(កំពត)៖ នៅសណ្ឋាគារកំពតឌីយ៉ាម៉ង់នាព្រឹកថ្ងៃទី១៤ ខែវិច្ឆិកា ឆ្នាំ ២០១៧ នេះមន្ទីរទេសចរណ៍ខេត្តកំពតបានបើកសិក្ខាសាលាមួយស្តីពីការលើកកម្ពស់យល់ដឹងអំពីទេសចរណ៍ ក្រោមអធិបតីភាព លោកឡេង វិបុលនាយករងរដ្ឋបាលសាលាខេត្តកំពត តំណាងដ៍ខ្ពង់ខ្ពស់ លោក ចាន់ ចេស្តា អភិបាលនៃគណអភិបាលខេត្ត និងមានការអញ្ជើញចូលរួមជាកិត្តិយសពីថ្នាក់ដឹកនាំ អភិបាល អភិបាលរងក្រុង ស្រុក មេឃុំ ចៅសង្កាត់និងថ្នាក់ដឹកនាំមន្ទីរស្ថាបន័នានាជុំវិញខេត្ត ក្រុមអាជីវករលក់ដូរតាមរម្មណីដ្ឋាន ភោជនីយដ្ឋាននិងផ្ទះសំណាក់សរុបចំនួនជាង១០០នាក់ផងដែរ។
លោក ឡេង វិបុល នាយករងរដ្ឋបាលសាលាខេត្ត បានថ្លែងថា៖ បច្ចុប្បន្នផ្អែកតាមសភាពការវិវត្តន៍នៃវិស័យទេសចរណ៍ទាំងលើសកលលោកនិងក្នុងតំបន់ វិស័យទេសចរណ៍កំពុងដើរតួរយ៉ាងសំខាន់ក្នុងការអភិវឌ្ឍន៍សេដ្ឋកិច្ចសង្គម។ ចំពោះវិស័យទេសចរណ៍នៅកម្ពុជារាជរដ្ឋាភិបាលក្រោមការដឹកនាំដ៏ឈ្លាសវៃប្រកបដោយគតិបណ្ឌិតរបស់សម្តេចអគ្គមហាសេនាបតីតេជោហ៊ុន សែន ជានាយករដ្ឋមន្ត្រីបានដាក់ចេញគោលនយោបាយទេសចរណ៍កម្ពុជា ជាទេសចរណ៍វប្បធម៌និងធម្មជាតិហើយក៏កំពុងមានតួនាទីយ៉ាងសំខាន់ក្នុងការទាក់ទាញភ្ញៀវទេសចរណ៍អន្តរជាតិមកទស្សនាកម្ពុជាព្រះរាជាណាចក្រអច្ឆរិយះបានយ៉ាងច្រើនជាកត្តាជុំរុញក្នុងការរួមចំណែកកសាងសេដ្ឋកិច្ច,សង្គមផ្តល់ឱកាសការងារប្រាក់ចំណូលលើកកំពស់ជីវភាពរស់នៅរបស់ប្រជាពលរដ្ឋនិងកាត់បន្ថយភាពក្រីនិងត្រូវបានទទួលស្គាល់ថាជា”មាសបៃតង”។
លោកបានថ្លែងបន្តថា៖ ខេត្តកំពតគឺជាខេត្តមួយដែលមានការអភិវឌ្ឍន៍លើគ្រប់វិស័យ ហើយក៏ជាខេត្តសម្បូណ៌ទៅដោយធនធានធម្មជាតិដ៏ស្រស់បំព្រងគួរជាទីមនោរម្យនិងប្រកបដោយសក្តានុពលទេសចរណ៍ មានកន្លែងកម្សាន្តច្រើនប្រកបដោយភាពទាក់ទាញនិងជាខេត្តដែលមានឈ្មោះបោះសំឡេងខាងវិស័យទេសចរណ៍នាតំបន់ឆ្នេរសមុទ្រតាំងពីដើមរៀងមក។ មិនតែប៉ុណ្ណោះខេត្តកំពត ក៏មានកិត្តិយសទទួលបានចូលជាសមាជិកនៃក្លឹបឆ្នេរសមុទ្រដែលស្អាតបំផុតនៅលើសាកលលោកហើយដែលត្រូវបានសម្តេចអគ្គមហាសេនាបតីតេជោ ហ៊ុន សែន ប្រមុខរាជរដ្ឋាភិបាលកម្ពុជាប្រសិទ្ឋិនាមជា”តាររារះនាទិសនិរតី”។ លោកឡេង វិបុលក៍បានរំលឹកផងដែរអំពីកំណើនភ្ញៀវទេសចរណ៍ដែលមកទស្សនាលេងកំសាន្តក្នុងខេត្តកំពតគិតត្រឹមតែខែតុលា ឆ្នាំ២០១៧នេះ មានចំនួនសរុប១•៣១៦•២៦០នាក់ក្នុងនោះទេសចរណ៍ក្នុងស្រុកចំនួន១•១៧៨•៧០៦នាក់និងទេសចរណ៍អន្តរជាតិចំនួន១៣៧•៥៥៤នាក់។ បានផ្តល់ការងារជូនប្រជាពលរដ្ឋដោយផ្ទាល់ប្រមាណជាង៣•៤០០នាក់និងមានប្រយោលជាច្រើនទៀត ព្រមទាំងនាំមកនូវចំណូលដល់ខេត្តរាប់ម៉ឺនលានរៀលទៀតផង។
បន្ទាប់ពីការថ្លែងបើកអង្គសិក្ខាសាលាពីសំណាក់លោកឡេង វិបុល រួចមក លោក សយ ស៊ីណុល ប្រធានមន្ទីរទេសចរណ៍ខេត្តបានឡើងធ្វើបទបង្ហាញស្តីអំពីការលើកកម្ពស់ការយល់ដឹងអំពីទេសចរណ៍។
ដោយលោកបានគូសបញ្ជាក់យ៉ាងច្បាស់នូវវិស័យទេសចរណ៍នៅកម្ពុជាជារួម ដោយឡែកក្នុងទឹកដីខេត្តកំពតដែលជាខេត្តមានសក្តានុពលលើគ្រប់វិស័យជាពិសេសគឺវិស័យទេសចរណ៍តែម្តងដែលកំពុងតែមានការចាប់អារម្មណ៍ពីសំណាក់ភ្ញៀវទេសចរណ៍ជាតិនិងអន្តរជាតិនិងកំពុងតែមានភាពរីកចម្រើនជាលំដាប់។
នៅក្នុងខ្លឹមសារនៃបទបង្ហាញដែលបានលើកឡើងអស់រយៈមួយព្រឹករបស់លោក សយ ស៊ីណុល ប្រធានមន្ទីរទេសចរណ៍ខេត្ត បានធ្វើឲ្យសមាជិកសមាជិកានិងក្រុមអាជីវករបំរើការលក់ដូរម្ហូបអាហារនៅតាមរម្មណីយដ្ឋាន ភោជនីយដ្ឋាន និងផ្ទះសំណាក់កាន់តែមានការយល់ដឹងខ្ពស់អំពីវិស័យទេសចរណ៍ដូចជាការទទួលបដិសណ្ឋារកិច្ចភ្ញៀវ ចេះឆ្នៃប្រឌិតនូវរាល់មុខម្ហូប ការតុបតែងកន្លែងទទួលភ្ញៀវ រៀបចំឲ្យមានភាពទាក់ទាញ។ល។ ជាពិសេសជាងនេះគឺការនិយាយស្តីទៅកាន់ភ្ញៀវមានចរឹកសុភាពរាបសារទន់ភ្លន់ មានសុជីវធម៌ល្អ ដើម្បីជាភាពទាក់ទាញផងដែរ។/ ណារិទ្ធ
