កំពត ៖ តាមសេចក្តីរាយការណ៍ពីប្រជាពលរដ្ឋដែលរស់នៅក្នុងភូមិសាស្ត្រស្រុកដងទង់ ខេត្តកំពតបានឲ្យដឹងថា ករណីប្រើរំសេវបំផ្ទុះយកថ្មតាមក្រហែងភ្នំ នៅចំណុចភ្នំស្រូវ ជួរភ្នំក្បាលទីង ស្ថិតក្នុងឃុំខ្ជាយខាងត្បូង ស្រុកដងទង់ខេត្តកំពត ហាក់មានសភាពកក្រើកជាបន្តបន្ទាប់ ដោយការបំផ្ទុះដែលមានសម្លេងដ៏កក្រើកដូចខាងលើ ហាក់គ្មានការរំខានដល់អាជ្ញាធរឬស្ថាប័នជំនាញសោះឡើយ ។
ប្រភពដដែលបានបញ្ជាក់អះអាងថា ការបំផ្ទុះផ្ទាំងថ្មនៅតាមក្រហែងភ្នំបើទោះជាត្រូវបានប្រជាពលរដ្ឋរស់នៅទីនោះជ្រើសយកជាមុខរបរសម្រាប់បំបែកថ្មលក់យកកម្រៃបែបណាក៏ដោយ ប៉ុន្តែហាក់ប្រឈមនឹងហានិភ័យច្រើនរាប់មិនអស់ ដូចជាពួកគាត់ត្រូវឡើងខួងឬចោះប្រហោងថ្មមានកម្ពស់រាប់សិបម៉ែត្រដើម្បីដាក់រំសេងសម្រាប់បំផ្ទុះទម្លាក់ថ្មចុះក្រោម រួចយកញញួរវាយបំបែកជាបំណែកតូច ធំជាដើម។
ប្រភពខាងលើបានបង្ហើបទៀតថា ការបំផ្ទុះថ្មដោយប្រើជាតិរំសេវនៅចំណុចភ្នំខាងលើគឺបានកើតឡើងជាហូរហែររហូតដល់មានហេតុការអាក្រក់កើតឡើងកាលពីពេលថ្មីៗនេះបណ្តាលឲ្យបុរសម្នាក់ស្លាប់ដោយសារដាក់រំសេវបំផ្ទុះហើយត្រូវធ្លាក់ទាំងថ្ម ទាំងមនុស្សបណ្តាលឲ្យស្លាប់ភ្លាមៗយ៉ាងអណោចអធ័មបំផុត។
ប្រភពបានអះអាងថា ជនរងគ្រោះដែលស្លាប់នេះឈ្មោះ ង៉ែត ភឿន ភេទប្រុស អាយុ៤៣ឆ្នាំ រស់នៅភូមិឈ្លីតក្រោម ឃុំខ្ជាយខាងត្បូង ស្រុកដងទង់ ខេត្តកំពត ដោយមុនពេលកើតហេតុការណ៍ដ៏អាក្រក់នេះ គាត់បានឡើងលើក្រហែងភ្នំ ហើយចោះរូងដាក់រំសេវបំផ្ទុះ ដោយសារពេលផ្ទុះកម្លាំងរំញ័រមានអនុភាពខ្លាំងក្លា ទើបធ្វើឲ្យក្រហែងថ្មដែលជនរងគ្រោះពួននៅទីនោះរបើកធ្លាក់មកទាំងថ្ម ទាំងមនុស្សបណ្តាលឲ្យស្លាប់ភ្លាមៗយ៉ាងតក់ក្រហល់តែម្តង។
ជាមួយនឹងករណីដាក់រំសេវបំបែកយកថ្មនៅចំណុចភ្នំស្រូវ ជួរភ្នំក្បាលទីង ក្នុងឃុំខ្ជាយខាងត្បូង ស្រុកដងទង់ ខេត្តកំពតនេះ មហាជនក៏ដូចជាប្រជាពលរដ្ឋមួយផ្នែកធំនៃតំបន់ខាងលើ សំណូមពរដល់អាជ្ញាធរ ព្រមទាំងជំនាញ មេត្តាជួយមានវិធានការទប់ស្កាត់ជាបន្ទាន់ផង ព្រោះការដាក់រំសេវបំផ្ទុះលាន់ស្នូរដ៏កក្រើកបែបនេះពិតជាបង្កការរំខានដល់ពួកគាត់គ្រប់ពេលវេលា ពិសេសប្រឈមនឹងគ្រោះថ្នាក់គ្រប់ជំហានទៀតផង ។ ម្យ៉ាងទៀតការដាក់រំសេវបំផ្ទុះនេះ ថ្វីត្បិតមិនរាប់ជាអាជីវកម្មធំដុំ តែវាប្រឈមនឹងហានិភ័យគ្រប់ជំពូក ថែមទាំងបានបំផ្លាញភ្នំថ្ម ដែលជាសម្បតិ្តធម្មជាតិរបស់យើងផងដែរ ៕
សេង ណារិទ្ធ
