានដែលមានចែងក្នុងអនុក្រឹត្យលេខ ៧៧ដើម្បីពង្រឹងសមត្ថភាព ជំនាញជូន ដល់នាយនាយរងអាវុធហត្ថ ពីបទដ្ឋានការងារផ្សេងៗ សម្រាប់មន្ត្រីប្រតិបត្តិច្បាប់ ជាលក្ខណ:អន្តរជាតិ។
លោក ឱ បូរិន្ទមេបញ្ជាការកងរាជអាវុធខេត្តមានប្រសាសន៍ផ្ដាំផ្ញើដល់នាយ នាយរងអាវុធហត្ថ ដែលជាសិក្ខាកាមដែលមកពីស្រុកក្រុងទាំង៦០នាក់ អោយខិតខំយកចិត្តទុក្ខដាក់និងគោរពវិន័យ បទបញ្ជាការហ្វឹកហ្វឺន ស្វែងយល់និងរៀនសូត្រ ដើម្បីទទួលផ្លែផ្កាពីការរៀនសូត្រសំរាប់ខ្លួនឯងនិងកេរ្តិ៍ឈ្មោះ កងរាជអាវុធហត្ថ និងជួយបំរើប្រយោជន៍ប្រជាពលរដ្ឋនិងការពារជាតិមាតុភូមិរបស់យើង ៕ ម៉ែនចាន់ដារ៉ា
