ភ្នំពេញ ៖ កាលពីព្រឹក ព្រលឹមថ្ងៃទី ២៤ ខែ វិច្ឆិកា ឆ្នាំ២០១៤ អគ្គិភ័យ បានឆាបឆេះ ផ្សារចាស់យ៉ាងសន្ធោរសន្ធៅ ដែលធ្វើឱ្យមានការភ្ញាក់ផ្អើលយ៉ាងខ្លាំង ចំណែកក្រុម អាជីវករ បានភ័យ ស្លន់ស្លោរ រត់ឆ្លេរឆ្លាយ៉ាងតក់ស្លុត ។
តាមការឲ្យដឹងពីសាក្សីដែលបានឃើញហេតុការណ៍នេះ បានឲ្យដឹងថា ពីដំបូង អគ្គិភ័យ បានឆាបឆេះ ចេញពីតូបប៉ែកខាងកើតជាប់ផ្លូវធំ រួចហើយភ្លើងបានរីករាល ដាល ទៅកាន់ តូប ផ្សេងៗទៀត ក្លាយទៅជាអណ្ដាតភ្លើងក្រហម ឆ្អិនឆ្អៅយ៉ាង សន្ធោសន្ធៅនៅក្នុងផ្សារ ។
ចំពោះគ្រោះអគ្គិភ័យខាងលើនេះ អាជ្ញាធរនិងសមត្ថកិច្ចមិនទាន់អាចបញ្ជាក់ពី មូលហេតុ ពិតប្រាកដនិង ទំហំនៃការខូចខាតនៅឡើយទេ ដោយស្ថិត ក្រោមការស្រាវជ្រាវនិងសួរនាំនៅឡើយ ។
នៅក្នុងគ្រោះអគ្គិភ័យនេះ មិនបានធ្វើឱ្យបាត់បង់ ជីវិតរបស់ប្រជាពលរដ្ឋ ណាម្នាក់នោះឡើយ ហើយការវាយតម្លៃចុងក្រោយ នៃការខូចខាត បានកើនឡើងជាង ៨០ ភាគរយ ។
ពាក់ព័ន្ធនឹងដំណោះស្រាយជូនជនរងគ្រោះ មិនទាន់បញ្ជាក់ពី ដំណោះស្រាយយ៉ាងណានោះ ទេ ហើយក៏ត្រូវរង់ចាំគោលការណ៍ ពីថ្នាក់ដឹកនាំជាមុនសិនដែរ ។
គួរបញ្ជាក់ថា តូបទាំងអស់នៅក្នុង ផ្សារ មានចំនួន ៩១៤ តូប ។
អាជ្ញាធរមានសមត្ថកិច្ចបានអំពាវនាវឲ្យមានការប្រុងប្រយ័ត្ន ចំពោះករណីអគ្គិភ័យ ដែលអាចបង្កមហន្តរាយ បំផ្លាញទ្រព្យសម្បត្តិ ជាពិសេស ពេលរដូវធ្លាក់ខ្យល់ ដូច្នេះ នៅតាមផ្ទះនិង កន្លែង អាជីវកម្មផ្សេង ត្រូវមានបំពង់ពន្លត់អគ្គិភ័យ ដើម្បីសម្រាប់សង្គ្រោះដោយខ្លួនឯង ទម្រាំរថយន្ដពន្លត់អគ្គិភ័យមកជួយអន្តរាគមន៍ ៕
