កែប ៖ បុរសម្នាក់បានស្លាប់ភ្លាមៗខណៈជិះម៉ូតូជ្រុលចង្កូតធ្លាក់ចូលក្នុងសមុទ្រ កាលពីវេលាម៉ោង៥ល្ងាច ថ្ងៃទី២៥ខែកញ្ញា ឆ្នាំ២០១៧ ត្រង់ចំណុចមាត់ឆ្នេរខាងត្បូងព្រះរាជដំណាក់(ដំណាក់ស្តេច)តាមបណ្តោយមាត់ឆ្នេរលេងទឹក នៃក្រុងកែប។ករណីជិះម៉ូតូធ្លាក់ទឹកសមុទ្របណ្តាលឲ្យស្លាប់ដ៏រន្ធត់នេះ សង្ស័យជនរងគ្រោះស្រវឹងស្រាជោកជាំ ទើបភ្លេចកាច់ចង្កូតម៉ូតូបែបនេះ។
តាមប្រភពនៅកន្លែងកើតហេតុបាននិយាយថា មុនពេលជួបហេតុការណ៍ដ៏អាក្រក់ខាងលើ គេឃើញជនរងគ្រោះជិះម៉ូតូម្នាក់ឯងម៉ាកវីវ៉ា ក្នុងស្ថានភាពស្រវឹង ទិសដៅពីចំណុចផ្សារក្តាមសំដៅទៅឆ្នេរលេងទឹក លុះមកដល់ចំណុចគ្រោះថ្នាក់ដែលជាចំណុចផ្លូវកោងវាងចង្កេះភ្នំ ជនរងគ្រោះក៏ជ្រុលចង្កូតម៉ូតូធ្លាក់ក្នុងទឹកសមុទ្រតែម្តង។សាក្សីបានបញ្ជាក់ថា ទីតាំងកើតហេតុជាចំណុចខ្ពស់ហើយនៅខាងក្រោមមានសុទ្ធតែដុំថ្មរដិបរដុប និងទឹករិចៗទើបជនរងគ្រោះធ្លាក់ចុះក្រោមជាមួយម៉ូតូបោកក្បាលស្លាប់មួយរំពេច។
ទាក់ទិននឹងគ្រោះថ្នាក់នេះដែរ សមត្ថកិច្ចក្រុងកែបបានប្រាប់ឲ្យដឹងថា ជនរងគ្រោះដែលស្លាប់បាត់បង់ជីវិតដោយសារគ្រោះថ្នាក់ចរាចរណ៍ខាងលើគឺបង្កដោយខ្លួនឯងព្រោះតែស្រវឹងស្រា បរុសរងគ្រោះឈ្មោះ យ៉ាប់ យ៉ា ភេទប្រុស អាយុ៤៧ឆ្នាំមានទីលំនៅក្នុងភូមិថ្មី សង្កាត់ព្រៃធំ ក្រុង-ខេត្តកែប ជនរងគ្រោះជិះម៉ូតូម្នាក់ឯងម៉ាកវីវ៉ា ពណ៌ខ្មៅពាក់ស្លាកលេខ កែប 1A-3001។
បច្ចុប្បន្ន សពជនរងគ្រោះ ត្រូវបានក្រុមគ្រួសារដឹកទៅកាន់លំនៅឋានដើម្បីចាត់ចែងធ្វើបុណ្យតាមប្រពៃណី។ចំណែកម៉ូតូប៉ូលិសក៏បានប្រគល់ទៅសាច់ញាតិយកទៅជួសជុលវិញហើយ ៕
ណារិទ្ធ
