កំពត ៖ ដើម្បីពង្រឹងមិត្តភាពសាមគ្គីភាពនិងកិច្ចទំនាក់ទំនងសហប្រតិបត្តិការរវាងខេត្តទាំងពីរដែលមានព្រំដែនជាប់គ្នាឲ្យបានកាន់តែល្អប្រសើរឡើងថែមទៀតនោះ នៅថ្ងៃសុក្រ ០៩រោច ខែមាឃ ឆ្នាំរកា នព្វស័ក ព.ស២៥៦១ ត្រូវថ្ងៃទី០៩ខែកុម្ភៈ ឆ្នាំ២០១៨ លោក ជាវ តាយ អភិបាលនៃគណៈអភិបាលខេត្តកំពត បានដឹកនាំប្រតិភូ ក្នុងជួរគណៈអភិបាលខេត្តថ្នាក់ដឹកនាំមន្ទីរអង្គភាពមួយចំនួនជុំវិញខេត្ត ដើម្បីទៅចូលរួមសួរសុខទុក្ខនិងអបអរជូនពរថ្នាក់ដឹកនាំបក្ស និងរដ្ឋខេត្តគៀងយ៉ាងនៃសាធារណរដ្ឋសង្គមនិយមវៀតណាមក្នុងឱកាសបុណ្យចូលឆ្នាំថ្មីប្រពៃណីជាតិវៀតណាមឈានចូលមកដល់នាពេលដ៏ខ្លីខាងមុខនេះ។
នៅក្នុងឱកាសនៃការជួបសំណេះសំណាលដាច់ដោយឡែកពីគ្នានៅឯសាលាខេត្ត និងនៅមន្ទីរគណបក្សខេត្តគៀងយ៉ាង លោកផាម វ៉ូហុង ប្រធានគណៈកម្មាធិការប្រជាជនខេត្តគៀងយ៉ាង និងលោក ង្វៀន ថាញ់ងី លេខាគណៈកម្មាធិការគណបក្សខេត្តគៀងយ៉ាង បានសំដែងការស្វាគមន៍ដោយភាព រាក់ទាក់ ចំពោះថ្នាក់ដឹកនាំនិងប្រតិភូខេត្តកំត ដែលតែងតែបាន ចូលរួមអបអរសារទរនិងជូនពរឆ្នាំថ្មីប្រពៃណីជាតិ នៃប្រទេសទាំងពីររវាងគ្នាទៅវិញទៅមក ។ពិសេសសម្រាប់ខេត្តទាំងពីរដែលមានព្រំដែនជាប់ព្រំគ្នាគឺខេត្តកំពតនិងខេត្តគៀងយ៉ាងវៀតណាម ជារៀងរាល់ឆ្នាំដោយអនុវត្តមិនដែលអាក់ខានឡើយ។
ថ្នាក់ដឹកនាំនៃខេត្តទាំងពីរ (កំពត-គៀងយ៉ាង) ក៏បានចាត់ទុថាកាយវិការសកម្មភាពនាពេលនេះគឺពិតជាបាននាំមកនូវ ចំណងមិត្តភាព សាមគ្គីភាព ជាបងប្អូនដែលមានព្រំដែនជាប់គ្នា និងធ្វើកិច្ចសហប្រតិបត្តិការរវាងខេត្តទាំងពីរ ខេត្តកំពត និងខេត្តគៀងយ៉ាងបានកាន់តែរីកចម្រើនពីមួយថ្ងៃទៅមួយថ្ងៃ ពិសេសធ្វើឲ្យព្រំដែនខេត្តទាំងពីរប្រកបដោយកិច្ចសហប្រតិបត្តិការ សន្តិសុខសណ្ដាប់ធ្នាប់និងការអភិវឌ្ឍន៍ដើម្បីប្រយោជន៍ប្រទេស និងប្រជាជនខេត្តទាំងពីរ កំពត-គៀងយ៉ាងបានកាន់តែល្អថែមទៀត។
លោក ជាវ តាយ អភិបាលខេត្តកំពត ក្នុងនាមក្រុមប្រឹក្សាខេត្ត គណៈអភិបាល មន្ត្រីរាជការ កងកម្លាំងប្រដាប់អាវុធនិងប្រជាពលរដ្ឋខេត្តកំពត ក៏បានសំដែងការអបអរសាទរ ជាមួយថ្នាក់ដឹកនាំ បក្ស និងរដ្ឋ កម្មាភិបាល យុទ្ធជន យុទ្ធនារី និងប្រជាជនវៀតណាម សម្រាប់ខេត្តគៀងយ៉ាងជាបងប្អូន ហើយក្នុងឱកាសបុណ្យចូលឆ្នាំថ្មីប្រពៃណីជាតិវៀតណាមខាងមុខនេះសូមឲ្យចំណងមិត្តភាពនេះ បានកាន់តែរីកចម្រើនជាលំដាប់ទ្វេរដងថែមទៀត។
ក្នុងឱកាសនោះលោក អភិបាលខេត្តកំពតក៏បានបន្តលើកឡើងពីកិច្ចសហប្រតិបត្តការល្អលើគ្រប់វិស័យនៃខេត្តទាំងពីរ កំពត-គៀនយ៉ាង ក្នុងនោះរួមមានវិស័យអប់រំ សុខាភិបាល ពាណិជ្ជកម្ម កសិកម្ម ជាពិសេសសន្តិសុខ សណ្ដាប់ធ្នាប់សាធារណៈ មានភាពរីកចម្រើនជាបន្តបន្ទាប់ ក្រោមការដឹកនាំនៃខេត្តទាំងពីរ ដូចជាកិច្ចការពារសន្តិសុខតាមបណ្ដោយព្រំដែន រវាងខេត្តទាំងពីរ បានផ្ដល់នូវភាពអនុគ្រោះឲ្យគ្នាទៅវិញទៅមកបានល្អ ហើយបានបង្កលក្ខណៈងាយស្រួលឲ្យប្រជាជននៃខេត្តទាំងពីរ ជាសាច់ញាតិបងប្អូន បានសួរសុខទុក្ខគ្នា និងប្រកបមុខរបររកទទួលទាន មានភាពសុខសាន្ដ និងរីកចម្រើនជាលំដាប់។ជាមួយនេះ លោកអភិបាលខេត្តកំពតក៏បានប្រសិទ្ធិពរសូមឲ្យចំណងមិត្តភាព សាមគ្គីភាពជាបងប្អូនរវាងខេត្តកំពត និងខេត្ត គៀងយ៉ាងស្ថិតស្ថេរជាអមតៈ និងធ្វើកិច្ចសហប្រតិបត្តិការបានកាន់តែរឹងមាំល្អប្រសើរឡើងស្របតាមស្មារតីនៃកិច្ចព្រមព្រៀងប្រទេសទាំងពីរ ៕
សេង ណារិទ្ធ
