(កែប)៖ សិក្ខាសាលា ស្តីពី “កាប្រមូលព័ត៌មានប្រភេទជំងឺទាក់ទងនឹងជំងឺវិជ្ជាជីវៈ” ត្រូវបានរៀបចំធ្វើឡើងនៅក្នុងផ្ទះសំណាក់”ផាមហាវស៍” ស្ថិតក្នុងទឹកដីខេត្តកែប នៅព្រឹកថ្ងៃទី១៧ខែវិច្ឆិកា ឆ្នាំ២០១៧ ក្រោមការចូលរួម ពីសំណាក់លោកវេជ្ជបណ្ឌិត ហ៊ុយ ហានសុង រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ លោក ឡេង តុង ប្រធាននាយកដ្ឋានពេទ្យការងារ និងជាទីប្រឹក្សាអមក្រសួង លោកឌិត ឡាយហ៊ាក ប្រធានមន្ទីរការងារនិងបណ្តុះបណ្តាលវិជ្ជាជីវៈខេត្តកែប លោកស្រី ផន សុផារី តំណាងអង្គការ WHO និងលោកស្រី ប៉ោ ដួង តំណាងអង្គការ ILO ព្រមទាំងមានការចូលរួមពីវេជ្ជបណ្ឌិតល្បីៗ មកពីមន្ទីរពេទ្យកាលម៉ែត្រ មន្ទីរពេទ្យមិត្តភាពខ្មែរសូវៀត និងមន្ទីរពេទ្យព្រះកុសុមៈ។
លោក ឌិត ឡាយហ៊ាក ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តកែប បានឲ្យដឹងថា៖ កន្លងមកខាងមន្ទីរបានយកចិត្តទុកដាក់ នៅលើផ្នែកសុខភាពជាចម្បង ដល់បងប្អូនជាកម្មករ និយោជិតដែលកំពុងបំពេញការងារ ស្ថិតតាមសហគ្រាសនានាទូទាំងខេត្ត។ជាទូទៅក្នុងខេត្តកែប ថ្វីត្បិតពុំទាន់មានរោងចក្រ ឬសហគ្រាសធំៗ ប៉ុន្តែយ៉ាងហោចណាស់ក៏មានសហគ្រាសខ្នាតមធ្យម សម្រាប់ដំណើរការនិងផ្តល់ការងារដល់បងប្អូនកម្មករ កម្មការនីបានមួយផ្នែកធំដែរ។
ដោយឡែក លោកឡេង តុង ប្រធាននាយកដ្ឋានការងារ បានលើកឡើងថា យោងតាមអង្គការពិភពលោក ជំងឺវិជ្ជាជីវៈ គឺជាជំងឺទាំងឡាយណាដែលកើតឡើងជាដំបូងដោយសារលទ្ធផលនៃការស្រូបទាញកត្តាហានិភ័យបណ្តាលមកពីសកម្មភាពការងារ ដែលក្នុងនោះកត្តាបរិស្ថានស្ថិតនៅកន្លែងធ្វើការដើរតួនាទីយ៉ាងសំខាន់។ ជាមួយនេះ កត្តាហានិភ័យដទៃទៀតនាំមកនូវការវិវត្តន៍ជំងឺទាំងទងនឹងជំងឺវិជ្ជាជីវៈ។លោកថា អង្គការអន្តរជាតិខាងការងារ បានឲ្យនិយមន័យជំងឺវិជ្ជាជីវៈ គឺផ្តោតទៅលើជំងឺទាំងឡាយណា ដែលកើតឡើងដោយលទ្ធផលនៃកត្តាហានិភ័យបណ្តាលមកពីសកម្មភាពការងារតែម្តង។អង្គការអន្តរជាតិខាងការងារ បានរៀបចំបញ្ជីឈ្មោះជំងឺវិជ្ជាជីវៈលើកដំបូងតាំងពីឆ្នាំ១៩២៥ដែលបានរួមចំណែកយ៉ាងសំខាន់ក្នុងដំណើរការនៃការរៀបចំគោលនយោបាយស្តីពីជំងឺវិជ្ជាជីវៈ នៅលើសកលលោក។នាបច្ចុប្បន្ន បញ្ជីឈ្មោះជំងឺវិជ្ជាជីវៈរបស់អង្គការអន្តរជាតិខាងការងារ ត្រូវបានកែសម្រួលជាលើកចុងក្រោយនៅឆ្នាំ២០១០ដែលបានកំណត់ប្រភេទជំងឺទាក់ទងនឹងជំងឺវិជ្ជាជីវៈចំនួន៤ រួមមាន៖
