កំពត ៖ បុរសបីនាក់ដែលកន្លងមក អ្នកភូមិមានមន្ទិលសង្ស័យថា ចេះមន្តអាគម អូមអាម(ធ្វើអំពើ)បាននាំគ្នាចូលទៅធ្វើសម្បថនៅមុខព្រះពុទ្ធរូប ដោយពិធីនោះក៏មានការចូលរួមពីសំណាក់អាជ្ញាធរនិងសមត្ថកិច្ចមូលដ្ឋាន ព្រមទាំងប្រជាពលរដ្ឋក្នុងភូមិប្រមាណជាង១០០នាក់ផងដែរ។
ពិធីនេះបានធ្វើឡើងកាលពីព្រឹកថ្ងៃទី១៤ខែកុម្ភៈ ឆ្នាំ២០១៨ ស្ថិតក្នុងវត្ត អង្គជុំព្រះគោ ហៅវត្តអូរ ក្នុងភូមិដាសស្គរ ឃុំបឹងសាលាខាងជើង ស្រុកកំពង់ត្រាច ខេត្តកំពត។
តាមការប្រាប់ឲ្យដឹងពីលោក ស្រី អាន់ មេឃុំបឹងសាលាខាងជើង បានឲ្យដឹងថា ដោយសារកន្លងមកប្រជាពលរដ្ឋដែលរស់នៅក្នុងមូលដ្ឋានខាងលើ តែងមន្ទិលសង្ស័យមកលើបុរសចំនួនបីនាក់ថាពួកគាត់ចេះមន្តអាគម ឬអំពើ(ផ្លូវងងឹត)ខណៈមានអ្នកស្រុកឈឺថ្កាត់ម្តងៗ ហើយចេះតែសង្ស័យមកលើរូបអ្នកទាំងបីធ្វើសិល្ប៍មន្តអាគមផ្សេងៗមកលើអ្នកស្រុក ទើបពេលនេះពួកគាត់សុខចិត្តចូលមកកាន់ទីអារាមដើម្បីអុជធូបទៀន ធ្វើសច្ចាប្រណិធាននៅមុខព្រះពុទ្ធរូប ព្រះសង្ឃ ព្រះចៅអធិការវត្តនិងនៅចំពោះមុខប្រជាពលរដ្ឋរាប់រយនាក់នៅទីនោះ ដោយអ្នកទាំងបីបានច្រានចោលទាំងស្រុងនូវការស្មាននិងភាពមន្ទិលទាំងអម្បាល បែបអរូបិយខាងលើនេះ។លោកមេឃុំបានបញ្ជាក់ទៀតថា អ្នកទាំងបីដែលគេចេះតែសង្ស័យថាចេះអំពើផ្លូវងងឹតនោះរួមមាន៖ ទី១-ឈ្មោះ ប៉ុល សឿន ទី២-ឈ្មោះ អ៊ុង ឃៀម និងទី៣-ឈ្មោះ អ្នក សុខ។អ្នកទាំងបី មានទីលំនៅក្នុងភូមិ ដាសស្គរ ឃុំបឹងសាលាខាងជើង ស្រុកកំពង់ត្រាច ខេត្តកំពត។
ទាក់ទិននឹងជំនឿលើមន្តអាគមតាមផ្លូវងងឹតនេះ គេបានកត់សម្គាល់ឃើញមហាជន ពិសេសប្រជាពលរដ្ឋប្រមាណ៥០%តែងតែជៀជាក់និងមានការសង្ស័យពីការធ្វើអំពើមកលើបុគ្គលផ្ទាល់ឬប្រយោល ខណៈពេលមានបងប្អូនឬសាច់ញាតិ មានអ្នកណាឈឺថ្កាត់ក្នុងស្ថានភាពរាំុរ៉ៃ ដោយបញ្ហាបែបនេះភាគច្រើនបានកើតឡើងតាមតំបន់ជនបទ ដែលជាទូទៅប្រជាពលរដ្ឋតាមមូលដ្នានពុំសូវមានការយល់ដឹងទូលំទូលាយ ទៅលើផ្នែកវិជ្ជសាស្ត្រ ហើយជៀស៊ុបតែគ្រូខ្មែរ ដូចជាការបញ្ជាន់អារក្ស សែនប្រេន ស្រោចទឹកជាដើម។ចំពោះប្រជាពលរដ្ឋរស់នៅតាមទីប្រជុំជនឬទីក្រុងពួកគេភាគច្រើនផ្តោតលើផ្នែកវិជ្ជសាស្ត្រជាការសំខាន់ជាង ឯរឿងមន្តអាគម អូអាមក្តាមដុតបែបខាងលើ គឺមានអ្នកនិយមតិចតួចប៉ុណ្ណោះ។
ដូច្នេះបងប្អូនប្រជាពលរដ្ឋ នៅពេលមានជំងឺឈឺថ្កាត់ធ្ងន់ធ្ងរ គួរនាំគ្នាទៅរកគ្រូពេទ្យព្យាបាលជំងឺជាបន្ទាន់ ដើម្បីសង្គ្រោះអាយុជីវិត សូមកុំប្រកាន់យកនូវជំនឿអរូបិយឬជឿលើមន្តអាគមនេះទៀតអី ព្រោះការជឿលើផ្លូវងងឹតអាចជាការលាបពណ៌រវាងគ្នានិងគ្នា ថែមទាំងអាចកាប់សម្លាប់គ្នា ដោយសារការភាន់ច្រឡំរឿងការចោទប្រកាន់ពីការធ្វើអពើ អាបធ្មប់ ដែលនាំបង្កជាភាពជ្រួលច្របល់ពេញស្រុកភូមិ នាំបង្កអសន្តិសុខ ពិសេសទាក់ទងនិងភូមិ ឃុំមានសុវត្ថិភាពផងដែរ៕
សេង ណារិទ្ធ
