រាជធានីភ្នំពេញ ៖ នាព្រឹកថ្ងៃទី១៩ ខែមីនា ឆ្នាំ២០១៥ ក្នុងពេលដែលសមាជិកសភា មកពីគណបក្សប្រជាជន និងសង្គ្រោះជាតិកំពុងប្រជុំអនុម័តសេចក្តីស្នើច្បាប់បោះឆ្នោត និងច្បាប់ស្តីពីការរៀបចំគណៈកម្មាធិការជាតិរៀបចំការបោះឆ្នោត (គ.ជ.ប) នៅឯវិទ្យាស្ថានជាតិអប់រំ ឯណោះវិញ ជាមួយនឹងប្រសាសន៍លើកទឹកចិត្តចំពោះការបណ្តុះបណ្តាលធនធានមនុស្ស សម្តេចអគ្គមហាសេនាបតីតេជោ ហ៊ុន សែន បានបន្តអត្ថាធិប្បាយពីករណីឯកឧត្តម កឹម សុខា អនុប្រធានគណបក្សសង្គ្រោះជាតិ និងជាអនុប្រធានរដ្ឋសភា ដែលបានថ្លែងនៅអាមេរិក អំពីការមិនពេញចិត្តនឹងកិច្ចព្រមព្រៀងនយោបាយថ្ងៃទី២២ ខែកក្កដា ឆ្នាំ២០១៤ រវាងគណបក្សប្រជាជនកម្ពុជា និងគណបក្សសង្គ្រោះជាតិ។
ក្នុងឱកាសអញ្ជើញជាអធិបតី ក្នុងពិធីប្រគល់ប័ណ្ណជ័យលាភីអាហារូបករណ៍សម្តេចតេជោ ហ៊ុន សែន-ហាន់ដា ចក្ខុវិស័យ១០០ ឆ្នាំ២០១៤ និងសម្តេចតេជោ ហ៊ុន សែន ចក្ខុ វិស័យ១០០ ឆ្នាំ២០១៤-២០១៨ សម្រាប់សាកលវិទ្យាល័យកម្ពុជាសម្តេចតេជោនាយករដ្ឋមន្ត្រីបាន មានប្រសាសន៍រំលឹកពីផែនការបង្ក្រាបមេដឹកនាំឲ្យមានព្រឹត្តិការណ៍ ប្រើអំពើរហឹង្សាលើកម្លាំងរក្សាសណ្តាប់ធ្នាប់ទីលានប្រជាធិបតេយ្យ កាលពីថ្ងៃទី១៥ ខែកក្កដា ឆ្នាំ២០១៤ កន្លងមកថា ខ្ញុំបានសួររដ្ឋមន្ត្រីយុត្តិធម៌ថា មាន ៨ចំណុចនៃសំណុំរឿងរបស់គាត់ កុំអីមានការចាប់ខ្លួន កឹម សុខា តាំងពីល្ងាចថ្ងៃទី១៥ខែកក្កដា ឆ្នាំ២០១៤។ សម្តេចមានប្រសាសន៍ឲ្យដឹងថា ថ្នាក់ដឹកនាំជាន់ខ្ពស់ និងអ្នកច្បាប់ បានមកជួបជុំគ្នានៅផ្ទះរបស់ខ្ញុំនៅម៉ោង៥ល្ងាច ដើម្បីពិភាក្សាគ្នាអំពីការចាប់ កឹម សុខា នៅពេលនៅស្រុកចម្ការលើ ខេត្តកំពង់ចាម ដោយដាក់ឃុំនៅត្រពាំងផ្លុងតែម្តង។ នៅពេលនោះ ខ្ញុំបាននិយាយថា យើងត្រូវច្បាស់លាស់ ប្រតិបត្តិការរបស់ យើងធ្វើចំពោះអ្នកនៅលើសមរភូមិជាក់ស្តែងតែប៉ុណ្ណោះ ចំណែកករណី កឹម សុខា មិនមែននៅលើសមរភូមិនេះទេ ដូច្នេះយើងបានសម្រេចទុកករណី កឹម សុខា ឲ្យតុលាការហៅទៅសួរ ព្រោះក្នុងឋានៈជាប្រធានស្តីទីគណបក្សនៅពេល នោះ គាត់បានដឹងរឿងនេះឬអត់។
