កែប ៖ បុណ្យកឋិនទានសាមគ្គីដែលបានផ្តួចផ្តើមដោយរដ្ឋបាលខេត្តកែប ត្រូវបានធ្វើពិធីដង្ហែរនៅព្រឹកថ្ងៃ១រោជ ខែអសុជ នព្វស័ក ព.ស ២៥៦១ ត្រូវនឹងថ្ងៃសុក្រ ទី០៦ខែតុលា ឆ្នាំ២០១៧ ស្ថិតក្នុងទីអារាម វត្តពោធិ៍សត្ថារាម ហៅវត្តអំពេង ស្ថិតក្នុង ឃុំអង្កោល ស្រុកដំណាក់ចង្អើរ ខេត្តកែប។
ពិធីដង្ហែរអង្គកឋិនទានសាមគ្គីនេះ ជាការផ្តួចផ្តើមរបស់រដ្ឋបាលខេត្តកែប ដែលមាន លោក កែន សត្ថា អភិបាលនៃគណៈអភិបាលខេត្តកែប ជាម្ចាស់ផ្តើមបុណ្យ និងការចូលរួមចំណែកពីស្ថាប័ន មន្ទីរអង្គភាពពាក់ព័ន្ធនានា ទូទាំងខេត្តផងដែរ។
អង្គកឋិនទានសាមគ្គីដែលបានដង្ហែរទៅកាន់ វត្តពោធិ៍សត្ថារាមនៅថ្ងៃនេះ គឺមានគ្រឿងរណ្តាប់ជាច្រើនមុខ និងមានថវិកាសរុបចំនួន៦១.៥៤៨.៩០០រៀល បើគិតជាប្រាក់ដុល្លា ជាង១៥.០០០ដុល្លាអាមេរិក ហើយក្នុងនោះថវិការបស់រដ្ឋបាលខេត្តកែបមានប្រមាណជាង៤៦.០០០.០០០រៀល និងចំនួន៤.០០០.០០០រៀលជាការបរិច្ចាករបស់ក្រុមការងារថ្នាក់ជាតិ ក្រៅពីនោះគឺបានមកពីសប្បុរសជននានា ព្រមទាំងពុទ្ធបរិស័ទចំណុះជើងវត្តផងដែរ។ចំពោះបញ្ច័យចំនួនខាងលើនេះ រដ្ឋបាលខេត្តកែបបានប្រគេនដល់ព្រះចៅអធិការវត្តពោធិ៍សត្ថារាម សម្រាប់យកទៅប្រើប្រាស់តាមតម្រូវការផ្សេងៗ ដូចជាការកសាងសមិទ្ធផលក្នុងទីអារាមទាំងមូល ពិសេសការចាក់គ្រឹះសាងសង់ព្រះវិហារ ដែលបច្ចុប្បន្នទីអារាមមួយនេះកំពុងត្រូវការកិច្ចជ្រោមជ្រែងផ្នែកសម្ភារៈក៏ដូចជាថវិកាយ៉ាងច្រើនសន្ធឹកសន្ធាប់សម្រាប់កសាងបន្តទៀត។
សូមបញ្ជាក់ថា វត្តពោធិ៍សត្ថារាម ហៅវត្តអំពេង ស្ថិតក្នុងភូមិអំពេង ឃុំអង្កោល ស្រុកដំណាក់ចង្អើរ ខេត្តកែប ត្រូវបានកសាងជាថ្មី បន្ទាប់ពី លោក កែន សត្ថា អភិបាលខេត្តកែប នាពេលបច្ចុប្បន្ន ឡើងកាន់តំណែងជាគណៈអភិបាលខេត្ត ហើយវត្តនេះឥឡូវក៏បានលេចចេញនូវរូបរាងបន្តិចម្តងៗ ដោយសង្ឃឹមថា ក្នុងពេលអនាគតដ៏ខ្លីខាងមុខ វត្តពោធិ៍សត្ថារាម ហៅវត្តអំពេង ក្នុងឃុំអង្កោល ស្រុកដំណាក់ចង្អើរ នឹងមានរូបរាងយ៉ាងប្រណិត ដូចទីអារាមនានាក្នុងអាណាចក្រខេត្តកែបទាំងមូលដែរ។
បច្ចុប្បន្នប្រជាពលរដ្ឋក្នុងមូលដ្ឋាន ក៏ដូចជាពុទ្ធបរិស័ទចំណុះជើងវត្ត បាននឹងកំពុងរីករាយដោយសារពេលនេះមានវត្តអារាមនៅក្បែរលំនៅឋានដែលពួកគាត់រស់នៅ សម្រាប់ឲ្យគាត់បានចូលរួមចំណែកក្នុងការធ្វើបុណ្យទាន សាងកុសល្យគោរពបូជា តាមផ្លូវព្រះធម៌ ព្រះសង្ឃ និងតាមគន្លងព្រះពុទ្ធសាសនានៃយើង។/ ណារិទ្ធ