ទី១-ជំងឺវិជ្ជាជីវៈបណ្តាលមកពីការស្រូបយកភ្នាក់ងារចម្លងដែលកើតឡើងពីសកម្មភាពការងារ ដូចជាជំងឺទាក់ទងនឹងការស្រូបយកសារធាតុគីមី រូបសាស្ត្រ ជីវសាស្ត្រនិងជំងឺឆ្លងឬជំងឺកើតឡើងពីប៉ារ៉ាសីុត។
ទី២-ជំងឺវិជ្ជាជីវៈកើតឡើងទៅតាមផ្នែកនៃប្រព័ន្ធសារពាង្គកាយ ដូចជាជំងឺទាក់ទងនឹងផ្លូវដង្ហើម ស្បែក ប្រព័ន្ធសាច់ដុំ និងជំងឺទាក់ទងនឹងចិត្តសាស្ត្រ។
ទី៣-ជំងឺវិជ្ជាជីវៈបណ្តាលឲ្យកើតមហារីក ដូចជាជំងឺទាក់ទងនឹងការស្រូបយកសារធាតុគ្រោះថ្នាក់(សារធាតុអាបេស្តូស សារធាតុគីមីដែលកំណត់ក្នុងសមាសធាតុធ្ងន់)។
ទី៤- ជំងឺវិជ្ជាជីវៈផ្សេងៗទៀតដូចជា Miners’ nystagmus ជាដើម។
ក្នុងពិធីបើកសិក្ខាសាលានេះ លោកវេជ្ជបណ្ឌិត ហ៊ុយ ហាងតុង បានគូសបញ្ជាក់ថា៖តាមរយៈនេះយើងបានកំណត់រោគវិនិច្ឆ័យជំងឺទាក់ទងនឹងជំងឺវិជ្ជាជីវៈមានការស្មុគស្មាញ ដោយបាននិងកំពុងជម្រុញការចូលរួមពីគ្រប់ភាគីពាក់ព័ន្ធដែលត្រូវទាមទារឲ្យមានការសិក្សាលម្អិតទៅលើប្រវតិ្តការងារ និងកំណត់ត្រាផ្នែកសុខភាពរបស់កម្មករនិយោជិត ការតាមដានផ្នែកវេជ្ជសាស្ត្រ អំពីរោគសញ្ញា និងលក្ខណៈវិនិច្ឆ័យនៃជំងឺទាក់ទងនឹងជំងឺវិជ្ជាជីវៈ និងការសិក្សាអង្កេតឡើងវិញទៅលើឯកសារទិន្នន័យសុវត្ថិភាព និងការវាយតម្លៃហានិភ័យនៅកន្លែងធ្វើការ ព្រមទាំងកត្តាទាំងឡាយពីសកម្មភាពការងារផងដែរ។
លោកវេជ្ជបណ្ឌិត បានសង្កត់ធ្ងន់ថា៖ ជំងឺវិជ្ជាជីវៈ គឺជាប្រភេទជំងឺអាចមានផលប៉ះពាល់យ៉ាងធ្ងន់ធ្ងរ មកលើសេរីរាង្គ ដោយវាអាចបង្កក្នុងរយៈពេលមិនទៀងទាត់ មានខ្លី វែង តក់ក្រហល់ ពិសេសជំងឺអេដស៍ ដែលជាប្រភេទជំងឺមួយគួរឲ្យតក់ស្លុតបំផុត ដែលជាវីវុសមួយទាក់ទងនឹងផ្នែកជីវសាស្ត្រ។លោកវេជ្ជបណ្ឌិត ក៏បានវាយតម្លៃថា៖ ជាលទ្ធផលក្រសួងការងារ និងបណ្តុះបណ្តាលវិជ្ជាជីវៈ បានសម្រេចបាននូវលទ្ធផលការងារសំខាន់ៗ រួមមាន៖ការកែលម្អប្រព័ន្ធអធិការកិច្ចការងារ និងអធិការកិច្ចផ្នែកសុខភាព និងសុវត្ថិភាពការងារ ការជម្រុញ ការរៀបចំសេវាពេទ្យនៅតាមសហគ្រាស គ្រឹះស្ថាន ការរៀបចំសេចក្តីព្រាងបញ្ជីឈ្មោះជំងឺវិជ្ជាជីវៈដោយយោងទៅលើបញ្ជីឈ្មោះជំងឺវិជ្ជាជីវៈ របស់អង្គការអន្តរជាតិខាងការងារ តាមរយៈលទ្ធផលនៃការសិក្សាស្រាវជ្រាវចំនួន០៣រួមមាន ស្ថានភាពបច្ចុប្បន្ននៃការប្រើប្រាស់សារធាតុគីមី ការវាស់វែងពីវិធានការការពាររបស់កម្មករ បញ្ហាសុខភាព និងការសិក្សាឡើងវិញស្តីពីជំងឺមហារីកជាដើម។/
ណារិទ្ធ
