កំពង់ឆ្នាំង ៖ ប្រជាពលរដ្ឋប្រុសស្រី ក្មេងចាស់ សរុបចំនួន៥០នាក់ កើតមានអាការៈ ក្អួតចង្អោរ វិលមុខ ចុកពោះ រាគ ធីងធោង ក្នុងរយៈពេល៣ថ្ងៃមកនេះ ទី១៤-១៥-១៦ ខែឧសភា ឆ្នាំ២០២៣ សង្ស័យពុលនំបញ្ចុកក្នុងពិធីភ្ជាប់ពាក្យកូនចៅអ្នកភូមិ ដែលប្រព្រឹត្តទៅនៅក្នុងភូមិទ័ពតាឡាត់ ឃុំជៀប ស្រុកទឹកផុស ខេត្តកំពង់ឆ្នាំង ។
តាមអាជ្ញាធរបានឲ្យដឹងថា កាលពីព្រឹកថ្ងៃទី១៤ ខែឧសភា ឆ្នាំ២០២៣ នៅក្នុងភូមិឃុំខាងលើ មានរៀបចំពិធីភ្ជាប់ពាក្យ ចំនួន២កន្លែងផ្សេងគ្នា ក្នុងភូមិតែមួយ ម្ចាស់កម្មវិធីរៀបចំទទួលទានអាហារ នំបញ្ចុកដូចគ្នា តែផ្ទះមួយធ្វើនំបញ្ចុកខ្លួនឯង និងផ្ទះមួយទៀតទិញនំបញ្ចុកពីភូមិផ្សេងមកទទួលទាន ស្រាប់តែនៅវេលាម៉ោង១០និង២០នាទីព្រឹក ផ្ទះដែលទិញនំបញ្ចុកពីភូមិផ្សេងមកទទួលទាននោះ អ្នកបរិភោគ បែជាកើតមានអាការៈ ក្អួតចង្អោរ ធីងធោង វិលមុខ សង្ស័យតែពុលនំបញ្ចុក ធ្វើឲ្យមនុស្សប្រុសស្រី ចាស់ក្មេង ចំនួន៣២នាក់ ត្រូវបានដឹកបញ្ជូនទៅមណ្ឌលសុខភាព មន្ទីរពេទ្យបង្អែកស្រុក ។ ចំណែកផ្ទះដែលធ្វើនំបញ្ចុកខ្លួនឯង អ្នកហូបពុំមានបញ្ហាអ្វីឡើយ ។
ជុំវិញករណីសង្ស័យពុលនំបញ្ចុក ក្នុងពិធីភ្ជាប់ពាក្យកូនចៅអ្នកភូមិ បង្កឲ្យភ្ញាក់ផ្អើល អាជ្ញាធរ សមត្ថកិច្ច ក្រុមគ្រូពេទ្យចុះពិនិត្យស្រាវជ្រាវ ហើយនៅមានបន្តអ្នកកើតអាការៈក្អួតចង្កោរបន្ទាប់បន្ទាប់ទៀត គិតមកដល់ល្ងាចថ្ងៃទី១៦ ខែឧសភា ឆ្នាំ២០២៣ អ្នកកើតអាការៈបែបនេះកើនដល់៥០នាក់ ស្រី២៨នាក់ ក្នុងរយៈពេល៣ថ្ងៃមកនេះ ។
តាមការស្រាវជ្រាវ នំបញ្ចុកដែលម្ចាស់កម្មវិធីទិញយកមកទទួលទាន គឺគាត់ទិញនំបញ្ចុក ពីភូមិស្រែតាជៃ ខាងលិច ឃុំអភិវឌ្ឍន៍ ស្រុកទឹកផុស ។
តែទោះជាយ៉ាងណាក្តី បន្ទាប់ពីមានពលរដ្ឋ កើតអាការៈក្អួតចង្អោរ ចុកពោះ វិលមុខ សង្ស័យថាពុលនំបញ្ចុកនោះ កម្លាំងអាជ្ញាធរ ខេត្ត ស្រុក ឃុំ សមត្ថកិច្ចជំនាញ មន្ទីរអង្គភាពពាក់ព័ន្ធ ចុះទៅសាកសួរសុខទុក្ខពលរដ្ឋ ដល់មន្ទីរពេទ្យ និងធ្វើការស្រាវជ្រាវ តែមិនទាន់ធ្វើសេចក្តីសន្និដ្ឋានជាក់លាក់ណាមួយនៅឡើយ ថាមកពីនំបញ្ចុក ឬបន្លែ នោះទេ ៕
