រដ្ឋបាលក្រុងស្វាយរៀង ប្រារព្វពិធីចម្រើនព្រះជន្មព្រះករុណា ព្រះបាទព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា គម្រប់ខួបព្រះជន្ម៧០ យាងចូល៧១ព្រះវស្សា នៅវត្តព្រៃឆ្លាក់

ខេត្តស្វាយរៀង: ដោយអនុវត្តតាមសេចក្តីណែនាំរបស់ក្រសួងធម្មការ និងសាសនា និងដោយមានការណែនាំរបស់ លោកម៉ែនវិបុល អភិបាលនៃគណៈអភិបាលខេត្តស្វាយរៀង
មន្ទីរធម្មការ និងសាសនាខេត្តស្វាយរៀង និងរដ្ឋបាលក្រុងស្វាយរៀង បានសហការជាមួយព្រះសច្ចកល្យាណ យ៉ន សុខសាន្ត ព្រះរាជាគណៈថ្នាក់កិត្តិយស ព្រះវិន័យអនុគណក្រុងស្វាយរៀង និងជាព្រះចៅអធិការវត្តព្រៃឆ្លាក់ បានរៀបចំពិធីចម្រើនព្រះជន្មព្រះករុណា ព្រះបាទព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា គម្រប់ខួបព្រះជន្ម៧០ យាងចូល៧១ព្រះវស្សា។

ជាក់ស្ដែង នៅព្រឹកថ្ងៃទី១៤ ខែឧសភា ឆ្នាំ២០២៣
លោកណុបចំរើន អភិបាលក្រុងស្វាយរៀង បានដឹកនាំក្រុមការងារ ចូលរួម ពិធីចម្រើនព្រះជន្មព្រះករុណា ព្រះបាទព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា គម្រប់ខួបព្រះជន្ម៧០ យាងចូល៧១ព្រះវស្សា។

ក្នុងឪកាសនោះក៏មាន និមន្តចូលរួមពីព្រះសច្ចកល្យាណ យ៉ន សុខសាន្ត ព្រះចៅអធិការវត្តព្រៃឆ្លាក់
លោកទីវសុភា ប្រធាន មន្ទីរធម្មការ និងសាសនាខេត្តស្វាយរៀង លោកលោកស្រីអភិបាលរងក្រុង អាជ្ញាធរមូលដ្ឋានដែលពាក់ពន្ធ័ព្រះសង្ឃអង្គ នាក់ជាច្រើននាក់ផងដែរ។

លោកទីវសុភា ប្រធាន មន្ទីរធម្មការ និងសាសនាខេត្តស្វាយរៀង បានអាន ព្រះជីវប្រវត្តិ ព្រះ​ករុណា ព្រះបាទ​សម្ដេច ​ព្រះបរមនាថ នរោត្ដម-សីហមុនី ព្រះមហាក្សត្រ​នៃព្រះរាជាណាចក្រកម្ពុជា ទ្រង់ប្រសូតនៅថ្ងៃទី ១៤ ខែឧសភា ឆ្នាំ​១៩៥៣។ ព្រះបាទសម្តេច ព្រះបរមនាថ នរោត្តមសីហមុនី ទ្រង់ត្រូវបានក្រុមប្រឹក្សារាជសម្បត្តិជ្រើសតាំងឲ្យឡើងសោយរាជ្យបន្តពីព្រះបិតា ក្រោយពីព្រះបាទនរោត្តមព្រះសីហនុដាក់រាជ្យកាលពីថ្ងៃទី០៧ ខែ តុលា ឆ្នាំ២០០៤។

ដោយមុននឹងឡើងគ្រងរាជ្យ ព្រះអង្គមានស្នាព្រះហត្ថលល្បីល្បាញទៅលើឯកអគ្គរាជទូតវប្បធម៌នៅអង្គការយូនេស្កូ (UNESCO) ព្រមទាំងជាគ្រូបង្ហាត់របាំបុរាណដ៍ចំណាន។

