កំពត ៖ ក្មេងស្រីអាយុ៣ឆ្នាំម្នាក់បានស្លាប់យ៉ាងអណោចអធ័ម ខណៈពេលជិះម៉ូតូឌុបត្រឡប់មកពីចាក់ថ្នាំនៅឯមន្ទីរពេទ្យ ហើយត្រូវរថយន្តទួរីសបុកម៉ូតូពីក្រោយដ៏ពេញទំហឹង។
ហេតុការណ៍គួរឲ្យរន្ធត់ខាងលើបានកើតឡើងនៅវេលាម៉ោង៨និង២០នាទីព្រឹក ថ្ងៃទី០៥ខែតុលា ឆ្នាំ២០១៧ ត្រង់ចំណុចភូមិកណ្តាលទួល ឃុំកំពង់ត្រាចខាងលិច ស្រុកកំពង់ត្រាច ខេត្តកំពត ស្ថិតលើកំណាត់ផ្លូវជាតិលេខ៣៣។
សាក្សីដែលឃើញហេតុការណ៍ផ្ទាល់ភ្នែកបានឲ្យដឹងថា មុនពេលជួបហេតុការណ៍ដ៏អាក្រក់នេះ គេឃើញម៉ូតូរបស់ជនរងគ្រោះជិះគ្នាបីនាក់ក្នុងនោះមានក្មេងស្រីម្នាក់ផងដែរ ដោយធ្វើដំណើរក្នុងទិសដៅពីកើតទៅលិច លុះមកដល់ចំណុចគ្រោះថ្នាក់ ម៉ូតូនោះក៏បើកភ្លើងសញ្ញាបត់ឆ្លងផ្លូវទៅផ្នែកឆ្វេងដៃបំណងចូលផ្លូវលំ គាប់ជួនមានរថយន្តម៉ាកសាមយ៉ុងដឹកអ្នកដំណើរមកពីក្រោយក្នុងទិសដៅស្របគ្នា គេចមិនទាន់ ក៏បុកម៉ូតូពេញទំហឹងបណ្តាលឲ្យក្មេងស្រីជាអ្នករួមដំណើរបោកក្បាលនឹងកញ្ចក់រថយន្តស្លាប់ភ្លាមៗមួយរំពេច ចំណែកអ្នកបើកបរម៉ូតូរងរបួសធ្ងន់ត្រូវបានគេដឹកទៅសង្គ្រោះនៅឯមន្ទីរពេទ្យភ្លាមៗ។សាក្សីដដែលបានបញ្ជាក់ទៀតថា ក្រោយពីប៉ះទង្គិចគ្នាបណ្តាលឲ្យមានមនុស្សស្លាប់នឹងរបួសនោះ អ្នកបើកបររថយន្តក៏លោតចុះរត់សំដៅស្រែគេចខ្លួនបាត់ស្រមោលឈឹង ដោយទុករថយន្តចតចោលកណ្តាលទ្រូងផ្លូវតែម្តង។
ទាក់ទិននឹងករណីគ្រោះថ្នាក់បណ្តាលឲ្យមានមនុស្សស្លាប់និងរបួសនេះ ប៉ូលិសចរាចរណ៍ស្រុកដែលមកវាស់វែងបានឲ្យដឹងថា ក្មេងស្រីរងគ្រោះដែលស្លាប់នេះ ត្រូវបានជីដូនដឹកតាមម៉ូតូឌុបទៅចាក់ថ្នាំនៅឯមន្ទីរពេទ្យ លុះពេលជិះម៉ូតូឌុបត្រឡប់មកវិញ ក៏ត្រូវរថយន្តបុកស្លាប់តែម្តង។សមត្ថកិច្ចបានឲ្យដឹងទៀតថា ក្មេងស្រីរងគ្រោះមានឈ្មោះ សីុវ លី អាយុ៣ឆ្នាំ(ស្លាប់នៅកន្លែងកើតហេតុ)ចំណែកជីដូន ឈ្មោះ ញើង គីម ភេទស្រី អាយុ៥០ឆ្នាំរបួសមធ្យម ទាំងពីរនាក់មានទីលំនៅក្នុងភូមិកណ្តាលទួល ឃុំកំពង់ត្រាចខាងលិច ស្រុកកំពង់ត្រាច ខេត្តកំពត។ ដោយឡែក ម្ចាស់ម៉ូតូឈ្មោះ ទឹម ធឿន ភេទប្រុស អាយុ៤៦ឆ្នាំ របួសធ្ងន់ ជាអ្នករត់ម៉ូតូឌុប មានទីលំនៅក្នុងភូមិដំណាក់កន្ទួត ឃុំដំណាក់កន្ទួតខាងត្បូង ស្រុកកំពង់ត្រាច ខេត្តកំពត ជិះម៉ូតូម៉ាកC125ពណ៌ខ្មៅ សេរីឆ្នាំ២០១៧ ពាក់ស្លាកលេខ កំពត 1K-4437។ ដោយឡែករថយន្តបង្កម៉ាកសាមយ៉ុងពាក់ស្លាកលេខ ភ្នំពេញ 2S-6370 អ្នកបើកបរគេចខ្លួនបាត់ ពេលនេះសមត្ថកិច្ចជំនាញកំពុងតាមស្រាវជ្រាវរកអត្តសញ្ញាណហើយ។
ក្រោយពីវាស់វែង ប៉ូលិសក៏បាននាំយកមធ្យោបាយពាក់ព័ន្ធទៅរក្សាទុកនៅក្នុងអធិការដ្ឋាននគរបាលស្រុកកំពង់ត្រាច ដើម្បីស្រាវជ្រាវរកម្ចាស់រថយន្តមកដោះស្រាយគ្នាតាមច្បាប់ចរាចរណ៍ផ្លូវគោក។ចំណែកសពក្មេងស្រីរងគ្រោះ ត្រូវបានក្រុមគ្រួសារនាំទៅកាន់លំនៅឋានដើម្បីចាត់ចែងធ្វើបុណ្យតាមប្រពៃណី ៕
ណារិទ្ធ
