ខេត្តប៉ៃលិន ៖ បើប្រជាពលរដ្ឋ ឬភ្ញៀវទេសចរ នាំគ្នាជិះម៉ូតូតាមផ្លូវក្រវ៉ាត់ព្រំដែន ចាប់ពីភូមិផ្សារព្រំ ឃុំស្ទឹងកាច់ ស្រុកសាលាក្រៅ ឆ្ពោះទៅទិសខាងត្បូង គេនឹងសង្កេតឃើញទេសភាពព្រៃភ្នំ និងព្រៃដែលដុះនៅតាមមាត់អូរ បញ្ចេញពណ៌ខៀវស្រងាត់ គួរឱ្យចង់គយគន់ និងបំបាត់ភាពធុញថប់ ។
បើតាមប្រភពព័ត៌មានពីប្រជាពលរដ្ឋរស់នៅក្បែរព្រំដែន បានឱ្យដឹងថា ទេសភាពព្រៃឈើនៅតាមភ្នំ និងជ្រលងដងអូរនារដូវវស្សានេះ បានបញ្ចេញពណ៌ខៀវខ្ចីស្រស់បំព្រង ទាក់ទាញភ្នែកភ្ញៀវទេសចរ ដែលបា ននាំគ្នាដើរលេងកំសាន្តបំបាត់ការអផ្សុក និងភាពធុញថប់ក្នុងអារម្មណ៍ ។ ជាពិសេសកាលពីរដូវភ្ជុំបិណ្ឌថ្មីៗនេះ ខណ:អ្នកខ្លះទៅលេងទឹកធ្លាក់ភ្នំខៀវ និងរមណីយដ្ឋានផ្សេងៗ ប៉ុន្តែមានមនុស្សមួយចំនួនបាននាំគ្នាបើក បរម៉ូតូ និងរថយន្តទៅលេងកំសាន្តនៅតាមផ្លូវដងអូរក្រវាត់ព្រំដែនយ៉ាងសប្បាយរីករាយ ។ លើសពីនេះ ផ្លូវព្រំ ដែនដ៏ធំទូលាយ ដែលអាជ្ញាធរ បានធ្វើកាលពីពេលថ្មីៗកន្លងទៅ បង្កលក្ខណ:ងាយស្រួលដល់ពួកគេទាំងនោះ និងប្រជាពលរដ្ឋ ដែលរស់នៅតំបន់ព្រៃភ្នំផងដែរ ។
បើតាមសម្តីរបស់ភ្ញៀវទេសចរនៅក្នុងមូលដ្ឋាន បានឱ្យដឹងថា ការធ្វើផ្លូវក្រវាត់ព្រំដែន ទទួលបានផល ចំណេញច្រើន ដោយអាចការពារទឹកដីរបស់យើងឱ្យបានគង់វង់ហើយ ក៏ក្លាយទៅជាកន្លែងធ្វើដំណើរកំ សាន្តទស្សនាទេសភាពព្រៃឈើនៅតាមដងអូរ ដែលមានទឹកហូររេញៗ ធ្វើឱ្យមានអារម្មណ៍ស្រស់ថ្លា និងបង្កើ ននូវកម្លាំងចិត្ត កម្លាំងកាយបន្ថែមទៀតផងដែរ ៕
ដោយ ៖ នីយ៉ា