សម្តេចតេជោមានប្រសាសន៍បញ្ជាក់ថា មិនមែនជាបញ្ហាចៃដន្យទេ ដែលអស់លោកថា ប្រែតាមប្រជាធិបតេយ្យនៃការបោះឆ្នោត ប៉ុន្តែអស់លោកនៅចាំសម្តីទេ «ហ៊ុន សែន អើយចុះចេញទៅៗ» អស់លោកចង់និយាយពីការផ្លាស់ប្តូរ ប៉ុន្តែពាក្យផ្លាស់ប្តូររបស់អស់លោក គឺជាការផ្តួលរំលំ។ ទុកឱ្យតុលាការវិនិច្ឆ័យចុះ។ ខ្ញុំមិនចង់ឆ្លើយឆ្លងជាមួយអ្នកនាំពាក្យដែលនិយាយថា គេដំណើរការផ្លាស់ប្តូរតាមរយៈការបោះឆ្នោត ប៉ុន្តែក្រោយការបោះឆ្នោតម៉េចក៏មកធ្វើរឿងអញ្ចឹង តើស្លាប់មនុស្សប៉ុន្មាននាក់ របួសមនុស្សប៉ុន្មាននាក់ ហើយខូចខាតទ្រព្យសម្បត្តិ អស់ប៉ុន្មាន?។
សម្តេចតេជោបានលើកឡើងនូវសំណួរចំនួនពីរ សម្រាប់ឯកឧត្តម កឹម សុខា៖ ទី១-បើ ឯកឧត្តម (កឹម សុខា) មិនពេញចិត្ត ម៉េចឯកឧត្តមចង់បានម្ល៉េះការធ្វើអនុប្រធានទី១រដ្ឋសភានោះ។ តើឯកឧត្តមអាចផ្ទេរ កៅអីហ្នឹងទៅឲ្យអ្នកផ្សេងនៅក្នុងគណបក្សសង្គ្រោះជាតិបានទេ និងសំណួរទី២-បើ មៀច សុវណ្ណារ៉ា មិនអាចនៅក្រៅឃុំបាន ឬមិនអាចរួចខ្លួនបាននៅចូលឆ្នាំខ្មែរ ដែលឯកឧត្តមនិយាយថា «ខ្ញុំមិនអាចទទួលបាន» តើឯកឧត្តមចង់ធ្វើអ្វី?។
សម្តេចអគ្គមហាសេនាបតីតេជោ ហ៊ុន សែន មានប្រសាសន៍ថា ឥឡូវ ខ្ញុំចង់សួរ លោកឯងត្រៀមធ្វើអ្វី ព្រោះលោកឯងកំពុងតែស្ថិតនៅក្នុងពិរុទ្ធភាព ជាមេដឹកនាំនៃការផ្តួលរំលំរាជរដ្ឋាភិបាលស្របច្បាប់។ លោកឯងដឹកនាំបាតុកម្ម ឬក៏ដឹកនាំទៅរំដោះអ្នកទោស ឬលោកឯងធ្វើអ្វីទៀត ឬលោកឯងដើរចេញពីសភា វាជារឿងរបស់លោកឯងទេ។ សម្តេចតេជោនាយករដ្ឋ មន្ត្រីមានប្រសាសន៍ថា ខ្ញុំសូមរំឭកជូនអ្នកគាំទ្រលោក កឹម សុខា ទាំងប៉ុន្មានឲ្យ ភ្លឺភ្នែក។ លោក កឹម សុខា លោកព្រួយណាស់ លោកខ្លាចគណបក្សប្រជាជនកម្ពុជាមិនបោះឆ្នោត។ លោកទាមទារឲ្យមានការដាក់ឈ្មោះមានការគាំទ្រ… គាត់ថាត្រូវគោរពអធិបតេយ្យរបស់បក្ស។ ពេលនោះខ្ញុំបានបញ្ជាក់ និងបាន ចង្អុលទៅកាន់ឯកឧត្តម សម រង្ស៊ី ឯកឧត្តម គួយ ប៊ុនរឿន ឯកឧត្តម សុន ឆ័យ ឯកឧត្តម អេង ឆៃអ៊ាង ឯកឧត្តម យឹម សុវណ្ណ ថាតើឯកឧត្តមនៅចាំទេឆ្នាំ ២០០៣ឯកឧត្តមនិយាយថា គាំទ្រហើយ ហ៊ុន សែន ប៉ុន្តែសន្លឹកឆ្នោតនៅក្នុងដៃសមាជិកសភា។ គាត់បានបញ្ជាក់រឿងហ្នឹង គាត់ខ្លាចមិនជាប់ជាអនុប្រធានទីមួយរដ្ឋសភានោះ។ បើខ្ញុំជាកូនប្រុស ខ្ញុំលាលែងពីអនុប្រធានទីមួយនៃរដ្ឋសភា