(កំពត)៖ វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តកំពត ឆ្នាំ២០១៧ ត្រូវបានធ្វឡើងកាលពីព្រឹកថ្ងៃទី១៦ ខែវិច្ឆកា ឆ្នាំ២០១៧ ស្ថិតនៅស្រុកបន្ទាយមាស ក្នុងឃុំ បន្ទាយមាសខាងលិច ក្រោមអធិបតីភាព លោកស្រី កង សៅរ៍ធន សមាជិកា ក្រុមប្រឹក្សាខេត្ត លោកលី សាវ៉េត អភិបាលរងខេត្ត និងមានការចូលរួម ពីសំណាក់មន្ត្រីអាជ្ញាធរមូលដ្ឋាន មន្ទីរអង្គភាពជុំនាញថ្នាក់ខេត្ត ស្រុក និងប្រជាពលរដ្ឋប្រមាណចំនួន២០១នាក់ ស្រី៦៥នាក់។
អង្គវេទិកានេះ ធ្វើឡើងក្នុងគោលបំណង បង្កើតបាននូវវប្បធម៌ នៃការពិភាក្សា និងលើកកម្ពស់គណនេយ្យភាពតាមបែបប្រជាធិបតេយ្យ និងធ្វើការបង្ហាញទិសដៅសខាន់ៗរួមមាន៖
១-ផ្ដល់ព័ត៌មានអំពីសមិទ្ធិផលរបស់រដ្ឋបាលខេត្តដែលសម្រេចបានក្នុងឆ្នាំ ២០១៦។
២-ផ្ដល់ព័ត៌មានពីសកម្មភាពអាទិភាពនៃការងារ អភិវឌ្ឍន៍មូលដ្ឋាន ឆ្នាំ២០១៧។
៣-រាយការណ៍ពីសកម្មភាពដែលរដ្ឋបាលខេត្ត បានឆ្លើយតបនឹងលទ្ធផល នៃវេទិកា ឆ្នាំ២០១៦។
៤- ពិភាក្សាក្នុងការរិះរកដំណោះស្រាយរួមគ្នាលើប្រធានបទជាក់លាក់ ដែលជាបញ្ហាប្រឈមនៅក្នុងស្រុក មិនទាន់ដោះស្រាយបានជោគជ័យ។
អង្គវេទិកានេះ បានបើកឱកាសដល់ប្រជាពលរដ្ឋ លើកជាសំណួរ សំណូមពរ អនុសាសន៍ និងការឆ្លើយបំភ្លឺ ដំណោះស្រាយ លើប្រធានបទ រួមមាន៖ការផ្ដល់់សេវាសាធារណៈសេវារដ្ឋបាល និងការអភិវឌ្ឍមូលដ្ឋាន។
ចំពោះវេទិកានេះ ក៏បានតម្រូវនឹងផ្តល់សិទ្ធិដល់ប្រជាពលរដ្ឋគ្រប់មជ្ឈដ្ឋាន អាចសួរ និយាយ សំណូមពរ ស្របតាមរបៀបវារៈ ដោយមិនអនុញ្ញាតឲ្យនិយាយពាក់ព័ន្ធនឹងការងារនយោបាយ ការបញ្ចេញមតិប្រាកចាកពីសីលធម៌ក្នុងសង្គម ឬការនិយាយដោយពាក្យមិនសមរម្យ និងប្រើពាក្យអសុរោះឡើយ។/ ណារិទ្ធ
