សមាគមអតីតអ្នកបួសខ្មែរ ត្រូវបានក្រសួងមហាផ្ទៃ ទទួលស្គាល់ដោយចុះក្នុងបញ្ជីសមាគម នៅក្រសួងមហាផ្ទៃហើយ។ នេះបើតាមប្រកាសរដ្ឋមន្រ្តីក្រសួងមហាផ្ទៃ ចុះហត្ថលេខាជំនួស (ជ.រដ្ឋមន្ត្ត្រី) ដោយឯកឧត្តម ប៊ុន ហុន រដ្ឋលេខាធិការ ទទួលបន្ទុកការងារអង្គការ និងសមាគម នៅថ្ងៃទី១៨ ខែកក្កដា ឆ្នាំ២០២៣។

 

 

បើតាមប្រកាសលេខ ៣៧០២ ប្រក សមាគមអតីតអ្នកបួសខ្មែរ – Former Khmer Monk Association-FMA មានទីស្នាក់ការកណ្ដាលនៅបុរីប៉េងហួតស្ទឹងមានជ័យ ផ្ទះលេខ៤០ ផ្លូវលេខ៨ ក្រុមទី៩ ភូមិដំណាក់ធំមួយ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។

ក្រសួងបានតម្រូវឱ្យសមាគមធ្វើសកម្មភាព និងបំពេញកាតព្វកិច្ចស្របតាមច្បាប់សមាគម និងអង្គការមិនមែនរដ្ឋាភិបាល លិខិតបទដ្ឋានគិតិយុត្ត និងលក្ខន្តិកៈរបស់ខ្លួន ដោយមិនមានការរើសអើង ប្រកាន់ពូជសាសន៍ ពណ៌សម្បុរ ភេទ ឬសាសនាណាមួយជាដើម។

ភ្លាមៗក្រោយធ្លាក់ប្រកាសនេះ សមាគមអតីតអ្នកបួសខ្មែរ តាមរយៈទំព័រហ្វេសប៊ុក បានបង្ហាញការអបអរសាទរចំពោះអតីតអ្នកបួសខ្មែរ និងថែមទាំងបានចាត់ទុកប្រកាសរបស់ក្រសួងមហាផ្ទៃថាជាការចាប់ផ្ដើមមួយប្រកបដោយក្ដីសង្ឃឹមរបស់សមាគមអតីតអ្នកបួសខ្មែរទៀតផង។

«នេះជាការចាប់ផ្ដើមរបស់ពួកយើង, យើងសង្ឃឹមថាសមាគមអតីតអ្នកបួសខ្មែរ…នឹងក្លាយជាស្ពានមួយដ៏សំខាន់សម្រាប់បងប្អូនទាំងអតីតអ្នកបួស និងអ្នកមិនធ្លាប់បួស ក្នុងការស្វែងយល់ពីគ្នា ក៏ដូចជាជួយគ្នា ក្នុងឋានៈជាមនុស្សរួមសង្គម»។ នេះជាខ្លឹមសារបង្ហោះលើហ្វេសប៊ុកផេកសមាគមអតីតអ្នកបួស។

បើតាមប្រភពដដែល សមាគមអតីតអ្នកបួសខ្មែរ មានចក្ខុវិស័យចង់ឃើញអ្នកបួសខ្មែរ មានសាមគ្គីភាពគ្នា មានលទ្ធភាពរស់នៅថ្លៃថ្នូរ និងជាគំរូល្អក្នុងសង្គម និងមានគោលបំណង ពង្រីកទំនាក់ទំនង បង្កើតការចែករំលែកចំណេះដឹង បទពិសោធ បំណិនជីវិត និងជួយគ្នាក្នុងនាមជាអ្នកធ្លាប់រស់ក្រោមដំបូលវត្តអារាម។

ក្នុងដំណើរឆ្ពោះទៅកាន់ការបង្កើតសមាគមជាផ្លូវការនេះ ក្រុមអតីតអ្នកបួស ធ្លាប់ពិគ្រោះយោបល់គ្នានៅខេត្តមណ្ឌលគិរី កាលពីឆ្នាំ២០២២ រហូតឈានទៅរៀបចំសន្និបាតអតីតអ្នកបួសនៅខែមីនា ឆ្នាំ២០២៣ ដោយសម្រេចជាផ្លូវការបង្កើត សមាគមអតីតអ្នកបួសខ្មែរ (Former Khmer Monk Association-FMA)។

បច្ចុប្បន្ន កម្ពុជាមានវត្តអារាមចំនួន៥ ១៣៣វត្ត និងព្រះសង្ឃចំនួន៦៨ ៩៧៦អង្គ នៅទូទាំងប្រទេសកម្ពុជា។ នេះបើតាមរបាយការណ៍ស្ថិតិវត្ត និងព្រះសង្ឃទូទាំងប្រទេសឆ្នាំ២០២៣ ចុះហត្ថលេខាដោយលោក ឈិត សុខុន រដ្ឋមន្រ្តីក្រសួងធម្មការ។

ក្នុងចំណោមវត្តអារាមចំនួន៥ ១៣៣វត្ត មាន៤ ៨៦៦វត្ត ជាគណៈមហានិកាយ ដែលមានព្រះសង្ឃចំនួន ៦៦ ៦០៩អង្គនៅទូទាំងប្រទេស។ ចំណែកគណៈធម្មយុត្តវិញ មានវត្តចំនួន ២៦៧ និងមានព្រះសង្ឃចំនួន ២ ៣៥៨អង្គនៅទូទាំងប្រទេស។ នេះបើតាមរបាយការណ៍ឯកឧត្តមរដ្ឋមន្រ្តីធម្មការដដែល។

គួរកត់សម្គាល់ដែរថាកាលពីមួយខែមុន ថ្នាក់ដឹកនាំ ទីប្រឹក្សាជាន់ខ្ពស់ និងសមាជិក សមាគមអតីតអ្នកបួសខ្មែរ ក៏បានជួបសំណេះសំណាល និងស្វាគមន៍លោកគ្រូ សាន សុជា អធ្វើជាទីប្រឹក្សាជាន់ខ្ពស់របស់សមាគមអតីតអ្នកបួសខ្មែរផងដែរ បន្ទាប់ពីលោកគ្រូលាចាកសិក្ខាបទ៕