ព្រោះលោកឯងអត់ពេញចិត្ត។ បើលោកឯងមិនពេញចិត្តម៉េចក៏មកធ្វើអនុប្រធានទីមួយរដ្ឋសភា។ គណបក្សប្រជាជនកម្ពុជាគេមិនយកទេតំណែងហ្នឹង ម៉េចក៏មិនឲ្យអ្នកផ្សេងនៅក្នុងគណបក្សសង្គ្រោះជាតិ ៥៥នាក់ ក្នុងសមាជិកសភារបស់គណបក្សសង្គ្រោះជាតិរើសមិនបានធ្វើអនុប្រធានទី មួយរដ្ឋសភាឬ ខ្ញុំកំពុងតែឆ្ងល់។
សម្តេចតេជោមានប្រសាសន៍ថា លោកនិយាយថា ចង់ផ្លាស់ប្តូរឲ្យបានឆាប់ក្រោយការបោះឆ្នោត លោកឯងធ្វើអ្វីជាសញ្ញា ដូច្នេះខ្ញុំបានត្រៀមរៀបចំកម្លាំងប្រដាប់អាវុធ ដើម្បីទ្រទ្រង់សភាពការណ៍ និងនិរន្តរភាពសភាពការណ៍ និងការពារសន្តិសុខឲ្យប្រជាជនការពាររដ្ឋធម្មនុញ្ញ ការពារព្រះមហាក្សត្រ ការពាររាជរដ្ឋាភិបាល គឺជារឿងត្រឹមត្រូវ។
សម្តេចតេជោនាយករដ្ឋមន្ត្រីថ្លែងថា ខ្ញុំសូមជម្រាបច្បាប់បោះឆ្នោត ឬច្បាប់រៀបចំគណៈកម្មាធិការជាតិរៀបចំការបោះឆ្នោត (គ.ជ.ប) នេះ អត់ពាក់ព័ន្ធជាមួយនឹងដំណើរ ការក្តីនៅតុលាការរបស់អ្នកមានពិរុទ្ធភាពទៅលើសំណុំរឿងព្រហ្មទណ្ឌ នៅថ្ងៃទី១៥ ខែកក្កដា ឆ្នាំ២០១៤ទេ។ បើលោកឯងហ៊ានធ្វើ ខ្ញុំហ៊ានលេងលោកឯងដែរ លោកឯងប្រថុយមើល នេះជារដ្ឋអំណាច។ កុំមកនិយាយថា នាយករដ្ឋមន្ត្រី ត្រួតត្រាកម្លាំងប្រដាប់អាវុធ បើធ្វើនាយករដ្ឋមន្ត្រីមិនអាចត្រួតត្រាកម្លាំងប្រដាប់អាវុធបានទៅ ធ្វើនាយករដ្ឋមន្ត្រីធ្វើអ្វី។ អ្វីដែលខ្ញុំមិនអាចត្រួតត្រាបាន គឺតុលាការ រដ្ឋសភា ព្រឹទ្ធសភា និងក្រុមប្រឹក្សាធម្មនុញ្ញ ប៉ុន្តែកម្លាំងប្រដាប់អាវុធ ខ្ញុំត្រួតត្រាបាន។
ទន្ទឹមនិងការបញ្ជូនសារនយោបាយដ៏សំខាន់ទៅឯកឧត្តម កឹម សុខា អនុប្រធានគណបក្សសង្គ្រោះជាតិ និងជាអនុប្រធានរដ្ឋសភាសម្តេចអគ្គមហាសេនាបតីតេជោ ហ៊ុន សែន បានអបអរសាទរចំពោះជ័យលាភីដែលបានប្រឡងយកបានអាហារូបករណ៍សិក្សានៅ សាកលវិទ្យាល័យកម្ពុជា ដោយសម្តេចបានជំរុញ និងលើកទឹកចិត្តឱ្យនិស្សិតដែលប្រលងជាប់អាហារូបករណ៍ត្រូវខិតខំរៀន។ ទាក់ទិននឹងវិស័យអប់រំបណ្តុះបណ្តាលធនធានមនុស្សនេះដែរ សម្តេចតេជោក៏បានលើកឡើងពាក់ព័ន្ធទៅនឹងអ្នកគ្រូ នាង ផល្លា ដែលជាគ្រូបង្រៀនកុមារគ ថ្លង់ របស់អង្គការគ្រួសារថ្មី ដោយចាត់ទុកអ្នកគ្រូ នាង ផល្លា គឺជាវីរនារីទី២ របស់កម្ពុជា បន្ទាប់ពីកញ្ញា ស៊ន សៀវម៉ី កីឡាការិនីតៃក្វាន់ដូ ដែលដណ្តើមបានមេដាយមាសជូនប្រទេសជាតិ ក្នុងការប្រកួតកីឡាអូឡាំពិកនាពេលកន្លងមកនេះ។
