ចេញផ្សាយ ថ្ងៃទី ០៦ ខែ ឧសភា ឆ្នាំ ២០២៣
ឯកឧត្តម ឃួង ស្រេង សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សរាជធានីភ្នំពេញ បានស្នើឱ្យប្រព័ន្ធផ្សព្វផ្សាយទាំងអស់ ជួយផ្សព្វផ្សាយឱ្យបានច្រើន ទូលំទូលាយ និងផ្សាយពីការពិតនៅប្រទេសកម្ពុជា ពិសេស ផ្សព្វផ្សាយអំពើល្អរបស់សម្តេចតេជោ ហ៊ុន សែន និងអំពើល្អរបស់គណបក្សប្រជាជនកម្ពុជា ដែលបានធ្វើកន្លងមក និងបាន និងកំពុងធ្វើនៅពេលនេះ។
ការស្នើឡើងបែបនេះរបស់ ឯកឧត្តម ឃួង ស្រេង បានធ្វើឡើងនាព្រឹកថ្ងៃសៅរ៍ ទី០៦ ខែឧសភា ឆ្នាំ២០២៣នេះ ក្នុងពិធីប្រកាសបញ្ចូលសមាជិកគណបក្សប្រជាជនកម្ពុជា មកពី សា្ថនីយទូរទស្សន៍ហង្សមាស, ក្រុមហ៊ុនថោន, ស្ថានីយទូរទស្សន៍ប៉ុស្តិ៍លេខ៣, សម្ព័ន្ធសារ ព័ត៌មានភាសាចិននៅកម្ពុជា នៅមន្ទីរបក្សរាជធានីភ្នំពេញ។
ឯកឧត្តម ឃួង ស្រេង បានមានប្រសាសន៍ថា យើងជាប្រព័ន្ធផ្សព្វផ្សាយ ត្រូវផ្សព្វផ្សាយឱ្យ បានច្រើនពីការពិតនៅកម្ពុជា ថាតើប្រទេសកម្ពុជា បានហែលឆ្លងការ លំបាកអ្វីខ្លះ យើងបានប្រឹងប្រែងធ្វើអ្វីខ្លះ រហូតធ្វើឱ្យប្រទេសមានការអភិវឌ្ឍរីកចម្រើន រហូតមកដល់ពេលនេះ ហើយនរណាជាអ្នកដឹកនាំប្រទេសមួយនេះឱ្យមានការអភិវឌ្ឍរីកចំរើន នោះគឺសម្តេចតេជោហ៊ុន សែន ប្រធានគណបក្សប្រជាជនកម្ពុជា។ ការបង្ហាញឱ្យឃើញពី អំពើល្អរបស់សម្តេចតេជោ ហ៊ុន សែន នឹងធ្វើឱ្យប្រជាពលរដ្ឋ គោរពស្រឡាញ់ នាំឱ្យកម្ពុជា ឈានឆ្ពោះទៅសម្រេចគោលដៅរបស់ខ្លួន នោះគឺជាប្រទេសមានចំណូលមធ្យមកម្រិតខ្ពស់ នៅឆ្នាំ២០៣០ និងចំណូលខ្ពស់នៅឆ្នាំ២០៥០ ខាងមុខ។
ក្នុងឱកាសនោះដែរ ឯកឧត្តម ឃួង ស្រេង បានលើកឡើងពីវីរភាព របស់សម្តេចតេជោហ៊ុន សែន ដែលបានលះបង់គ្រប់បែបយ៉ាង ទាំងយុវភាពនិងអាយុជីវិត ដើម្បីរំដោះប្រទេសជាតិចេញពីរបបប៉ុល ពត និងបានស្តារប្រទេសជាតិចេញពីចំណុចសូន្យ និងបានអភិវឌ្ឍន៍ប្រទេសជាតិឱ្យមានការរីកចម្រើនរហូតមកដល់បច្ចុប្បន្ននេះ។
ឯកឧត្តមក៏បានលើកឡើងពីទុក្ខវេទនារបស់ប្រជាពលរដ្ឋកម្ពុជា ក្នុងរបបប៉ុល ពតនោះផងដែរ ដោយក្នុងសម័យនោះ ប្រជាពលរដ្ឋគ្មានអីហូបចុកគ្រាប់គ្រាន់ និងការកាប់សម្លាប់ យ៉ាងព្រៃផ្សៃបំផុត។
សម្តេចតេជោហ៊ុន សែន ប្រធានគណបក្សប្រជាជនកម្ពុជា ជា អ្នកស្វែងរក សន្តិភាពនិងការអភិវឌ្ឍជូនជាតិ។ ដូច្នេះក្មួយៗ ត្រូវរួមគ្នាការពារសន្តិភាពឱ្យបានគង់វង្ស។ មានសន្តិភាព ទើបមានឱកាសអភិវឌ្ឍន៍ប្រទេសឱ្យរីកចម្រើនជឿនលឿនបាន។ ដើម្បីការពារសន្តិភាពបាន មានតែបោះឆ្នោតជូនគណបក្សប្រជាជនកម្ពុជាទេ។
ឯកឧត្តមក៏បានស្នើឱ្យសមាជិកម្នាក់ ក្លាយជាសន្លឹកឆ្នោត១សន្លឹករបស់គណបក្ស ប្រជាជនកម្ពុជា នៅពេល បោះឆ្នោត២០២៣ នេះ ដើម្បីយើងមានឱកាស កសាងអភិវឌ្ឍន៍ ប្រទេស ឱ្យរីកចម្រើនរុងរឿងបន្ថែមទៀត។
សូមបញ្ជាក់ថា ពិធីប្រកាសសាខាគណបក្សរបស់ប្រព័ន្ធផ្សព្វផ្សាយទាំង៤ស្ថាប័ននេះ រួមមាន៖ ស្ថានីយទូរទស្សន៍ហង្សមាស ចំនួន៨៦រូប, ក្រុមហ៊ុនថោនចំនួន៨២រូប ,ស្ថានីយ ទូរទស្សន៍ប៉ុស្តិ៍លេខ៣ ចំនួន២៧រូប, សម្ព័ន្ធសារព័ត៌មានភាសាចិន នៅកម្ពុជាចំនួន២៨រូប សរុបចំនួន២២៣រូប៕ដោយ សួស សំរិត សម្រួលផ្សាយដោយ៖ ធូ កុសល
