សម្ភារៈបម្រើការបោះឆ្នោត ដឹកដល់គ្រប់ការិយាល័យបោះឆ្នោតទូទាំងខេត្តប៉ៃលិន ត្រៀមបោះឆ្នោតស្អែកនេះ
លោក ចេង ញ៉ាន់ ប្រធានគណៈកម្មការរៀបចំការបោះឆ្នោតខេត្តប៉ៃលិន បានបញ្ជាក់ប្រាប់ថា នៅរសៀលថ្ងៃទី ២២ ខែកក្កដា នេះថា សម្ភារៈសម្រាប់បម្រើការបោះឆ្នោត ត្រូវបានគណៈកម្មការការិយាល័យបោះឆ្នោត និងរាប់សន្លឹកឆ្នោត មកទទួល ដឹកជញ្ជូន ទៅគ្រប់ការិយាល័យបោះឆ្នោត និងរាប់សន្លឹកឆ្នោតរួចរាល់ ដើម្បីត្រៀមការបោះឆ្នោត នាថ្ងៃទី ២៣ ខែកក្កដា ឆ្នាំ ២០២៣ ស្អែកនេះ។
ចំណែកឯបញ្ហាសន្តិសុខនៅទូទាំងខេត្តប៉ៃលិន ពិសេសគ្រប់ការិយាល័យបោះឆ្នោត និងរាប់សន្លឹកឆ្នោត គឺមានភាពល្អប្រសើរ មិនមានបាតុភាពអ្វីកើតឡើងគួរឲ្យកត់សម្គាល់នោះទេ។
លោក ចេង ញ៉ាន់ បញ្ជាក់បន្ថែមថា ចំពោះខេត្តប៉ៃលិន មានការិយាល័យបោះឆ្នោត និងរាប់សន្លឹកឆ្នោត ចំនួន ១២២ ការិយាល័យ និងមន្ត្រីគណៈកម្មការការិយាល័យបោះឆ្នោត និងរាប់សន្លឹកឆ្នោត ចំនួន ៧៣២ នាក់។ ចំណែកភ្នាក់ងារសន្តិសុខ បានមកប្រចាំការ ដើម្បីត្រៀមការពារសន្តិសុខ សណ្ដាប់ធ្នាប់ នៅតាមការិយាល័យបោះឆ្នោត និងរាប់សន្លឹកឆ្នោត ព្រមទាំងអមសម្ភារៈបម្រើការបោះឆ្នោត ទាំងទៅការិយាល័យបោះឆ្នោត និងមកកាន់ស្នាក់ការវិញ ពេលប្រជាពលរដ្ឋបោះឆ្នោតរួចរាល់ផងដែរ។
