កំពត ៖ យុវជនម្នាក់បានស្លាប់ដោយសារលង់ទឹកព្រែកកំពង់បាយ ក្នុងហេតុការណ៍ដេញកាប់ប្រហារពីសំណាក់ក្រុមទំនើង នៅចំណុចស្ពានថ្មីក្នុងក្រុងកំពត កាលពីរាត្រីឆ្លងអាធ្រាតឈានចូលថ្ងៃទី២២ខែតុលា ឆ្នាំ២០១៧។
ដើមចមនៃការបាត់បង់ជីវិតនេះ ត្រូវបានប្រភពបង្ហាញថា នៅវេលាម៉ោង០២និង២០នាទីទៀបភ្លឺ ឈានចូលថ្ងៃទី២២ខែតុលា ឆ្នាំ២០១៧ គេឃើញជនអន្ធពាលមួយក្រុមបានជិះម៉ូតូដេញកាប់យុវជនបីនាក់ នៅលើស្ពានថ្មីក្នុងក្រុងកំពត ដែលជាកន្លែងកើតហេតុ ដោយខណៈនោះគេឃើញយុវជនទាំងបីរត់ប្រសាចនៅលើស្ពានថ្មីដោយការភិតភ័យ លុះឃើញក្រុមអន្ធពាលជិះម៉ូតូមានដាវសាម៉ូរ៉ៃដេញប្រកៀកប្រកិតបែបនេះ ក៏សម្រេចចិត្តលោតចុះទឹកព្រែកតែម្តង។ប្រភពខាងលើបានបញ្ជាក់ថា នៅពេលយុវជនរងគ្រោះទាំងបីនាក់លោតទឹកគេចពីការដេញកាប់របស់ក្រុមជនអន្ធពាល ពេលហែលឡើងគោកវិញ គឺឃើញតែពីរនាក់ប៉ុណ្ណោះ ចំណែកម្នាក់ទៀតបាត់ខ្លួនរកមិនឃើញ ទើបមានការឆោឡោ ភ្ញាក់ផ្អើលដល់សមត្ថកិច្ច ជួយរកទាំងយប់រហូតទល់ព្រឹកនៅតែមិនឃើញឡើយ។
ទាក់ទិននឹងករណីក្រុមជនអន្ធពាលជិះម៉ូតូប្រើដាវសាម៉ូរ៉ៃដេញកាប់ប្រហារ បណ្តាលឲ្យយុវជនម្នាក់ស្លាប់នេះ សមត្ថកិច្ចក្រុងកំពត បានប្រាប់ឲ្យដឹងថា មុនពេលកើតហេតុក្រុមយុវជនរងគ្រោះមានគ្នា៦នាក់បានដើរលេងតាមសួនច្បារក្នុងក្រុងកំពត ដោយប្រើមធ្យោបាយម៉ូតូ២គ្រឿង(មួយគ្រឿងជិះគ្នាបីនាក់)ហើយនៅពេលជិះម៉ូតូនៅវេលាដូចខាងលើមធ្យោបាយធ្វើដំណើររបស់ក្រុមក្មេងរងគ្រោះក៏អស់សាំង ទើបអ្នកបើកម៉ូតូបណ្តើរទៅរកកន្លែងចាក់សាំងនៅមុខក្លឹបដ្រាហ្គ្រិនដែលមានទីតាំងខាងលិចឈៀងខាងត្បូងស្ពានថ្មីក្រុងកំពត ហើយបានឲ្យយុវជនរងគ្រោះទាំងបីនាក់អង្គុយរង់ចាំនៅទីនោះ ទើបខាងក្រុមជនអន្ធពាលជិះម៉ូតូក្រវែលឃើញក៏ទាញដាវដេញកាប់ប្រហារដូចរឿងហុងកុងតែម្តង ប៉ុន្តែកាប់មិនត្រូវទេ ព្រោះជនរងគ្រោះរត់លឿនដែរ។ដោយឃើញសភាពមិនស្រួល ព្រមនឹងការភ័យតក់ស្លុតផង ក្រុមយុវជនរងគ្រោះទាំងនោះក៏លោតចុះទឹកព្រែកតែម្តងទៅ។
សមត្ថកិច្ចបានបញ្ជាក់ថា យុវជនដែលរងការដេញកាប់ប្រហារទាំង៣នាក់ក្នុងចំណោម៦នាក់នោះរួមមាន៖ ទី១.ឈ្មោះ លី លៀម ភេទប្រុស អាយុ១៩ឆ្នាំ ទី២.ឈ្មោះ រឿន លក្ខិណា ភេទប្រុស អាយុ២០ឆ្នាំ និងទី៣.ឈ្មោះ សេង អៀន ហៅពេជ្រ អាយុ២០ឆ្នាំ(បាត់ខ្លួន) ទាំងបីនាក់មានទីលំក្នុងភូមិត្រពាំងព្រីងខាងត្បូង ឃុំត្រពាំងព្រីង ស្រុកទឹកឈូ ខេត្តកំពត ។ ដោយឡែក ក្រុមបង្កមិនស្គាល់អត្តសញ្ញាណនៅឡើយ ព្រោះពួកគេបានជិះម៉ូតូគេចខ្លួនបាត់អស់។សមត្ថកិច្ចបានបន្តថា សពយុវជនឈ្មោះ សេង អៀន ហៅពេជ្រនេះបន្ទាប់ពីបាត់ខ្លួន ត្រូវបានក្រុមសង្គ្រោះនិងក្រុមគ្រួសារហៅគ្នីគ្នាប្រើទូកជាច្រើនគ្រឿងដើម្បីចុះរាវរកចាប់ពីម៉ោងទៀបភ្លឺ រហូតដល់ម៉ោង១៦រសៀលថ្ងៃដដែលនេះ ទើបឃើញសាកសព នៅក្នុងទឹកក្បែរស្ពានថ្មីក្រុងកំពត។
បច្ចុប្បន្នសពយុវជនរងគ្រោះ ត្រូវបានក្រុមគ្រួសារដឹកយកទៅកាន់លំនៅឋានដើម្បីចាត់ចែងធ្វើបុណ្យតាមប្រពៃណី។
ចំពោះករណីក្រុមជនអន្ធពាលបង្កការអុកឡុក បណ្តាលឲ្យយុវជនម្នាក់ស្លាប់បាត់បង់ជីវិតនេះ សមត្ថកិច្ចបាននិងកំពុងតាមប្រមាញ់រកមុខសញ្ញាក្រុមបង្ក ដើម្បីនាំខ្លួនពួកគេមកផ្តន្ទាទោសទៅតាមផ្លូវច្បាប់។/ ណារិទ្ធ