ក្នុងឪកាសនោះ លោកណុបចំរើន អភិបាលក្រុងស្វាយរៀង បានអាន
សារថ្វាយព្រះពរជូនដល់ព្រះអង្គ ក្នុងឱកាសថ្ងៃចម្រើនព្រះជន្មវស្សា របស់ព្រះករុណាព្រះបាទសម្តេចព្រះបរមនាថនរោត្តម សីហមុនី ព្រះមហាក្សត្រព្រះជន្ម
គម្រប់៧០ យាងចូល៧១ព្រះវស្សា ដោយព្រះបង្គំយើងខ្ញុំទាំងអស់គ្នា  ជាគណអភិបាលក្រុងស្វាយរៀងទាំងមូល សូមព្រះបរមរាជានុញ្ញាតសម្តែងនូវអភិវន្ទនកិច្ច និង អំណរសាទរ ដោយស្មោះអស់ពីដួងចិត្ត
ចូលរួមថ្វាយនូវព្រះសព្វសាធុការពរជ័យ បវរសួរស្តី សិរីមង្គល វិបុលសុខមហាប្រសើរគ្រប់ប្រការប្រកបដោយកត្តញ្ញូតាធម៌ និង កត្តវេទិតា យ៉ាងជ្រាលជ្រៅបំផុតចំពោះព្រះរាជបញ្ញាញាណ និងព្រះរាជសកម្មភាពដ៏ឧត្តុង្គឧត្តមថ្លៃថ្លារបស់ព្រះករុណាជាអម្ចាស់ក្នុងវិស័យព្រះពុទ្ធសាសនាអប់រំសិក្សាធិការ សង្គមកិច្ច សុខមាលភាព ជីវភាព រស់នៅរបស់ប្រជាពលរដ្ឋ និង ការងារកិច្ចការការបរទេសបានចូលរួមចំណែកដ៏សំខាន់
ក្នុងការលើកកំពស់កិត្យានុភាពជាតិ រួមទាំងការអភិវឌ្ឍន៍មាតុភូមិកម្ពុជា ជាទីស្នេហាលើគ្រប់វិស័យ អោយរឹទ្ធតែមានភាពរីកចម្រើនជឿនលឿនខ្លាំងក្លា។
ទូលព្រះបង្គំយើងខ្ញុំសូមសម្តែងនៅទឹកចិត្តស្វាមីភក្ត័និងដង្ហែតាមមាគ៌ានយោបាយដ៏ភ្លឺស្វាងពោរពេញដោយព្រះរាជគតិបណ្ឌិតរបស់ព្រះករុណាព្រះអម្ចាស់ជីវិតលើត្បូងសំរាប់ជានិមិត្តរូបនៃឯករាជ្យភាពអធិបតេយ្យភាព វឌ្ឍនភាព និង បូរណភាពទឹកដី នៃព្រះរាជាណាចក្រកម្ពុជា។

ដោយ ទូលព្រះបង្គំយើងខ្ញុំទាំងអស់គ្នា សូមលើកហត្ថបួងសួងដល់គុណបុណ្យព្រះរតនត្រយ័ និងសូមតេជ្ជះបារមីទេវតាថែរក្សា
មហាស្វេតច្ឆត្រ ព្រមទាំងបារមីនៃព្រះវិញ្ញាណក្ខន្ធ ព្រះអង្គព្រះមហាក្សត្រព្រះមហាក្សត្រយ៉ានី សូមជួយប្រោសព្រំ បីបាច់ថែរក្សាព្រះករុណាព្រះអម្ចាស់ជីវិតតំកល់លើត្បូង សូមព្រះអង្គប្រកបដោយព្រះរាជបញ្ញាញាណ ភ្លឺថ្លាកាយពលសេរីវឌ្ឍនា ព្រះរាជសុខភាពល្អបរិបូណ៌ព្រះជន្មាយុយឺនយូជាងរយព្រះវស្សា។