សម្តេចតេជោមានប្រសាសន៍កោតសរសើរអ្នកគ្រូ នាង ផល្លា ដែលបានទៅចូលរួមការប្រកួតប្រជែងការជ្រើសរើសកម្មវិធីពានរង្វាន់គ្រូ ឆ្នើមពិភពលោក (Global Teacher Prize)ក្នុងទីក្រុងឌូប៊ៃ កាលពីថ្ងៃទី១៥ ខែមីនា ឆ្នាំ២០១៥ថា ទោះបីជាមិនបានជាប់លេខ១ ក្តី តែអ្នកគ្រូបាននាំមោទនភាពជូនជាតិ និងប្រជាពលរដ្ឋខ្មែរព្រោះការឡើងទៅកាន់ចំណាត់ថ្នាក់ជាប់ក្នុងចំណោម ១០នាក់ ដែលមានជាង ១០០ប្រទេស នៅលើពិភពលោកចូលរួមនោះ មិនមែនជារឿងធម្មតាទេ។ សម្តេចតេជោឲ្យដឹងថា នៅថ្ងៃបិទសន្និបាតក្រសួងអប់រំយុវជន និងកីឡា នៅថ្ងៃទី២៦ ខែមីនា ឆ្នាំ២០១៥ សម្តេចនឹងបំពាក់គ្រឿងឥស្សរិយយសជូនអ្នកគ្រូ នាង ផល្លា។
សម្តេចតេជោបានថ្លែងជាសាធារណៈដោយមោទនៈភាពទៀតថា ខាងមុខនេះ កម្ពុជា នឹងមានវីរៈនារី១រូបទៀត ដែលជាកីឡាការិនី ប៊ូល លេខ១ដែលបានឈ្នះការប្រកួតលំដាប់ពិភពលោកនោះ ហើយពិធីដង្ហែកីឡាការិនីរូបនោះ នឹងធ្វើនៅពេលខាងមុខផងដែរ។
យោងតាមសេចក្តីរាយការណ៍បានឲ្យដឹងថា ចាប់តាំងពីឆ្នាំសិក្សា២០០៣-២០០៤ រហូតដល់ឆ្នាំសិក្សា២០១៤-២០១៥នេះ សាកលវិទ្យាល័យកម្ពុជា បានផ្តល់អាហារូបករណ៍ជូនសម្តេចអគ្គមហាសេនាបតីតេជោ ហ៊ុន សែន ចំនួន ១៣ប្រភេទ ដែលមានចំនួនសិស្សទទួលសរុប ២.៤៥០អង្គ/នាក់។ អាហារូបករណ៍ទាំងនេះ ត្រូវបានផ្តល់ជូន និងឧបត្ថម្ភដោយសប្បុរសជននានា តាមឆ្នាំសិក្សាជាបន្តបន្ទាប់ ដោយឡែកសម្រាប់ ឆ្នាំសិក្សា២០១៤-២០១៥ បានផ្តល់អាហារូបករណ៍ថ្នាក់បរិញ្ញាបត្រចំនួន ១០០កន្លែងដែលបានឧបត្ថម្ភដោយបណ្ឌិត ហារុហ៊ីសាហាន់ដា ស្ថាបនិក និងជាប្រធានមូលនិធិអន្តរជាតិដើម្បីសិល្បៈ និងវប្បធម៌ នៃទីក្រុងតូក្យូប្រទេសជប៉ុន និងជាអធិការបតីនៃសាកលវិទ្យាល័យកម្ពុជា។ ក្នុងឆ្នាំសិក្សា២០១៤-២០១៥នេះដែរ ក៏បានផ្តល់អាហារូបករណ៍ថ្នាក់បរិញ្ញាបត្រចំនួន១០០កន្លែង ដែលឧបត្ថម្ភដោយលោក Wang Jiemin នាយកគ្រប់គ្រងក្រុមហ៊ុន China Fairwind (Cambodia) Investmen Company Limited និងជានាយកក្រុមហ៊ុន Fairwind ៕
