គណបក្សនយោបាយចំនួន១៨ ត្រូវបាន គ.ជ.ប សម្រេចទទួលស្គាល់ជាផ្លូវការ លើការចុះបញ្ជីឈរឈ្មោះបោះឆ្នោតជ្រើសតាំងតំណាងរាស្ត្រ នីតិកាលទី៧ (Video inside)
(ភ្នំពេញ)៖ គណៈកម្មាធិការជាតិរៀបចំការបោះឆ្នោត (គ.ជ.ប) បានសម្រេចទទួលស្គាល់ជាផ្លូវការគណបក្សនយោបាយចំនួន១៨ លើការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣។ ដោយឡែកគណបក្សភ្លើងទៀន និងគណបក្សមហាសាមគ្គីជាតិខ្មែរ ត្រូវបាន គ.ជ.ប បដិសេធដោយសារមិនបានបំពេញត្រឹមត្រូវតាមលក្ខខណ្ឌ និងច្បាប់កំណត់។
តាមរយៈសេចក្តីប្រកាសព័ត៌មាន គ.ជ.ប បានឱ្យដឹងថា ក្នុងដំណាក់កាលចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ មានគណបក្សនយោបាយចំនួន២០ បានដាក់ពាក្យសុំចុះបញ្ជីនៅ គ.ជ.ប។
បន្ទាប់ពីបានពិនិត្យ និងពិភាក្សាយ៉ាងល្អិតល្អន់លើឯកសារម្តងមួយៗរួចមក អង្គប្រជុំ គ.ជ.ប បានសម្រេចដូចខាងក្រោម៖
ទី១៖ ឯកភាពជាគោលការណ៍លើឯកសារពាក់ព័ន្ធសម្រាប់ជ្រើសរើសសមាសភាព គណៈកម្មការការិយាល័យបោះឆ្នោត ដែលរួមមាន៖
*សេចក្តីជូនដំណឹងស្តីពីការជ្រើសរើសសមាសភាពគណៈកម្មការការិយាល័យ-បោះឆ្នោត ផ្សព្វផ្សាយតាមប្រព័ន្ធផ្សព្វផ្សាយ
*សេចក្តីជូនដំណឹងនៃការជ្រើសរើស និងភារកិច្ចរបស់សមាសភាពគណៈកម្មការ ការិយាល័យបោះឆ្នោត
*សេចក្តីណែនាំស្តីពីនីតិវិធីនៃការធ្វើសម្ភាសន៍ជ្រើសរើសសមាសភាពគណៈកម្មការ ការិយាល័យបោះឆ្នោត
*លិខិតជម្រាបជូន លោក លោកស្រី ប្រធានគណៈកម្មការរាជធានី ខេត្តរៀបចំការបោះឆ្នោត និងប្រធានគណៈកម្មការឃុំ សង្កាត់រៀបចំការបោះឆ្នោត អំពី សេចក្តីណែនាំស្តីពីការជ្រើសរើសសមាសភាពគណៈកម្មការិយាល័យបោះឆ្នោត។
យោងតាមឯកសារខាងលើ គ.ជ.ប នឹងធ្វើការជ្រើសរើសសមាសភាពគណៈកម្មការការិយាល័យបោះឆ្នោត សរុបទូទាំងប្រទេសចំនួន ១៤២,៧៣៤រូប ដែលជាមន្ត្រីជាប់កិច្ចសន្យារយៈពេលខ្លី ដើម្បីបម្រើការងារនៅតាម គណៈកម្មការការិយាល័យបោះឆ្នោតទូទាំងប្រទេស។ ចំពោះកាលបរិច្ឆេទនៃការជ្រើសរើសនឹងត្រូវធ្វើការផ្សព្វផ្សាយតាមរយៈសេចក្តីជូនដំណឹងនៅក្នុងអំឡុងខែមិថុនា ឆ្នាំ២០២៣។
ទី២៖ គ.ជ.ប សម្រេចបដិសេធការចុះបញ្ជីគណបក្សនយោបាយឈរឈ្មោះបោះឆ្នោតជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣ របស់គណបក្សមហាសាមគ្គីជាតិខ្មែរ ដែលមាន៧ មណ្ឌលរាជធានី ខេត្ត ដោយមូលហេតុគណបក្សមហាសាមគ្គីជាតិខ្មែរ មិនបានភ្ជាប់មកជាមួយនូវប្រកាសស្តីពីការចុះឈ្មោះក្នុងបញ្ជីគណបក្សនយោបាយនៅក្រសួងមហាផ្ទៃ ដែលមានបញ្ជាក់នីត្យានុកូលកម្ម។
ក្នុងដំណើរការពិនិត្យពាក្យសុំចុះបញ្ជីរបស់គណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ មានគណបក្សនយោបាយ ចំនួន៥ ត្រូវបាន គ.ជ.ប ចេញលិខិតជូនដំណឹងឱ្យបំពេញបន្ថែមចំណុចខ្វះខាត ហើយគណបក្សនយោបាយ ចំនួន៣ បានបំពេញត្រឹមត្រូវជូន គ.ជ.ប វិញ គឺគណបក្សស្ត្រីដើម្បីស្ត្រី គណបក្សខ្មែរអភិវឌ្ឍន៍សេដ្ឋកិច្ច និងគណបក្សខ្មែរឈប់ក្រ៕
