កំពត ៖ បុរសជាឪពុកបានស្លាប់ភ្លាមៗនៅកន្លែងកើតហេតុ ឯកូនប្រុសបានរងរបួសធ្ងន់ ខណៈជនរងគ្រោះជិះម៉ូតូបុកគូទរថយន្តដែលកំពុងចតស្ងៀមនៅចិញ្ចើមផ្លូវ។
គ្រោះថ្នាក់ខាងលើបានកើតឡើងនៅវេលាម៉ោង៦និង១៥នាទីព្រឹកថ្ងៃទី៧ខែតុលា ឆ្នាំ២០១៧ ត្រង់ចំណុចភូមិចង្ហោន ឃុំព្រែកត្នោត ស្រុកទឹកឈូ ខេត្តកំពត ស្ថិតលើកំណាត់ផ្លូវជាតិលេខ៣ កំពត-ព្រះសីហនុ។
តាមប្រភពពីសមត្ថកិច្ចបានឲ្យដឹងថា មុនពេលកើតហេតុម៉ូតូជនរងគ្រោះបានធ្វើដំណើរក្ទុងទិសដៅពីលិចទៅកើតដោយមានអ្នករួមដំណើរម្នាក់ទៀត ដែលជាកូនប្រុសបង្កើតរបស់ជនរងគ្រោះ លុះមកដល់ចំណុចកើតហេតុសង្ស័យបុរសជាឪពុកងងុយដេកក៏មិនដឹង ទើបជិះម៉ូតូទៅបុកនឹងគូទរថយន្តខ្នាតធំមួយគ្រឿងដែលកំពុងចតស្ងៀមនៅលើចិញ្ចើមផ្លូវបណ្តាលឲ្យស្លាប់ភ្លាមៗនៅកន្លែងកើតហេតុ ចំណែកកូនប្រុសដែលជិះពីក្រោយទទួលរងគ្រោះយ៉ាងដំណំ ហើយម៉ូតូក៏រងការខូចខាតយ៉ាងធ្ងន់ធ្ងរផងដែរ ។បន្ទាប់ពីមានមនុស្សស្លាប់និងរបួសដ៏តក់ក្រហល់បែបនេះ អ្នកបើកបររថយន្តធុនធំក៏ដាក់មេផាយបាត់ស្រមោលឈឹងតែម្តង។សមត្ថកិច្ចបានបញ្ជាក់ថា ជនរងគ្រោះដែលស្លាប់មានឈ្មោះ ជួប ឆាយា ភេទប្រុស អាយុ៥២ឆ្នាំ មុខរបរលេងភ្លេងខ្មែរ ចំណែកកូនប្រុសជាអ្នករួមដំណើរ ឈ្មោះ ជួប វាសនា អាយុ២៥ឆ្នាំ របួសធ្ងន់ ទាំងពីរនាក់មានទីលំនៅក្នុងភូមិបុសត្របែក ឃុំត្រពាំងព្រីង ស្រុកទឹកឈូខេត្តកំពត ជនរងគ្រោះជិះម៉ូតូម៉ាកWave C110 ពណ៌ខ្មៅ ពាក់ស្លាកលេខ កំពត 1K-7046។ដោយឡែករថយន្តធុនធំដែលចតស្ងៀមបង្កហេតុ ម៉ាកISUZU ពាក់ស្លាកលេខ ភ្នំពេញ 3C-6333 អ្នកបើកបរគេចខ្លួនបាត់។
បច្ចុប្បន្នសពបុរសរងគ្រោះត្រូវសាច់ញាតិមកទទួលយកទៅកាន់លំនៅឋានដើម្បីចាត់ចែងធ្វើបុណ្យតាមប្រពៃណី។ចំណែកបុរសជាកូនដែលរបួសធ្ងន់ត្រូវបានក្រុមគ្រួសារដឹកទៅសង្គ្រោះនៅឯមន្ទីរពេទ្យប្រទេសវៀតណាម។
ដោយឡែករថយន្តនិងម៉ូតូ សមត្ថកិច្ចបាននាំយកទៅរក្សាទុកនៅអធិការដ្ឋាននគរបាលស្រុកទឹកឈូសម្រាប់ដោះស្រាយគ្នាជាក្រោយ។/ ណារិទ្ធ
