មន្ត្រីជំនាញមន្ទីរធម្មការ និងសាសនាខេត្ត បានលើកឡើងកាលពីថ្ងៃទី៤ ខែឧសភា ឆ្នាំ២០២៣ ថា ជំនឿនៃការគោរពបូជាចំពោះអាស្រមរូបសំណាកលោកយាយម៉ៅ គឺជាទំនាមទម្លាប់សីលធម៌ដ៏ល្អមួយរបស់ខ្មែរ ដើម្បីរំលឹកដល់គុណ និងដាស់តឿនចិត្តឲ្យខ្លាចបាប និងខ្មាសបាប ប្រឹងប្រែងកសាងតែអំពើល្អតាមកាយ វាចា ចិត្ត។ ហើយបច្ចុប្បន្ន ជំនឿទាំងនោះ មិនទាន់សាបសូន្យទេ ថែមទាំងបានផ្តល់ផលប្រយោជន៍ច្រើនដល់សង្កមផងដែរ។
លោក នាក់ យិតថូ ប្រធានមន្ទីរធម្មការ និងសាសនាខេត្តកំពត បានប្រាប់ឲ្យដឹងថា វិស័យពុទ្ធចក្រមានការរីកចម្រើនគួរឲ្យកក់សំគាល់ ព្រះសង្ឃ និងវត្តអារាមនៅក្នុងខេត្តមានការកើនឡើងជាដំដាប់ ដោយសារតែប្រជាពលរដ្ឋមានជំនឿ និងធ្វើការបូជាចំពោះគុណព្រះរតនត្រៃ មានព្រះពុទ្ធ ព្រះធម៌ និងព្រះសង្ឃង។ បច្ចុប្បន្នខេត្តកំពតមានវត្តអារាមសរុបចំនួន ២៧១វត្ត ព្រះសង្ឃងមានចំនួន ២៦១៤អង្គ។ ដោយឡែក ចំពោះជំនឿគោរពបូជាអាស្រមរូបសំណាកលោកយាយ ម៉ៅ នៅតាមតំនប់ផ្សេងៗជាច្រើននៅក្នុងខេត្ត មិនមានអ្វីខុសឆ្គងចំពោះសាសនាទេ ដោយសារតែវាគឺជាទំនាមទម្លាប់ សីលធម៌ដ៏ល្អមួយរបស់ខ្មែរ ដើម្បីរំលឹកដល់គុណបុព្វការីជន និងដាស់តឿនចិត្តឲ្យខ្លាចបាប និងខ្មាសបាប ប្រឹងប្រែងកសាងតែអំពើល្អតាមកាយ វាចា ចិត្ត។ លោកបានបញ្ជាក់ថា ទំនាមទម្លាប់នេះ មិនអាចលប់បំបាត់បានទេ ដោយសារតែជំនឿមួយនេះបានផ្តល់ផលប្រយោជន៍ច្រើនដល់អ្នកគោរពផ្ទាល់ និងសង្គមផងដែរ។
ប្រជាពលរដ្ឋលក់គ្រឿងដង្វាយបានប្រាប់ឲ្យដឹងថា ក្រៅពីមុខរបរធ្វើស្រែចំការ ពួគាត់បានលក់គ្រឿងដង្វាយដើម្បីបានកម្រៃមួយចំនួនជួយទ្រទ្រង់ជីវភាព ។ពួកគាត់បញ្ជាក់ថា បើអ្នកជឿកាន់តែច្រើន ពួកគាត់ក៏លក់ដាច់កាន់តែច្រើន សម្រាប់ថ្ងៃចុងសប្តាហ៍អាចលក់គ្រឿងដង្វាយបានចន្លោះពី ២០ ទៅ៦០ចាន ឬ ឈុត។
ភ្ញៀវទេសចរ និងអ្នកមកលាបំណន់ ដែលចូលទៅថ្វាយបង្គំលោកយាយម៉ៅ បានប្រាប់ឲ្យដឹងដែរថា ការដែលចូលទៅថ្វាយបង្គំ ឬបួងសួង វាជាទម្លាប់តពីដូនតា ឳពុកម្តាយគាត់មក ហើយគ្រប់ពេលធ្វើដំណើឆ្លងកាត់អាស្រមលោកយាយម៉ៅ ពួកគាត់ត្រូវតែឈប់ចូលទិញគ្រឿងសក្ការៈបូជាថ្វាយលោកយាយម៉ៅ។
យ៉ាងណាក៏ដោយប្រធានមន្ទីរធម្មការ និងសាសនាខេត្ត បានបញ្ជាក់ដែរថា ពលរដ្ឋគ្រប់រូបមានសិទ្ធិក្នុងជឿ ឬគោរពដើរតាមសាសនាមួយណាក៏បាន និងថារាល់សាសនាតែងអប់រំមនុស្សឲ្យល្អ ប៉ុន្តែលោកស្នើសុំថា មុនពេលជឿទៅលើជំនឿអ្វីមួយ ត្រូវមានការពិចារណា មានហេតុផលឲ្យច្បាស់លាស់ ដើម្បីកុំឲ្យចាញ់បោកបុគ្គលមួយចំនួនតូច ដែលយកសាសនាធ្វើជាខែលដើម្បីបម្រើដល់ប្រយោជន៍ផ្ទាល់ខ្លួន ៕ កែវ វណ្ណ:
