ខេត្តស្វាយរៀង៖ ឯកឧត្តមប៉េង ពោធិ៍សា អភិបាលរងខេត្តស្វាយរៀងបានថ្លែងបញ្ជាក់ថា តម្លៃនៃសុខសន្តិភាពគឺមានសារៈសំខាន់ណាស់ក្នុងការអភិវឌ្ឍប្រទេសឲ្យរីកចម្រើនលើគ្រប់វិស័យ ហើយ ព្រះវិហារនិងសមិទ្ធផលនានានៅវត្តក្រសាំងជ្រំ ក្រុងស្វាយរៀងដែលធ្វើពិធីបញ្ចុះខណ្ឌសីមានិងឆ្លងនាពេលនេះ ក៏កើតចេញដោយសារតែប្រទេសមានសុខសន្តិភាពពេញលេញ ក្រោមការដឹកនាំប្រកបដោយ កិត្តិបណ្ឌិតរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលអនុញ្ញាតិ ឲ្យប្រជាពលរដ្ឋអាចប្រារព្ធពិធីសាសនាទៅតាមបែបប្រពៃណីរៀងៗខ្លួន ។
ការថ្លែងបែបនេះរបស់អភិបាលរងខេត្តស្វាយរៀង ខណៈដែលឯកឧត្តម តំណាងឯកឧត្តមម៉ែន វិបុល អភិបាលខេត្ត អញ្ជើញចូលរួម កាត់ឬសសីមានិងឆ្លងសមិទ្ធផលនានា នៅវត្តក្រសាំងជ្រំស្ថិតនៅក្នុងសង្កាត់សង្ឃ័រ ក្រុងស្វាយរៀង ខេត្តស្វាយរៀងនាព្រឹកថ្ងៃទី៩ខែឧសភាឆ្នាំ២០២៣ ដែលមានការចូលរួមពីអាជ្ញាធរក្រុង ប្រជាពុទ្ធបរិស័ទជាច្រើនអ្នកផងដែរ។
ថ្លែងក្នុងឱកាសនោះឯកឧត្តមប៉េង ពោធិ៍សា បានថ្លែងផ្តាំផ្ញើរការសួរសុខទុក្ខពីសំណាក់សម្តេចកិត្តិសង្គហបណ្ឌិតម៉ែន សំអនប្រធានក្រុមការងារគណបក្សប្រជាជនកម្ពុជាចុះជួយខេត្តស្វាយរៀងនិងឯកឧត្តមម៉ែន វិបុល អភិបាលខេត្ត ដែលជានិច្ចកាលសម្ដេចនិងឯកឧត្តមអភិបាលខេត្តតែងតែគិតគូរអំពីសុខទុក្ខរបស់ប្រជាពលរដ្ឋនៅខេត្តស្វាយរៀងហើយបានដោះស្រាយនូវទុក្ខលំបាកនានាជូនប្រជាពលរដ្ឋបានទាន់ពេលវេលាផងដែរ។
ឯកឧត្តមអភិបាលរងខេត្តក៏បានថ្លែងអំណរគុណដល់សប្បុរជនជិតឆ្ងាយដែលបានចូលរួមដោយទឹកចិត្ត កសាងព្រះវិហារនិងសមិទ្ធផលនានានៅវត្តក្រសាំងជ្រំ ក្រុងស្វាយរៀងយើងនេះ ឱ្យលេចជាសមិទ្ធផល រួចរាល់ជាស្ថាពរហើយរៀបចំពិធីបញ្ចុះខណ្ឌសីមានិងឆ្លងដែលមានការចូលរួមពីអាជ្ញាធរ ប្រជាពលរដ្ឋជាច្រើនកុះករផងដែរ។
ឯកឧត្តមប៉េង ពោធិ៍សា ក៏បានថ្លែងអំពាវនាវឱ្យអាជ្ញាធរ មន្ត្រីរាជការគ្រប់លំដាប់ថ្នាក់ នៅក្រុងស្វាយរៀង ត្រូវបន្តបំពេញការងារឲ្យកាន់តែមានប្រសិទ្ធភាព ថែមទៀតត្រូវអនុវត្តគោលនយោបាយភូមិ ឃុំ មានសុវត្ថិភាពឱ្យមានប្រសិទ្ធភាពខ្ពស់និងដោះស្រាយសេវាសាធារណៈផ្សេងៗជូនប្រជាពលរដ្ឋឲ្យមានតម្លាភាពនិងគណនីយភាព ជាពិសេសត្រូវចុះឲ្យដល់មូលដ្ឋានជាក់ស្ដែងក្តាប់ឲ្យច្បាស់លាស់ពី កង្វះខាត សំណូមពរ ផ្សេងៗ ដែលប្រជាពលរដ្ឋនៅមូលដ្ឋាន ត្រូវការជាចាំបាច់ ដើម្បីរួមចំណែកកាត់បន្ថយការលំបាក ភាពក្រីក្រ និងជួយលើកកម្ពស់ ជីវភាព រស់នៅរបស់ពួកគាត់ឲ្យកាន់តែល្អប្រសើរឡើងថែមទៀត។
នៅក្នុងឱកាសនោះឯកឧត្តមប៉េង ពោធិ៍សានិងក្រុមការងារ ក៏បាននាំនូវបច្ច័យចំនួន ៥លានរៀលប្រគេនដល់វត្តក្រសាំងជ្រំផងដែរ។
