កែប ៖ ដោយមានការជឿរជាក់ក្នុងព្រះពុទ្ធសាសនា ប្រកបដោយទឹកចិត្តជ្រះថ្លាផងនោះ នៅព្រឹកថ្ងៃទី២២ខែតុលា ឆ្នាំ២០១៧ រដ្ឋបាលខេត្តកែប ដែលមានលោក កែន សត្ថា អភិបាលនៃគណៈអភិបាលខេត្តកែបជាប្រមុខ បានដឹកនាំមន្ត្រីរាជការក្រោមឱវាទ ធ្វើពិធីដង្ហែអង្គកឋិនទានសាមគ្គីវេរ ប្រគេនព្រះសង្ឃគង់ចាំព្រះវស្សាអស់កាលត្រីមាសនៅវត្តសត្ថាធម្មវិហារ(ភ្នំពោន)ដែលមានទីតាំងស្ថិតក្នុងឃុំពងទឹក ស្រុកដំណាក់ចង្អើរ ខេត្តកែប។
អង្គកឋិនទានសាមគ្គីនេះ គឺក្រោមការផ្តួចផ្តើមពីសំណាក់ លោកកែន សត្ថា អភិបាលខេត្ត ដោយបានមូលមតិគ្នាជាឯកច្ឆន្ទរវាងមន្ទីរស្ថាប័ន អង្គភាពពាក់ព័ន្ធនានា មន្ត្រីរាជការ ក្រុមការងារគ្រប់លំដាប់ថ្នាក់ អាជ្ញាធរដែនដីគ្រប់ស្រទាប់ សប្បុរសជន និងប្រជាពលរដ្ឋដែលជាពុទ្ធបរិស័ទជិតឆ្ងាយផងដែរ ដើម្បីប្រមូលបច្ច័យវេរប្រគេនដល់ព្រះសង្ឃសម្រាប់ចាត់ចែងកសាងសមិទ្ធផលនានាក្នុងវត្ត ពិសេសការកសាងព្រះវិហារ ព្រោះតែទីអារាមមួយនេះទើបតែសាងសង់ថ្មីដែលមានអាយុទើបតែជាងមួយឆ្នាំប៉ុណ្ណោះ ហើយក៏ត្រូវការចាំបាច់បំផុតនូវសម្ភារៈព្រមទាំងថវិកា ដើម្បីបុកគ្រឹះសាងសង់សសរព្រះវិហារថ្មីបន្តទៀត។
បើតាមទំនៀមទំលាប់ប្រពៃណីព្រះពុទ្ធសាសនា នៅចុងវសន្តរដូវរយៈពេល២៩ថ្ងៃ គឺចាប់ពីថ្ងៃ ១រោជខែភទ្របទ្ររហូតដល់ថ្ងៃពេញបូរមីនាខែកក្តិក ពុទ្ធបរិស័ទតែងតែប្រារព្វបុណ្យកឋិនទានវេរ ប្រគេនដល់ព្រះសង្ឃដែលបានបញ្ចប់ចំ
ណាំព្រះវស្សាជារៀងរាល់ឆ្នាំ ដោយការប្រារព្វនេះ បើតាមពុទ្ធបញ្ញតិ្តក្នុង១ឆ្នាំ ទីអារាមនិមួយៗទទួលបានអង្គកឋិនទានតែមួយដងប៉ុណ្ណោះ ហើយបុណ្យនេះមានខ្លឹមសារសំខាន់ សម្រាប់ពុទ្ធសាសនិកជនដែលគោរពស្រឡាញ់ ទ្រទ្រង់ព្រះពុទ្ធសាសនា តែងនាំយកនូវត្រៃចីវរជាប្រធាន អមដោយបរិក្ខារជាច្រើនទៀត ដែលជាប្រដាប់ប្រើប្រាស់ក្នុងជីវភាពព្រះសង្ឃ។
ក្រៅពីអត្ថន័យខាងលើនេះ ពិធីបុណ្យកឋិន គឺជាការបង្ហាញនូវទឹកចិត្តជ្រះថ្លា ក្នុងការបំពេញកុសលប្រកបដោយជំនឿរលើមាគា៌ព្រះពុទ្ធសាសនា ហើយក៏ជាការឆ្លុះបញ្ចាំងពីការរួបរួមសាមគ្គីគ្នារវាងអាជ្ញាធរ មន្ត្រីរាជការ ប្រជាពលរដ្ឋជាពុទ្ធបរិស័ទ ព្រមទាំងព្រះសង្ឃ ដើម្បីជួយទ្រទ្រង់និងលើកតំកើងដល់វិស័យព្រះពុទ្ធសាសនា ឲ្យបានថ្កុំថ្កើងរុងរឿង។
បច្ច័យដែលបានមកពីការបរិច្ចាគទានក្នុងពិធីបុណ្យកឋិនទានសាមគ្គីនេះ មានចំនួន ៥៣.២៤៤.០០០រៀល ស្មើនឹងប្រហែល ១៣.៣០០ដុល្លាអាមេរិក។
សូមបញ្ជាក់ថា វត្តសត្ថាធម្មវិហារ(ភ្នំពោន)ត្រូវបានផ្តួចផ្តើមកសាងដោយរដ្ឋបាលខេត្តកែប ដោយបានសាងសង់នៅថ្ងៃទី១២ខែកញ្ញា ឆ្នាំ២០១៦ និងបានសម្ពោធដាក់ឲ្យដំណើរការ កាលពីថ្ងៃទី២៣ខែមករា ឆ្នាំ២០១៧កន្លងទៅនេះ ហើយបច្ច័យចំនួនខាងលើនឹងត្រូវវេរ ប្រគេនដល់ព្រះចៅអធិការវត្តសម្រាប់ប្រើប្រាស់តាមតម្រូវការចាំបាច់ផ្សេងៗ ព្រោះទីអារាមមួយនេះពិតជានៅមានការខ្វះខាតសម្ភារៈ និងធនធានជាច្រើនទៀតដើម្បីកសាងសមិទ្ធផលនានាក្នុងបរិវេណវត្តសត្ថាធម្មវិហារទាំងមូល។/
ណារិទ្ធ
